1-Каринфвийриз 3 - Пак Калам

Иман гвайбурун кӀватӀал пайи-паяр хьун

¹ Гьа икӀ, стхаяр-вахар, завай квев Аллагьдин Руьгь квай инсанрив хьиз рахаз жезвачир, амма квев зун цӀуру гунагькар тӀебиатдин гьукумдик квай инсанрив хьиз, Месигьдихъ иман авунин рекье бицӀекар яз амайбурув хьиз рахаз хьанай.

² Чирвал яз за квез кӀеви тӀуьн ваъ, нек ганай, вучиз лагьайтӀа квелай кӀеви тӀуьн кьабулиз алакьзавачир, квелай гилани а кар алакьзавач,

³ гьикӀ лагьайтӀа, куьн виликдай хьиз гунагькар тӀебиатдин гьукумдик кума. Куь арада пехилвални гьуьжетар амай кьван гагьда куьн виликан инсанар яз амукьзавачни кьван? Ва куьне куьн и дуьньядин инсанри хьиз тухузвачни кьван?

⁴ Сада: «Зун Павелан терефдар я» ва муькуьда: «Зун – АпӀаласан терефдар я» лугьузвайла, куьн амайбурулай квелди чара жезва кьван?

⁵ АпӀалас вуж я кьван? Павелни вуж я кьван? Абур Аллагьдиз къуллугъзавайбур я, абурун куьмекдалди куьне Месигьдихъ иман авуна. Абурукай гьар сада чпиз Реббиди ая лагьай тайин кар ийиз хьана.

⁶ За цана, АпӀаласа яд гана, амма чӀехи авурди Аллагь я.

⁷ Гьавиляй я цазвайдини, я яд гузвайдини са затӀни туш, авайди анжах цайиди чӀехи ийизвай Аллагь я.

⁸ Цазвайдани яд гузвайда ийизвайди са кар я, гьар сада вичин зегьметдин паюнай гьакъини къачуда.

⁹ ГьикӀ лагьайтӀа, чун кьведни Аллагьдихъ галаз са кар ийизвайбур я, куьн чун паталди Аллагьдин ник я, Адан имарат я.

¹⁰ Аллагьди заз ганвай берекатдив кьурвал, за, камал авай устӀарди хьиз, бине эцигна, са масада эцигунин кар давамарда. Гьар сад вичи гьикӀ эцигзаватӀа килиграй.

¹¹ Садавайни эцигнавай бинедилай гъейри маса бине эцигиз жедач, а бине Иса Месигь я.

¹² И бинедал инсандивай къизилдикай, гимишдикай, багьа къашарикай, кӀарасдикай, алафдикай ва я самарикай эцигиз жеда,

¹³ ни гьикӀ эцигнатӀа малум жедай югъни алукьда. А юкъуз вири цӀалди синагъ ийида, гьар садан кӀвалахдин ери цӀу къалурда.

¹⁴ Эцигнавай затӀ чукӀун тавуртӀа, эцигайдав вичин гьакъи агакьда;

¹⁵ кайитӀа, адан гьакъи квахьда. Ам вич лагьайтӀа, цӀукай хилас хьайиди хьиз, хилас жеда.

¹⁶ Куьн Аллагьдин кӀвал тирди ва квек Аллагьдин Руьгь квайди квез чизвачни кьван?

¹⁷ Са ни ятӀани Аллагьдин кӀвал чукӀурайтӀа, ам вич Аллагьди чукӀурда, вучиз лагьайтӀа Аллагьдин кӀвал пак я, Адан кӀвал лагьайтӀа, ам куьн я.

¹⁸ Куьне куьн алцурармир, квекай са ни ятӀани вичихъ и дуьньядин фагьумрай камал ава лагьана фикирзаватӀа, ам рикӀивайни камал авайди хьун патал «ахмакь» хьун лазим я.

¹⁹ ГьикӀ лагьайтӀа, и дуьньядин камал Аллагьдин вилерай ахмакьвал я. ИкӀ кхьенва: «Ада камал авайбур абурун чпин амалдарвиливди кьазва»,

²⁰ ва мад: «Камал авайдан фикирар анжах челек-фелек тир чӀал Реббидиз чизва».

²¹ Гьавиляй инсанралди дамахармир. Вири куьбур я:

²² кӀандатӀа Павел ва я АпӀалас ва я Кифа ва я и дуьнья, уьмуьр ва я ажал ва я алай вахт ва я къвезмай вахт хьурай – вири куьбур я,

²³ куьн лагьайтӀа, Месигьдинбур я, Месигьни – Аллагьдинди.