Yoh. 13 - Alkitab bahasa Luang

Yesus Nwuri-nohma maka ha Nwatutu-nwaye'a re lakni

¹ La'pa lerlalawna Paska nwakrian wia, de Yesus e Nat niohora de nte' olek la lerni-melli pa Nwaran la nohkeran diwa totpena Nawal lia E Amni. Yesus ed mak khi' kalwiedwed la riy mak E mutnu-rahanu la noha wawannu, me dodo'ondi lerni ntutu-nte' olek di pa Entutga E ralam kalwiedni mak karehi-kalawan de la' ira yoma hota Nmat lia ir rerieini.

² La'pa lera nheria, Yesus Nora maka ha Nwatutu-nwaye'a re ra'ana-remun rewre'wa. La' ler de, de hegana amlawanni nkar lia Yudas, Simon Iskariot a'nani de ralamni pede nwaror oleka totpena hota nwaldioin pa na'olga Yesus.

³ Yesus Natg oleka de Amni Ntutg oleka E' pa Enodi plolli la nohkerna-rai miarna. Enat niohor walia de Enwatiawu Uplerlawna pa Enmai lia nohkeran di, ne hota emkade walia Enawali owa'an la Uplerlawna.

⁴ La hade pede Entutrier pia No'lu dioinia raini plalahwani na'nama Na'ala koka mnurnuhru ida pa Nwatiehra la nehlani.

⁵ Nhor nia'nama Nhuri gera la wra'u tani id na'nama Nohma maka ha Nwatutu-nwaye'a re lakni me Nala kok maka kawniatehra la nehlani de na Naha' kerna.

⁶ La'pa Nte'ela Simon Petrus, noma Petrus natiana: “Matroma, he' nakot pa Matro'mu ed mak kohma a la'ku di?”

⁷ Noma Yesus Niwra: “La' dodo'ondi de o' edonna mnia'erit nana ma'ta hya' maka Aghi'a ri. Pena omuatga.”

⁸ Petrus niwra: “Yana Matroma. Ralul pia Matro'mu Nohma a la'ku!” Mere Yesus Nakot la Niwra: “La'pa A'g edonna gohma lakmu, de emekwalima omukleha nhiakra mai A'u.”

⁹ Noma Simon Petrus nakot la niwra: “Hademkade yan Matro'mu Nohma a la'ku to'a mere a li'mu nora a o'tu wali!”

¹⁰ Yesus Niwra: “Riy mak karoh olek inonni de rmomuog olekwa. Pede yana rohma inonmi, eneknek to'ama rohma lakmi. Miy di de miou-mpitna olekwa mere miy hononmi edonna.”

¹¹ Yesus Nakot emkade yoma Yesus Nat niohora he' ed mak kawaldioinia pa na'olga E'a. La hade pede Eniwra: “Miy miou-mpitna olekwa mere miy hononmi edonna.”

¹² Dewade Yesus Nohma ir honona lakni, nhor nia'nama Nhu'rg owa'an la raini plalahwani de na'nama Namtatna owa'ana la genni. Noma Natiana re: “Miy e mnia'erit nana maka na'nama Aghi'a tiy miy rena?

¹³ Miy e mpiolga A die tungkuru onde matroma ne hade naplola, yoma A' die de miy tungkurmi me miy matrommi.

¹⁴ Pa la'pa A' die mak kla' matroma me tungkuru tiy miy ed mak kohma miy lakmi, de hota emkade wali pia miy miana mtiutga nhiolmi mak klol yawa me mak katu khima-kre'a la rimormior wialmi pa miy idma nohma id lakni.

¹⁵ A'g ed mak ktutga loi-talan de tiy miy, totpena miy wial miana, mhi'a hya' maka Aghi' olek di tiy miy wia.

¹⁶ A li'ru ri raplola! Mimliernohora A nhio'lu di maka Aliola yawa me ghima-rie' rira, yoma miy edon mireh dioin A'u. Miy die de A hopopnu-lili'iru me mak Aghopna. Ne la' hopopna-lili'iru ida de edonna narehelia upni-matromni, me la' walia mak ha rhopna ida de edon nareh niana mak khopan de mere nhu'ru-nhelam pa nlernohora matromni hihi'ini-yapyapni me nhiopanni.

¹⁷ Pa la' dodo'ondi de miy miat momuog olek hari honona maka Atiutga tiy miy, pede miy miana mliernohora re, totpa hota miy e mliernan wali unut lawna la'a Uplerlawna!”

Yesus Nakot nohora Yudas nnia'ohmani

¹⁸ “Mere riy id tiy miy hota edon nlernohora re pede hota edon nlernan wali unut lawan de. Awualir olek miy wia ne A'g e gat niohora la' miy hononmi yehwami. Emkade ho'mana Awualir nian olek wali e' wa totpa Puka lirni ntutu-nte'ela e'a. De Puka lirni emkadilla: “La'a he' ed mak kor A'u pua ka'ana roti, de e' ed mak kmalawna la A'u”.

¹⁹ A'ukot tiy miy lia' dodo'ondi meman la'a hya' maka hota ha rhi'nande, totpena hota la'pa mimkek nana hare honona maka A'ukot oleka tiy miy wia, de hota mpiesiay miemna de A'g E' inhatta maka A'ukot oleka de tiy miy.

²⁰ Plola la A li'ru ri, hameni mak kreiniana riy mak Aghopna re, de enreinian wali A'u, me ha meni mak kreinian A'u, de enreinian walia Uplerlawna mak khopan pa Amuai.”

²¹ La'pa Yesus Nakot emkade noma ralamni nmolu-nhelma. Noma Nto'pi-ngaur pa Niwra: “Mpiesiayo! Hota la' riy id tiy miy die hota niwra na'olga A'u!”

²² Dewade maka ha Nwatutu-nwaye'a re idma namkek la ida. Ne honona rwer rer wiawni yoma iraplin mua'ta he' ed maka E Nakot nohor deno?

²³ Riy id la maka ha Nwatutu-nwaye'a re, de riy maka Yesus Nsaynia de namtatna la Yesus walli.

²⁴ Noma Simon Petrus nahe' miatni la mutwualli maka Yesus Nsaynia de totpena natiana Yesus la'a he' eda riy deno?

²⁵ Noma Petrus mutwualli de napup lia Yesus niwra: “Matroma, Mtiulan pa Mukota riy della mai a'u.”

²⁶ Noma Yesus Nakot la Niwra: “Riy maka Agala rot miaka Atio' la A la'ru mniotni de e' inhatta!” Noma Yesus Na'ala rot anna ida, na'nama Nto'a la larni ralamni pa Nala la Yudas, Simon Iskariot a'nani de.

²⁷ La'pa Yudas nte'la nana rot diewade hegana amlawanni nhu'ru ralma. Pa Yesus Nakot la Niwra: “Plet pa mhi'a hya' maka omuiwra mhi'a re!”

²⁸ La mak ka'ana-kemun la hande id mana edonna nat niohor etia la'a hya' mak kariei piede Yesus Nakot harella Yudas.

²⁹ Dom e rwarora yanpa Yesus Nhopan pa Yudas nla nawel hadom pa rhi'a la' lerlalawan de, onde yanpa ral kupna oke'ela' riy mak kakleha-kaplara, yoma Yudas nanpena ed mak ktorreri ir kupanni mak kden la kaha.

³⁰ La'pa Yudas nte'la nana rot die dewade nlergot wa. Ne lera mana nmel wa.

Yesus tit warwuarnu

³¹ La'pa Yudas nla'awa noma Yesus Niwra: “Ntutu-nte' oleka la lerni pa rimormiori ramkek nan Rimormiori A'nani A' di rrana la' heyanna totpa rimormiori ra'uli-rawedi A'u. Me onnila A hihi'u-yapya'pu mak Agiwra ghi'a di, pede Uplerlawna nanni de ha ra'uli-rawedia la tutullu-lolo'oni.

³² Ne onnila A hihi'u-yapya'pu ed mak kariei, pede Uplerlawna nanni de rran atulga la lyanti, pede hota E' wal pia ed mak kareiniande riy ra'uli-rawedia A'u, ne edon nalo'on wali ne Uplerlawna Nhi' hade.

³³ Upa-a'na miy hononmi, hota A'g edonna gor miy pia tsoli plalahwa. Ne emeknekama maka A'ukot targa la Yahudi o'tani-matni, de A'ukot wali tiy miy lia dodo'ondi, de hota miy mpiahak A'u mere la gen miaka Alia'a de hota miy edonna mpiakriania.

³⁴ Upa-a'na miy re, tit warwuaru di ed mak Agala tiy miy, de totpa miy idma mhi' kalwiedwed ida pa emeka nhi'inde Aghi' kalwiedwed miy die.

³⁵ La'pa miy idma mhi' kalwiedwed ida, de hota riy honona ratga de miy er mak klernohor reri A'u.”

Yesus Nwagahniorta Petrusa yoma hota Petrus nreher doin Yesus la

³⁶ Noma Simon Petrus niwra: “Matroma, hota Matro'mu Niwra Nla' meni?” Noma Yesus Nakot la Petrus niwra: “Petrus ee, hota Alia' la' dodo'ondi de hota o edonna mliernohora A'u! Hota nhoru olekwa, nanpena omliernohor owa'an A'u.”

³⁷ “Matroma, nihya'pa A'g edonna liernohor O la' dodo'on dina?! A' di de wuayow nohor pa hota amuat lia O wawanmu Matroma.”

³⁸ Noma Yesus Nakot la: “Plola o e muiwra mmuat lia' A wawnu, Petrusa?! Mhuoratreria Petrusa, hota hiwi lallu edonna nkukule' ma'ta de omueh'a nekpa mrieher doin A lia' re'eni wotelu.”