1-Петру 3 - Пак Калам

Итимарни папар

^1-2 Папар, куьнни куь гъуьлерин чӀалал алаз хьухь. Итимрикай са бязибур Аллагьдин Гафуниз табий тахьайтӀа, куьн чӀалаз килигзавайвал ва куь михьи уьмуьр акваз, чпин папарин ахлакьдалди абур гаф галачизни Аллагьдиз муьтӀуьгъ жедайвал ая.

³ Куь иервал винел патанди тахьурай. Ам чӀарар кӀалубда тунилай, къизилрилай ва иер алукӀунрилай аслуди ваъ,

⁴ рикӀин къене авай терг тежедай муьтӀуьгъни секин руьгьдин иервал хьурай. Аллагьди ихьтин иервилиз къимет гузва.

⁵ И саягъда алатай вахтара Аллагьдик умуд кутазвай Адаз талукь папари чпин гъуьлериз муьтӀуьгъ хьуналди чеб иер ийидай.

⁶ ИкӀ Сарра Ибрагьиман чӀалаз килигдай ва адаз «Агъа» лугьудай. Хъсанвал авуналди ва са куьникайни кичӀе тахьуналди, квекай Саррадин рушар хьанва.

⁷ Гьа и саягъда, гъуьлер, куьн куь папарив гъавурда акьуналди, зайифбурув хьиз эгечӀа. Уьмуьр квез ирс яз ганвай савкьват тирди гьабурузни ганвайди чиз, абуруз гьуьрмет ая. Гьа чӀавуз куь дуьайрин вилик пад са куьнини кьадач.

Гьахъ-михьивиляй азабар чӀугун

⁸ Эхирки, сад садахъ галаз меслятда аваз уьмуьр твах, сада садан рикӀикай хабар яхъ, садаз сад, стхайриз хьиз, кӀан хьухь, мергьемет авайбур ва жув вине такьадайбур хьухь.

⁹ Писвиляй писвал ийимир, намусдик хкуьрунай намусдик хкуьрмир, акси яз, хийир-дуьа ая, вучиз лагьайтӀа куьн и кар патал тайинарнава, квез ирсинай хийир-дуьа акъатдайвал авунва.

¹⁰ Кхьенва: «Уьмуьрдал ашукь яз, хъсан йикъар акваз кӀанзавайда хвена кӀанда писвиликай вичин мез, вичин сив хвена кӀанда рахунрикай фендигар.

¹¹ Къуй ам яргъаз хьурай писвиликай, ийиз хьурай хъсанвал, жагъуриз хьуй ислягьвал ва ялрай адахъди,

¹² вучиз лагьайтӀа Реббидин вилер гьахъ-михьибурал алазва, Адан япар ахъа я абурун дуьаяр патал, амма писвалзавайбуруз акси я чин Реббидин».

¹³ Куьн хъсанвал ийиз алахъайтӀа, квез ни писвал ийида?

¹⁴ Амма куьне гьахъ-михьивал патал азаб чӀугвазватӀа, куьн бахтавар я. Абурухъай кичӀе жемир, са куьнини квек кичӀ кутун тавурай,

^15-16 куь рикӀера Ребби Месигьдиз икрам ая. Куь умуддикай хабар кьадайбуруз умунвилелди ва гьуьрметдивди жаваб гуз датӀана гьазур хьухь. Куьне куь виждан михьиз хуьх. Квекай фитне ийизвайбуруз ва Месигьдалди тир куь къени ахлакьдиз тегьне ийизвайбуруз регъуь жедайвал ая.

¹⁷ ИкӀ хьун Аллагьдин къаст ятӀа, пис крар авуна азаб чӀугунлай къени крар авуна азаб чӀугун хъсан я.

¹⁸ ГьикӀ лагьайтӀа, куьн Аллагьдин патав гъун патал, гьахъ-михьи тир Месигьдини, гьахъ-михьи туширбурун паталай, гунагьрай са гъилера азаб чӀугунай. Адан Беден кьиникьик кутунай, амма Адан Руьгьдал чан хканай.

^19-20 А Руьгьда аваз Ам Нуьгьан йикъара чеб са мус ятӀани муьтӀуьгъ туширбур яз къалурайбурун патав фена, къазаматда авай и руьгьериз вязер авуна. Нуьгьа гими туькӀуьрзавай йикъара Аллагьди абур сабурдивди вилив хуьзвай, амма гимида анжах муьжуьд кас акьахнай ва Ада абур ядаландай фидайла хилас авунай.

²¹ Им исятда куьн хилас ийизвай кардин – цик акахьун къачунин лишан я. Цик акахьун къачун – им бедендилай чуьхвена чирк алудун туш, Иса Месигьдал чан хтунин куьмекдалди михьи виждан гун патал ийизвай тӀалабун я.

²² Ам цавариз хкаж хьана, Аллагьдин эрчӀи гъилихъай гала, ва Адаз малаикар, гьукумар ва къуватар табий хьанва.