1-Каринфвийриз 12 - Пак Калам

Руьгь – сад, паяр – гзаф

¹ Гила, стхаяр-вахар, ша чун Руьгьдин паярикай рахан. Заз куьн абурукай хабар авачиз амукьна кӀанзавач.

² Куьн мажусияр тир чӀавуз квез са куь ятӀани лал бутар галайнихъ рум гайиди куь рикӀел алама.

³ Гьавиляй гъавурда акьукь: Аллагьдин Руьгьди гьевес кутунваз рахазвай садани «Исадиз лянет хьурай», – лугьудач, ва садани «Иса Ребби я», – лагьана хиве кьадач, икӀ лугьун патал адак Пак Руьгьди гьевес кутун тавуртӀа.

⁴ Паяр гьар жуьрединбур ава, амма Руьгь гьа сад я.

⁵ Везифаярни гьар жуьрединбур ава, амма Ребби гьа сад я.

⁶ Гьерекатар гьар жуьрединбур ава, амма абур гьа са Аллагьди арадал гъизва.

⁷ Руьгь гьар садаз уртах кардин хийир патал винел акъатзава.

⁸ Садаз Руьгьди акьул квай ихтилатар авун гузва; муькуьдаз гьа Руьгьди чирвал агакьарун гузва;

⁹ са низ ятӀани гьа Руьгьди кьетӀен иман гузва; са низ ятӀани гьа Руьгьди дири хъхьунин паяр гузва.

¹⁰ Садаз аламатдин таъсир квай къуватар, муькуьдаз пайгъамбарвилер, пуд лагьайдаз Руьгьдилай вуч атанва-атанвач чара ийидай алакьун гузва; са масадаз течир жуьреба-жуьре чӀалар ганва, амма са низ ятӀани гьа чӀаларал лагьанвай гафарин мана ачухардай алакьун ганва.

¹¹ Ибур вири гьа са Руьгьдин гьерекатар я, Ада Вичиз кӀандайвал гьар садаз Вичин пай гузва.

Беден – сад, адан паяр – гзаф

¹² Беден гзаф паярикай ибарат тирвал, абур санал хьуни са беден тешкилзавайвал, Месигьни гьакӀ я.

¹³ Чакай са Беден хьун патал, чун вири са Руьгьда туна, кӀандатӀа чун чувудар ва я муькуьбур хьурай, лукӀар ва я азадбур хьурай, чна гьа са Руьгьдикай хъванва.

¹⁴ ГьикӀ лагьайтӀа, беденни гьа са паюникай ваъ, гзафбурукай ибарат хьанва.

¹⁵ КӀвачи «Зун бедендиз талукь туш, вучиз лагьайтӀа зун гъил туш!» – лагьайтӀа, гьавиляй тушни кӀвач бедендин пай тирди?

¹⁶ Япу «Зун вил туш, ва гьавиляй зун бедендиз талукь туш!» – лагьайтӀа, гьавиляй тушни яб бедендин пай тирди?

¹⁷ Вири беден са виликай ибарат тиртӀа, бес чаз гьикӀ ван къведай? Вири беден са япукай ибарат тиртӀа, ни гьикӀ къведай?

¹⁸ Амма Аллагьди Адаз Вичиз кӀандайвал бедендин гьар са паюниз вичин ийидай кӀвалах гана.

¹⁹ Тамамдиз анжах са паюникай ибарат жезвайтӀа, бедендин гьал гьикӀ жедай?

²⁰ ГьакӀ хьайила, бедендин паяр гзаф я, амма вирида са беден арадал гъизва.

²¹ Виливайни гъилиз лугьуз жедач: «Вун заз герек авач!» Кьиливай кӀвачериз лугьуз жедач: «Куьн заз герек авач!».

²² Аксина, чаз чеб амайбурулай зайиф яз аквазвай паяр гьакъикъатда виридалайни гзаф лазимбур жезва.

²³ Чи фикирдалди чпиз са акьван гьуьрметун лайих тушир паярин къайгъу чна мадни гзаф чӀугвазва. Абурдив кьан тийизвай паяр чна мукьуфдивди кӀевирзава,

²⁴ абурдив кьазвай паяр патал и кар авун герек туш. Амма Аллагьди беден а саягъда туькӀуьрнава ва и кар чи кьиле тунва хьи, чна бедендин абурдив кьан тийизвай паярин къайгъу гзаф чӀугвадайвал,

²⁵ беден пайи-паяр тежедайвал, амма сада садан къайгъу сад хьиз чӀугвадайвал авунва.

²⁶ Са паюниз азият жезватӀа, адахъ галаз амайбурузни азият жезва, са паюнин тариф ийизватӀа, адахъ галаз амайбурни шад жезва.

²⁷ Гьа икӀ куьн Месигьдин Беден я, квекай гьар сад са пай я.

²⁸ Иманийрин кӀватӀалда Аллагьди сад лагьайбур илчияр яз, кьвед лагьайбур пайгъамбарар яз, пуд лагьайбурни муаллимар яз тайинарнава. Ада садбуруз аламатар къалурдай къуват ганва, муькуьбуруз дири хъийидай алакьун пай яз ганва, садбуруз муьгьтежбуруз куьмек гун пай яз ганва, муькуьбуруз идара авун пай яз ганва, бязибуруз течир жуьреба-жуьре чӀалар ганва.

²⁹ Вири илчияр яни мегер? Вири пайгъамбарар яни кьван? Вири муаллимар яни кьван? Вирида аламатар ийизвани?

³⁰ Дири хъийидай пай виридаз ганвани кьван? Течир чӀаларалди вири рахазвани? И чӀаларин мана ачухариз виридалай алакьдани кьван?

³¹ Куьн гьабурулайни важиб авай паяр къачуз алахъзава. Амма за квез виридалайни хъсан рехъ къалурда.