1-Ягья 2 - Пак Калам

Иса Месигь – чи панагь

¹ Чан балаяр, за и гафар квез, куьне гунагь тавун паталди кхьизва. Сада гунагь авуртӀани, чахъ гьахъ-михьи Иса Месигь ава ва Ада Бубадин вилик чи пад кьаз векилвал ийизва,

² Ам чи гунагьриз килигна, тек са чи гунагьриз ваъ, вири дуьньядин гунагьриз килигна, абур михьун патал къурбанд хьанва.

³ Чна Адан тагькимар кьилиз акъудзаватӀа, чаз Ам чизва.

⁴ Сада «заз Ам чизва» лугьузватӀа, амма Адан тагькимар кьилиз акъудзавачтӀа, ам тапархъан я ва адахъ гьакъикъат авайди туш.

⁵ Анжах ни Адан Гафунал амал авуртӀа, Аллагьдин муьгьуьббат адан рикӀе камилвилин дережадив агакьнава. И кардилай чаз чир жезва хьи, чун Аллагьдиз талукь я.

⁶ Ни вич Адахъ галаз амукьзавайди яз малумарзаватӀа, гьада Иса Месигьдин хьтин уьмуьр кьиле тухун лазим я.

ЦӀийи тагьким

⁷ За квез, зи кӀанибур, цӀийи тагьким ваъ, квехъ эвелдай авай, къадим тагьким кхьизва. Амни квез ван хьанвайди я.

⁸ Гьар гьикӀ ятӀани, за квез кхьизвайди цӀийи тагьким я, ам гьакъикъат тирди Месигьдин ва куь крарай аквазва. Вучиз лагьайтӀа, мичӀер алатзава ва гила халисан экуьни рапӀрапӀ гузва.

⁹ Низ вич экуьник ква лугьуз, амма вичин стха такӀанзаватӀа, ам гьеле мичӀивиле ама.

¹⁰ Стха кӀанзавайди экуьна амукьзава ва адан кӀвач галкӀидай са себебни авач.

¹¹ Амма стха такӀанзавайди мичӀера ама. Ам мичӀера къекъвезва ва адаз вич гьиниз фидатӀа чизвач, вучиз лагьайтӀа, мичӀивили адан вилер буьркьуь авунва.

¹² Чан балаяр, за квез кхьизва, вучиз лагьайтӀа, Гьадан ТӀварцӀин хатурдай куь гунагьрилай гъил къахчунва.

¹³ Эй бубаяр, за квез кхьизва, куьз лагьайтӀа, сифтедилай Вуж авайтӀа, Ам квез чир хьанва. Эй жегьилар, за квез кхьизва, вучиз лагьайтӀа, куьн шийирдал гъалиб хьанва.

¹⁴ Эй аялар, за квез кхьена, вучиз лагьайтӀа квез Буба чизва. Эй бубаяр, за квез кхьена, вучиз лагьайтӀа, Вуж сифтедилай авайтӀа, Ам квез чир хьана. Эй жегьилар, за квез кхьена, вучиз лагьайтӀа, квехъ къуват ава, Аллагьдин Гаф квехъ амукьзава ва куьн шийирдал гъалиб хьанва.

¹⁵ Квез и дуьнья ва и дуьньяда авай затӀар кӀан жемир. Низ и дуьнья кӀанзаватӀа, адаз Буба кӀанзавач.

¹⁶ Вучиз лагьайтӀа, дуьньяда авай гьар са затӀ – гьашервал, темягькарвал ва кьадар авачир такабурвал Бубадин патай ваъ, дуьньядин патай къвезва.

¹⁷ Дуьнья ва дуьньядин гьашервилер алатна фида, амма Аллагьдин къастунал амал ийизвайбур эбеди яз амукьда.

Месигьдиз акси кас

¹⁸ Эй аялар, эхирзаман я. Квез ван хьайивал, Месигьдиз акси кас атун герек я ва гилани Месигьдиз акси ксар гзаф пайда хьанва. Гьа и кардилай малум жезва хьи, эхирзаман я.

¹⁹ Абур чи арадай акъатна, амма абур чакай туш. Абур чакай тиртӀа, чахъ галаз амукьдай. Амма абур амукь тавуни абур чакай туширди къалурзава.

²⁰ Куьне пак тирдавай нуьсрет къачунва ва квехъ виридахъ чирвилер ава.

²¹ За и гафар квез гьакъикъат чин тийизвайвиляй ваъ, чизвайвиляй кхьена ва квез чизва хьи, гьич са тапарринни гьакъикъатдин арада алакъа авач.

²² Бес тапрукь вуж я? – Иса – Месигь тирди инкар ийизвай кас! Ахьтин кас Месигьдиз акси кас я, ада Бубани Хва инкарзава.

²³ Хва инкарзавай касдихъ Бубани авач, амма Хва тестикьарзавай касдихъ Бубани ава.

²⁴ Квез лагьайтӀа, эвелдай ван хьайи гафар къуй квехъ амукьрай. Эвелдай квез ван хьайиди куь рикӀе амукьайтӀа, куьнни Хце ва Бубада амукьда.

²⁵ Гьа им Ада чаз хиве кьур эбеди уьмуьр я!

²⁶ Ибур за куьн алцурарзавайбурукай кхьизва.

²⁷ Квекай лагьайтӀа, Адавай къачур нуьсрет квехъ амукьда ва гьавиляй квез са ни ятӀани са вуч ятӀани чирунин игьтияж авач. Аксина, Адан и нуьсретди квез гьар са затӀ чирзава ва им тапарар туш, гьакъикъат я. Гьавиляй, и паюни квез чирайвал, Адаз талукь яз амукьа.

Аллагьдин веледар

²⁸ Гьа икӀ, чан балаяр, куьн Адаз талукь яз амукьа, Ам пайда хьайила чахъ жуьрэт жедайвал, Адан вилик чаз регъуь тежедайвал.

²⁹ Квез ам гьахъ-михьи кас тирди чизватӀа, а карни чир хьухь хьи, гьахъ-михьи крар ийизвай гьар са кас Адан велед я.