1-Каринфвийриз 9 - Пак Калам

Иса Месигьдин илчи яз, Павела вич масадбур патал муьтӀуьгъарун

¹ Зун азад тушни кьван? Зун илчи тушни бес? Заз чи Ребби Иса акуначни бес? Реббидин жигьетдай куьн арадиз атун зи кар тушни кьван?

² Масадбур патал зун илчи туштӀани, куьн паталди зун илчи я! Куьн Реббидихъ галаз хьун зи илчивал тестикь авун я.

³ Зун айибзавайбуруз зи суалар ихьтинбур жеда.

⁴ Чаз недайдини хъвадайди кьабулдай ихтияр авачни бес?

⁵ Муькуь илчийри, Реббидин стхайри ва Кифади хьиз, жувахъ галаз имандаллай жуван пабни тухудай ихтияр чаз авачни кьван?

⁶ Я тахьайтӀа жуваз недайди гъилиз гъун лазим тирбур анжах зунни Барнаба яни?

⁷ Вичин аскервилин къуллугъдихъ галаз алакъада авай харжар гьи аскерди ийизва кьван? ЦипицӀбагъ кутуна, ахпа анай ципицӀар тинедайди вуж я? Нехир хуьз, адакай нек тахъвадайди вуж я?

⁸ Ибур за анжах инсандиз хас кьатӀунрай лугьузвай гафар яни кьван? Къанундини гьадакай лугьузвачни бес?

⁹ ГьикӀ лагьайтӀа, Мусадин Къанунда кхьенва: «Юг гатазвай яцран сив кӀевмир». Аллагьдин фикирда авайди яц яни?

¹⁰ Им Ада чакай лугьузвачни мегер! Гьелбетда, чун паталди икӀ кхьенва: «Цан цазвайда цан цана кӀанда, юг гатазвайда юг гатана кӀанда ва гьарда бегьердикай вичин пай къачуда лагьана умудна кӀанда».

¹¹ Чна куь арадиз руьгьани тум вегьенватӀа, чна квелай агьвал галай бегьер къачуртӀа, им кьадардилай артухан кар жезвани кьван?

¹² Масадбуруз куь патай куьмек кӀан жедай ихтияр аватӀа, чаз гьабурулайни гзаф ихтияр ава. ЯтӀани чна и ихтиярдикай менфят къачуначир, Месигьдин Шад Хабар чи патай са манийвални авачиз чукӀун патал, чун вири эхиз гьазур я.

¹³ Ни Аллагьдин КӀвале ибадат ийизватӀа, гьадаз кьил хуьн патал лазим затӀар Аллагьдин КӀвале агакьзавайди квез чизвачни кьван? Ни къурбангандив ибадат ийизватӀа, гьадаз къурбанд авунвайдакай пай къвезвайди квез чизвачни кьван?

¹⁴ Гьа икӀ Реббиди ни Шад Хабардикай муштулухар гузватӀа, адаз и кардай лазим затӀарни гурай лагьана эмирни авунва.

¹⁵ Амма за и ихтияррикай садакайни менфят къачунач, гилани за куьне заз гьахьтин куьмек гун паталди кхьизвайди туш. Тариф квадарунилай заз кьейитӀа хъсан я.

¹⁶ За Шад Хабардикай муштулухар гузва лугьуз дамахарзавач, им зи буржи я, за Шад Хабардикай муштулухар гун техъйиз хьайитӀа, заз жедайди гуж я!

¹⁷ За и кар жува хкяна ийизвайди тиртӀа, завай и кардай къазанжини къачуз жедай, амма и кар за жуван буржи яз ийизва, вучиз лагьайтӀа и тапшуругъ заз Аллагьди ганва.

¹⁸ Зи къазанжи куькай ибарат я? Ам адакай ибарат я хьи, Шад Хабардикай муштулухар гуз, за и кар гьакъи авачиз ийизва ва заз Шад Хабар гуникай за са менфятни къачузвач.

¹⁹ Зун виридакай азад ятӀани, жезмай кьван гзаф инсанар Аллагьдихъ элкъуьрун патал за жувакай вирибурун лукӀ авунва.

²⁰ Чувудар желб авун патал, закай чувудар патал чувуд хьтинди хьана. Зун Къанундик квачирди ятӀани, Къанундик квайбур патал зун Къанундал амалзавайди яз хьана.

²¹ Зун Месигьдин къанундик хьун себеб яз Аллагьдин къанундикай зун азад туштӀани, Къанун авачирбур Аллагьдихъ элкъуьрун патал закай абуруз Къанун авачир хьтинди хьана.

²² Зайифбурни чӀалал гъидайвал, закай зайифбур патал зайифди хьанва. Гьич тахьайтӀа, са кьадар кьванбур хьайитӀани хиласун патал, закай вири патал вири хьана.

²³ И вири крар за Шад Хабардин хатурдай ва адан хийир-дуьаяр къачун патал ийизвайди я.

²⁴ Квез чизвачни кьван: звер авунин акъажунра иштиракзавайбур гзаф, амма гъалибдар сад жеда? Гьавиляй савкьват къачуз жедайвал звер ая.

²⁵ Гьар са иштиракзавайда акъажунриз гьазур жезвай чӀавуз вири затӀарилай гъил къачуда, икӀ ада пуч жедай таж къачун патал ийизва. Чун лагьайтӀа, пуч тежедай тажунихъ физ алахъзава.

²⁶ Гьавиляй за макьсад авачиз зверзавач ва гьава гъутарив язавач.

²⁷ Ваъ, масадбуруз Шад Хабардикай муштулухар гудай чӀавуз зун жуван дережадай вегьин тавун патал, за жуван беден лигимарзава ва за ам жуваз табий ийизва.