2-Каринфвийриз 2 - Пак Калам

¹ Гьавиляй за куь патав анжах куьн пашман тахьун патал мад татун кьетӀнава,

² вучиз лагьайтӀа за куьн пашман ийиз хьайитӀа, зун шад ийидайди бес вуж хьурай? Абур за пашман ийизвай куьн тахьана вуж хьурай?

³ За а чар, квез заз чпелди шадвал ийиз кӀанзавайбуру зун пашман тавун паталди, кхьейди я. Зун куь шадзаватӀа, куьнни ада шадвалзавайдахъ зун агъунва.

⁴ Квез акӀ кхьиз заз акьван регьят тушир; за накъвар авахьиз ва рикӀе тӀал аваз кхьенай. Амма зи макьсад куьн пашман авун ваъ, заз куьн гьикьван гзаф кӀанзаватӀа квез чир авун тир.

Гунагькардилай гъил къахчун

⁵ Пашманвал гайида зун ваъ, вири куьн са кьадар (за гзафардайвал тахьуй) пашман авуна.

⁶ А касдиз адав квекай гзафбурун патай агакьнавай жаза бес я.

⁷ Гила лагьайтӀа адалай гъил къахчу ва ам, эхи тежедай пашманвили руьгьдай авуднаваз тежедайвал, кӀубанара.

⁸ Гьавиляй минет хьуй квез, адахъди куь муьгьуьббат тестикь ая.

⁹ За гьакӀ куьн вири крара зи чӀалаз килигдатӀа чирун патални квез кхьенай.

¹⁰ Куьне нелай гъил къахчузватӀа, зани адалай гъил къахчуда. Эхь, са нихъ ятӀани гъил къахчудай хьтин кар аваз, за а касдилай гъил къахчунатӀа, за Месигьдин вилик куь хатурдай гъил къахчуна.

¹¹ И карди иблисдивай чун алцур тежедайвал авуна. Иблисдин ниятар лагьайтӀа чаз лап хъсандиз чизва.

Павелаз вичин гьакъиндай чарада кхьенвай чарар герек туш

¹² Месигьдикай Шад Хабар гуз зун Туругьасдиз атай чӀавуз Реббиди заз рехъ ахъайна.

¹³ Амма завай секин хьана акъвазиз хьанач, вучиз лагьайтӀа ана заз имандин рекьяй зи стха тир ТӀитӀ жагъаначир. Гьавиляй зун абурухъ галаз чара хъхьана ва МакӀедандиз рекье гьатна.

¹⁴ Аллагьдиз шукур хьурай: Ада чун Месигьди къачур агалкьунар авай Вичин сварагдик кваз датӀана тухузва ва чна Месигьдикай виринра чирвилерин хуш атир чукӀурзава.

¹⁵ Хилас жезвайбурун ва кьиникьихъ физвайбурун арада, Месигьдиз талукьбур яз, Аллагь паталди чун хуш атир я.

¹⁶ Садбуруз чун ажал гъизвай пис ял я, муькуьбуруз – чан кутадай хуш атир я. Ихьтин къуллугъ кьилиз акъудиз алакьдайди вуж я?

¹⁷ Чна, гзафбуру ийизвайвал, жуваз менфят къачуз, Аллагьдин Гаф маса гузвач эхир. Чун Аллагьдин вилик, Аллагьди ракъурнавай инсанар хьиз, Месигьдиз вафа хуьз, михьи рикӀелди рахазва.