1-Каринфвийриз 16 - Пак Калам

Сиягьатар авунин ниятар

¹ Гила Месигьдиз талукьбур патал пул кӀватӀуникай. ГалатӀдин иманийрин кӀватӀалра за вуч ая лагьанатӀа, гьам ая.

² Гьяд юкъуз квекай гьар сада жуван мажибдикай нивай гьикьван жедатӀа, пул кьилди эциг, зун атайла пул кӀватӀун лазим тежедайвал.

³ Зун атай чӀавуз за куьне хкядай ксар, абурун гьакъиндай хъсан къимет гузвай чарарни галаз, куьне кӀватӀай пул Ярусалимдиз агакьарун патал ракъурда.

⁴ Аниз зунни финиф кӀан хьайитӀа, зун абурухъ галаз фида.

⁵ Зун куь патав, МакӀедандилай кьулухъ къведа. Зун МакӀедандай яна къвезва.

⁶ Зун са кьадар вахтунда, мумкин я, вири кьуьдди куь патав гумукьда, ва куьне заз адалай гуьгъуьнизни сиягьат ийиз куьмекда.

⁷ Заз кӀанзавайди фидай рекье гьакӀ квел са кьил чӀугун туш, Аллагьди гайитӀа, за куь патав гзаф вахтунда гумукьуник умуд кутазва.

⁸ Эфесда зун ЯхцӀурни цӀуд лагьай йикъан суваралди амукьда,

⁹ вучиз лагьайтӀа ина, гзаф душманар аватӀани, заз, бегьер галаз ибадат авун патал рак гегьеншдиз ачух я.

¹⁰ Куь патав ТӀиматӀей хьайитӀа, адаз са куьникайни хата тахьунин паталай къайгъу чӀугу. Адани, за хьиз, Реббидин кӀвалах кьилиз акъудзава эхир.

¹¹ Къуй адаз садни виняй килиг тавурай. Ахпани, ам зи патав хтун патал, адаз секиндаказ рекье гьатиз куьмек це. За ам стхаярни галаз вилив хуьзва.

¹² Чи стха АпӀаласакай лагьайтӀа, за адавай стхаярни галаз куь патав атун гзаф тӀалабнай. Адаз сакӀани исятда къвез кӀанзавачир, амма мумкинвал хьайи чӀавуз ада квел кьил чӀугвада.

¹³ Уях хьухь! Иманда кӀевиз акъваз! ВикӀегь хьухь, къуват аваз хьухь.

¹⁴ Къуй куь вири крар муьгьуьббатдивди ийизвайбур хьурай.

¹⁵ За квевай тӀалабзава, стхаяр-вахар: Истефас ва адан кӀвалевайбур Ахайда имандал атайбурукай сифтегьанбур тирди квез чизва. Абуру чеб Аллагьдиз талукьбуруз къуллугъ авуниз бахшнава –

¹⁶ ахьтин ксаризни ибадат ийизвайбуруз ва иманийрин кӀватӀалда къуллугъзавай вирибуруз муьтӀуьгъ хьухь.

¹⁷ Истефас, ФартӀун ва Ахайик атай чӀавуз зун гзаф шад хьанай. Абуру заз куьн галачиз заз вуч бес жезвачтӀа гьам гана.

¹⁸ Абуру зунни, куьнни секинарна. Ахьтин инсанрин къадир чир хьухь.

Эхиримжи саламар

¹⁹ Асия вилаятда авай иманийрин кӀватӀалрини квез саламар лугьузва. Акуьлан, ПрискӀадин ва абурун кӀвале кӀватӀ жезвай кӀватӀалдин патайни квез, Месигьдиз талукь ксариз, чими саламар.

²⁰ Инавай вири стхайри-вахари квез саламар ракъурзава. Пак темендалди сада садаз салам це.

²¹ За, Павела, квез и саламар жуван гъилелди кхьизва:

²² са низ ятӀани Ребби кӀанзавачтӀа, гьадаз лянет хьурай. Чи Ребби, хъша!

²³ Къуй Ребби Исадин берекат квехъ галаз хьурай.

²⁴ Зи муьгьуьббат Иса Месигьда авай квехъ галаз хьурай. Амин.