1-Каринфвийриз 6 - Пак Калам

Иман гвайбурун арада дувандин силисар

¹ Куь кар Аллагьдиз талукьбуру гьялнайтӀа кӀандай. Идан чкадал куь гьуьжетар иман гвачир ксарикай ибарат дуванханадив гьялиз куьне вуч лагьана тазва?

² Дуьньядин дуван Аллагьдиз талукьбуру ийидайди квез чизвачни кьван? Инлай кьулухъ дуьньядин дуван авун куь хиве аватӀа, бес квевай куьлуь-шуьлуь кӀвалахар гьялиз жедачни?

³ Чна малаикрин дуванни ийидайди квез чизвачни бес? Чи гьар йикъан къайгъуйрай чавай кьил акъудиз жедачни мегер?

⁴ Амма вучиз куьне ихьтин месэлаяр гьялун куь кӀватӀалдик акат тийизвай ксарин ихтиярда твазва?

⁵ Квез регъуь тушни! Куь юкьвай иманийрин арада авай гьуьжетар гьялиз жедай хьтин акьул авай инсан жагъидачни кьван?

⁶ Амма куьне сада сад дувандиз вугузва, ва гьатта иман гвачирбуру куь дуван ийизва!

⁷ Гьич тахьайтӀа, куьне сада сад дувандиз вугун – куьн паталди михьиз магълубвал я. Зиян хьайибур яз амукьун мадни хъсан тушни? Алцур хьайибур яз амукьун генани хъсан тушни?

⁸ Амма куьне гьатта куь стхаяр-вахар алцурни ийизва, абурувай чуьнуьхни ийизва.

⁹ Гьахъ авачирбуруз Аллагьдин Пачагьлугъ ирс яз акъат тийидайди квез чизвачни кьван? Килиг гьа, куьн алцур жедайвал тахьурай. Са явабурузни, са бутпересризни, гъуьлуьн-папан вафа чӀурзавайбурузни, чпи чпиз гъуьл-пабвалзавай итимризни папаризни,

¹⁰ угърийризни, темягькарризни, хъвадайбурузни, фитнекарризни, къачагъризни Аллагьдин Пачагьлугъ ирс яз акъатдач.

¹¹ Квекай, лагьайтӀа, са бязибур анжах гьа гьахьтинбур тир, амма куьн Ребби Иса Месигьдин ТӀварцӀелди ва чи Аллагьдин Руьгьдалди чуьхвена михьнай, пак ва гьахъ авунай.

Беден – Пак Руьгьдин кӀвал

¹² Куьне лугьузва: «Заз вири ихтиярар ава». Эхь, амма виридакай хийир авач. «Заз вири ихтиярар ава», амма зал са куьнинни гьукум хьун лазим туш.

¹³ Куьне мадни лугьузва: «Хук – тӀуьн паталди я, тӀуьнни – хук паталди, амма Аллагьди имни, амни терг ийида». Эхь, амма беден явавал авун паталди ваъ, Аллагьдиз къуллугъ авун паталди тайинарнавайди я, Аллагьдини бедендиз вуч лазим ятӀа гьам гузва.

¹⁴ Аллагьди Вичин къуватдалди Реббидал чан хкана, чални чан хкида.

¹⁵ Квез куь беденар Месигьдин Бедендин паяр тирди чизвачни мегер? ГьакӀ хьайила квез Месигьдин Бедендин паяр къагьбедин бедендин паяриз элкъуьриз кӀанзавани? АкӀ жедач!

¹⁶ Къагьбедихъ галаз сад хьайиди адахъ галаз са беден жезвайди квез чизвачни кьван? ГьикӀ лагьайтӀа, кхьенва эхир: «Кьведакай са жендек жеда».

¹⁷ Реббидихъ галаз сад хьайиди Адахъ галаз са руьгь жезва.

¹⁸ Гьашервиликай катиз хьухь. Инсанди ийизвай маса гунагьар вичин бедендихъ галаз алакъада авайбур туш, амма гьаяйрин явавал ийизвайда жуван бедендиз зиян гузва.

¹⁹ Куь беден квек квай ва куьне Аллагьдивай къачунвай Пак Руьгьдин кӀвал тирди квез чизвачни кьван? Куьн квез талукь яз авач,

²⁰ вучиз лагьайтӀа куьн багьа къимет гана къачунва. Гьавиляй куь беденралди Аллагьдиз шукурар ая.