1-Петру 5 - Пак Калам

ЧӀехибуруз ва иманийриз несигьатар

¹ Жув чӀехиди ва Месигьдин азабрин шагьид яз, гьакӀни ахъа хьун лазим тир Адан баркаллада иштиракзавайди яз, за куь чӀехибурувай тӀалабзава.

² Куь къаюмдик кутунвай Аллагьдин суьруь хуьх, адал мажбурвилелди ваъ, Аллагьдиз кӀандайвал хушуналди, усал темягькарвал аваз ваъ, гьакъисагъвилелди вил алаз хьухь.

³ Квел ихтибарнавай инсанриз зулумкарвал ийимир, амма суьруьдиз жуван кьилдин чешне къалуриз хьухь.

⁴ ГьакӀ хьайитӀа, Кьилин Чубан атайла, куьне баркалладин шуьткьуьн тийир таж къачуда.

⁵ Жегьилар, куьнни чӀехибуруз табий хьухь. Сад садахъ галаз умун хьухь, вучиз лагьайтӀа «Аллагь акси я лавгъабуруз, амма Ада умунбуруз берекат гузва».

⁶ Гьавиляй Аллагьдин мягькем гъилик куьн умун хьухь. Вахт атайла, Ада куьн хкажда.

⁷ Куь вири къайгъуяр Гьадан хиве тур, вучиз лагьайтӀа Ада куь къайгъу чӀугвазва.

⁸ Мукъаят ва уях хьухь. Куь душман, иблис, гъугъзавай аслан хьиз, гъуьрч жагъуриз кӀанз квел элкъвезва.

⁹ Имандал кӀевиз акъваз, иблисдин чӀалал фимир, рикӀел хуьх: вири дуьнья тирвал куь стхайри-вахари гьа ихьтин азабар чӀугвазва.

¹⁰ Квел са куьруь вахтунда ацалтдай азабдилай гуьгъуьниз куьн Иса Месигьдиз талукь тирвиляй, Вичин эбеди баркалладихъ эверай Аллагьди, гьар са берекатдин чешмеди, куьн кӀвачел ахкъалдарда, квез къуватни, уьтквемвални, мягькемвал гуда.

¹¹ Вири гьукум эбеди яз Гьаданди хьурай, амин!

Эхиримжи саламар

¹² Руьгь кутаз ва, за квез вуч кхьенатӀа, гьам Аллагьдин гьакъикъи берекат тирдакай шагьидвал ийиз, вафа гвай стха яз гьисабзавай Силаван куьмекдалди за квез и куьруь чар кхьена. Гьа берекатдал кӀевиз акъваз.

¹³ Бабилда авай иманийрин кӀватӀалди, гьа куьн хьиз хкянавайда, ва зи хва Марка квез саламар лугьузва.

¹⁴ Муьгьуьббатдин темендивди сада садаз саламар це. Иса Месигьдихъ иман ийизвай квез виридаз саламатвал хьурай.