1-Петру 2 - Пак Калам

¹ Гьа икӀ, куьн гьар гьихьтин хьайитӀани писвилерикай, тапаррикай, кьве чин хьуникай, пехилвилерикай ва фитнейрикай азад хьухь.

^2-3 Гила куьне рикӀивайни Реббидихъ регьим авайди гьисснаваз хьайила, цӀийиз ханвай аялри хьиз, Руьгьдин михьи некӀедихъ яла, куьн, ам хъваз, чӀехи жедайвал ва хилас хьун патал чрадайвал ая.

Чан алай ибадатхана

⁴ Куьн Адан, яни инсанри инкарнавай, амма Аллагьди Вичиз багьа яз хкянавай чан алай Къванцин патав атайла,

⁵ Иса Месигьдин куьмекдалди Аллагьдиз хуш руьгьдин къурбандар авун патал квекай пак хахамар жедайвал, къуй квекай, чан алай къванерикай хьиз, Руьгьдин ибадатхана эциграй.

⁶ Каламдани кхьенва: «Ингье За Сигьан шегьерда эцигзава хкянавай ва мас авай пипӀен къван. Адахъ иман ийизвайдаз са чӀавузни регъуь жедач» .

⁷ Гьа икӀ, и къван имандал алай куьн патал мас авайди я. Амма иман тийизвайбуруз Ам «эцигзавай устӀарри кваз такьур къван я, амма вичикай пипӀе твадай къван хьайи»,

⁸ «Къван я, вичихъ галкӀидай кӀвач, раг я, вич себеб яз абур алукьдай». Гафуниз яб тагузвайвиляй абурун кӀвач галкӀизва. Абур патал Аллагьдиз гьакӀ хьана кӀанзава.

⁹ Куьн лагьайтӀа, хкянавай тухум я, Пачагьдин хахамар я, пак халкь я, Аллагьдиз талукь, Адан чӀехи крарикай хабар гун патал хкянавай инсанар я. Ада квез мичӀивиляй Вичин аламатдин экуьниз эвернава.

¹⁰ Квекай, виликдай халкь туширбурукай, гила Аллагьдин халкь хьанва. Виликдай куьн регьимдикай хкатнавай, гила лагьайтӀа, квез регьим авунва.

Иман гваз уьмуьр тухун

¹¹ КӀанибур, и дуьньяда къурабаярни сияпурар хьиз уьмуьр тухузвай квез за тагькимзава, куь руьгьдин аксина дяве тухузвай куь усал гьевесрин кьенерра гьатмир.

¹² Иман гвачирбурун юкьва жува жув хъсан тухуналди кьил хуьх. Куьн залумар яз къалуриз, квел буьгьтен вегьизвайбуруз куь хъсан крар аквадайвал ва Ам хкведай юкъуз абуру Аллагьдиз шукурар ийидайвал ая.

Гьакимрин ва гьукумдин чӀалаз килигун

¹³ Инсанри эцигнавай гьихьтин хьайитӀани гьукумдиз Аллагьдин хатурдай табий хьухь, кӀантӀа ам виридалайни вине авай пачагь хьурай,

¹⁴ кӀантӀа писвал ийизвайбуруз жаза гун патал ва хъсанвал ийизвайбурун тариф авун патал пачагьди тайинарнавай сердерар хьурай.

¹⁵ Аллагьдиз кӀанзавайди куьне, хъсанвилер ийиз, ахмакь инсанрин авам ихтилатар акъвазарун я.

¹⁶ Куьне куь уьмуьр азад инсанри хьиз твах, анжах, килиг гьа, куь азадвал писвилиз къаюмвал ийизвайди тахьурай, амма Аллагьдин лукӀари хьиз уьмуьр твах.

¹⁷ Виридаз гьуьрмет ая, куь кӀватӀалда авай стхаярни вахар кӀан хьухь, Аллагьдихъай кичӀе хьухь ва пачагьдиз гьуьрмет ая.

¹⁸ ЛукӀар, гьар жуьредин гьуьрметар авунивди, жуван иесийриз табий хьухь, анжах са регьим авайбуруз ва мергьемет авайбуруз ваъ, гьакӀ инсаф течидайбурузни.

¹⁹ Са ни ятӀани, нагьахъдиз азаб чӀугваз, Аллагьдин хатурдай намусдивди хажалатар эхзаватӀа, им тариф авуниз лайих кар я.

²⁰ Квевай хьайи са хатадай куьн гатадай чӀавуз куьне эхзаватӀа, идай квез вуч баркалла къведа? Амма куьне хъсан кар патал азаб чӀугвазватӀа ва и кар сабурдивди эхзаватӀа, Аллагь квелай рази я.

²¹ ИкӀ авун патал квез эвер ганвай, вучиз лагьайтӀа Месигьдини куьн паталди азабар чӀугунай. ГьакӀ хьайила Адан геле аваз фин патал Ада квез Вич чешне яз туна.

²² «Ада гунагь авуначир, Адан мецел хьаначир са фендигарвални» .

²³ Ам русвагь ийидайла, Ада жаваб гузвачир алчахвилериз; азабар чӀугваз, Ада гьелягьар кьазвачир, амма адалат гваз дуван Ийизвайдал вич михьиз ихтибарзавай.

²⁴ Ада Вичин Беденда аваз чи гунагьар хашунал хкажна, чун гунагь патал кьенвайбур ва гьахъ-михьивал патал чан алайбур я лагьана. Адан хирералди куьн дири хъувуна.

²⁵ ГьикӀ лагьайтӀа куьн рехъ квахьнавай хипер хьиз авай, амма гила куьн куь Чубандихъ ва куь руьгьер Хуьзвайдахъ элкъуьрнава.