1-Каринфвийриз 2 - Пак Калам

Павел Каринфдиз идалай виликни атун

¹ Стхаяр-вахар, зун куь патав атана Аллагьдин сирдикай лагьай чӀавуз, зи гафар я иервилелди, я са кьетӀен камалдалди тафават авайбур тушир.

² Куь арада аваз, за Иса Месигьдилай, Вични хашуниз янавайдалай, гъейри, мад са затӀни чир тахьун кьетӀна.

³ Зун куь патав зайиф яз, гьуьрметдивди ва рикӀик зурзун кваз атанай.

^4-5 Куь иманди инсандин камалдал ваъ, Аллагьдин къуватдал бине кьун патал, зи хабарни зи вяз инсандин камалдалди алакьардай гафарикай ваъ, Руьгьдин къуват аквадайвал субут авуникай ибарат я.

Аллагьдин камалдикай

⁶ Чна камалдикай руьгьдин рекьяй чранвайбурун арада хабар гузва, амма им и дуьньядин ва чеб фад-геж са затӀни туширвилиз элкъведай и дуьньядин гьукумдаррин камал туш.

⁷ Ваъ, икьван чӀавалди далдадик кумаз хьайи, амма дуьнья халкь тахьанмаз, лап сифтедилай чи баркалла патал тайинарнавай Аллагьдин камалдикай рахазва чун.

⁸ И дуьньяда гьукум гъиле авайбур а камалдин гъавурда акьунач, масакӀа тиртӀа абуру баркалладин Ребби хашуниз ядачир.

⁹ Амма кхьенва: «Аллагьди Вич кӀандайбуруз вуч гьазурнаватӀа вилиз акунач, япуз ван хьанач, я рикӀелни атанач» .

¹⁰ И кар Аллагьди Руьгьдин куьмекдалди чаз ачухарна, вучиз лагьайтӀа Руьгьди вири затӀар тупӀалай ийизва, Ада гьакӀни Аллагьдин деринарни чирзава.

¹¹ Инсандин къеневайди, адак вичик квай руьгьдилай гъейри, мад низ чизва? Гьа саягъда Аллагьдин къеневайдини, Аллагьдин Руьгьдилай гъейри, садазни чизвач.

¹² Чаз гьатайди и дуьньядин руьгь ваъ, чаз Аллагьди багъишнавай кьван виридан гъавурда чун акьун паталди ганвай, Аллагьдилай атанвай Руьгь я.

¹³ Идакай чна инсандиз хас камалдин гафаралди ваъ, Руьгьди чаз чирнавай гафаралди лугьузва. Чна руьгьани гьакъикъатар чаз Руьгьди чирзавай гафаралди ачухарзава.

¹⁴ Руьгь авачир инсанди Аллагьдин Руьгьдилай къвезвайди кьабулзавач. Ада им ахмакьвал яз гьисабзава ва адавай гъавурда акьаз жезвач, вучиз лагьайтӀа идакай анжах Руьгьдалди веревирд ийиз жеда.

¹⁵ Руьгь авай инсандивай виридакай веревирд ийиз жеда, адакай вичикай са касдивайни веревирд ийиз жедач,

¹⁶ вучиз лагьайтӀа кхьенва: «Нивай жеда Аллагьдиз тарсар гуз? Вуж агакьда Аллагьдин акьулдив?» Чаз лагьайтӀа, Месигьдин акьул ава.