1-Каринфвийриз 11 - Пак Калам

¹ За Месигьдилай чешне къачузвайвал, куьнени залай чешне къачу.

Аллагьдиз ибадат ийидай чӀавуз жува жув тухуникай

² Вири крара куьне зун рикӀел хуьнал ва куьне куьн за квез гайи адетдив кьадайвал тухунай за куь тарифзава.

³ Заз квез чир хьана кӀанзава хьи, гьар са итимдин кьил Месигь я, гьар са папан кьил – адан гъуьл я, Месигьдин кьил Аллагь я.

⁴ Итимди кьилел алаз дуьа ва я пайгъамбарвал ийизватӀа, ада вичин кьил абурдай вегьизва.

⁵ Папани кьил кӀев тавуна дуьа ва я пайгъамбарвал ийизватӀа, гьадани вичин кьил абурдай вегьизва. Им ада вичин кьил твана лагьай чӀал я.

⁶ Папа кьил кӀевзавачтӀа, къуй ада михьиз вичин чӀарар турай. Папа кьил тун ва я чӀарар атӀун беябурвал яз гьисабзаватӀа, къуй ада кьил кӀеврай.

⁷ Итимди вичин кьил кӀевна кӀандач, гьикӀ лагьайтӀа, ам Аллагьдин къамат ва Адан баркалла я. Паб лагьайтӀа, вичин гъуьлуьн баркалла я.

⁸ Итим папалай ваъ, паб итимдилай хьанвайди я.

⁹ Итим паб патал ваъ, паб итим патал халкь авунвайди я.

¹⁰ Гьавиляй малаикрин хатурдай папан кьилел гьукумдин лишан хьана кӀанда.

¹¹ ЯтӀани Реббидин вилик я паб, я итим сад садалай аслу тушиз жедач,

¹² вучиз лагьайтӀа паб итимдилай хьайивал, итимни папа ханва, амма вири Аллагьди халкьнава.

¹³ Куьне фагьума, папаз кьилел алачиз дуьа авун кутугнавани кьван?

¹⁴ Итимди яргъи чӀарар тазватӀа, им ам патал беябурвал я, чаз ацукьуни-къарагъуни гьакӀ лугьузвачни кьван?

¹⁵ Гьа са вахтунда паб патал яргъи чӀарар абур я. ГьикӀ лагьайтӀа, папаз яргъи чӀарар шаршавдин чкадал ганва.

¹⁶ Са низ ятӀани захъ галаз и кардин паталай гьуьжет ийиз кӀанзаватӀа, заз гьасятда адаз лугьуз кӀанзава: я чаз, я Аллагьдин иманийрин муькуь кӀватӀалриз маса адет авач.

Реббидин суфра кутун

¹⁷ И тагькимар гуналди, за куь тариф ийизвач лугьуз кӀанзава заз, вучиз лагьайтӀа куьн санал кӀватӀ хьунри хийирдилай гзаф зарар гъизва.

¹⁸ Сад лагьайди, куьн иманийрин кӀватӀал хьиз, санал кӀватӀ жезвай берейра куьн пайи-паяр жезва лугьуз ван хьана заз. Са патахъай зун и ванерин чӀалахъни жезва.

¹⁹ Куь арадавай фикиррин чаравални квекай вуж синагъра мягькем ятӀа къалурун патал хьун лазим я.

²⁰ Амма санал кӀватӀ жезвай берейра куьне ийизвай крариз Реббидин суфра кутунин карда иштиракун я сакӀани лугьуз жедач.

²¹ Куьне гьар сада жува гъанвайди незва, гьакӀ садбур гишила амукьзава, муькуьбуру сархуш жедалди хъвазва.

²² ТӀуьн-хъун паталди квез жуван кӀвалер авачни? Им Аллагьдин иманийрин кӀватӀал беябур авун ва чпиз недай затӀни авачирбур русвагь авун тушни кьван? За квез вуч лугьун? И кардай куь тариф ийидани? Гьелбетда, ваъ!

²³ ГьикӀ лагьайтӀа, за Реббидивай Вичивай кьабулна, квев агакьарна хьи, Иса Месигь маса гайи йифиз Ада фу гъиле кьуна

²⁴ ва ризкьи гудай дуьада шукурна, фу чӀук-чӀук авуна ихьтин гафар лагьана: «Им куь паталай гузвай Зи Беден я. Зун рикӀел хкиз гьа икӀ ая».

²⁵ Нянин тӀуьнилай кьулухъ Ада сукӀра гъиле кьуна, дуьа авуна ва лагьана: «И сукӀра Зи Ивидалди кутӀуннавай цӀийи Икьрар я. Гьар гъилера Зун рикӀел хкун патал хъвадайла, гьа икӀ ая».

²⁶ Вучиз лагьайтӀа гьар гъилера и фу недайла ва и сукӀрадай хъвадайла, куьне Ребби хкведалди Адан кьиникьикай шагьидвалда.

²⁷ Гьа икӀ, кутуг тавур саягъда фу незватӀа ва сукӀрадай хъвазватӀа, ада Реббидин Бедендин ва Ивидин аксина гунагь ийизва.

²⁸ Фу недалди ва сукӀрадай хъвадалди вилик инсанди вичи вич чиррай,

²⁹ вучиз лагьайтӀа Реббидин Бедендин метлеб кьатӀун тавуна незвай ва хъвазвай гьар сада вичиз кар кьадайвал ийизва.

³⁰ Куь арада чандин жигьетдай зайифбур ва азарри кьунвайбур гзаф авайди, гьатта рагьметдизни фенвайбур тӀимил тахьун гьавиляй я.

³¹ Чна чун синагъ ийизвайтӀа, Аллагьди чи дуван ийидачир.

³² Амма чи дуван Реббиди ийизвайла, чаз амай дуьньядихъ галаз санал кар атӀун патал, чаз тербия яз жаза гузва.

³³ Гьа икӀ, стхаяр-вахар, куьн санал нез кӀватӀ жедайла, сада сад вилив хуьх.

³⁴ Куь кӀватӀ хьунухьрай куь дуван тийидайвал, низ гишин ятӀа, къуй ада кӀвале тӀуьрай. Зун куь патав атайла, за амай крарни гуьнгуьна твада.