1-Каринфвийриз 5 - Пак Калам

КӀватӀалда явавилиз рехъ гумир

¹ Куь арада гьич мажусийрихъни тежедай хьтин явавилер жезва лугьуз ванер къвезва; квекай сада вичин бубадин папахъ галаз уьмуьр тухузвалда.

² Куь кьама лагьайтӀа, ял гьатнава! Ихьтин чкадал квез пашман хьун ва ихьтин кар авур кас куь арадай акъудун кутугнавачни?

³ Зун бедендалди квехъ галачтӀани, амма руьгьдалди квехъ гала ва куьне а касдиз вуч авун лазим ятӀа за, квехъ галайда хьиз, къарар кьабулнава:

⁴ чи Ребби Иса Месигьдин ТӀварцӀелди куьн санал кӀватӀ хьайи береда ва зун руьгьдалди квехъ галаз авайла ва чахъ галаз чи Ребби Месигьдин къуват жедай чӀавуз,

⁵ а касдин руьгь Къияматдин юкъуз хилас хьунин хатурдай адан беден чукӀун патал, куьне а кас иблисдив вугун лазим я.

⁶ Квез дамахдай са карни авач. Са тӀимил гъварци вири тинидик гъвар кутадайди квез чизвачни мегер?

⁷ Гъвар квачир цӀийи тини хьун патал, куьгьне гъвар, яни куьгьне гунагьар квай тӀебиат, гадара, куьн гьахьтинбур язни я, гьикӀ лагьайтӀа, чи Песагьдин кӀел хьайи Месигь къурбанд авуна алатнава эхир.

⁸ Гьавиляй ша чна рехнейринни писвилин куьгьне гъвар квай фалди ваъ, михьивилинни гьакъикъатдин гъвар квачир фалди сувар кьиле тухун.

⁹ За зи чарче квез явабурухъ галаз жемир лагьана кхьенай,

¹⁰ амма зи фикирда авайбур санлай и дуьньядин вири явабур ва я темягькарар, къачагъар ва я бутпересар тушир. Ихтилат гьабурукай физвайтӀа, куьн и дуьньядилай хъфин лазим жедай.

¹¹ Амма за квез, вичиз стха лугьуз, гьакъикъатда вич явади, темягькар, бутперес ва я фитнебаз, хъвадайдахъ ва къачагъдихъ галаз тахьуникай кхьизва. Ахьтин касдихъ галаз гьич фуни немир.

^12-13 Иманийрин кӀватӀалдилай къеце авайбуруз къимет гун зи кар яни кьван? КӀватӀалдилай къеце авайбуруз къимет Аллагьди гуда. «Пис кас куьне куь арадай акъуд», – лагьана кхьенва. Иманийрин кӀватӀалда авайбуруз куьне гьа саягъда къимет гузвачни кьван?