Rano'a 8 - Alkitab bahasa Luang

Kirkira-ralma rior samomuou die emeknekama patke' ida mak khar lirni pa npolga rimormior wialli totpena rlernohora

¹ Mitlina! Lir nnio'a-wawa niatu mak kodia wniarora-wnialai samomuou de emolmolan nekama patke' ida maka polpuolu-hawaunia. Kirkira-ralma rior samomuou nhar lirni.

² Ntutrier lia wo'or-kawru, loi-talla aratni, me la'a loi liawna-talan lawna nhiakarni.

³ Tatlin lirni la'a gen miak riy rawoka, de la' puohra leta gaini, la'a loi-talan maka kler la letlawna ralamni.

⁴ Niwra: “Rimormior miy re! Mitlin a li'ru! La'pa rimormior miaka kmori-kdar lia noha wawannu miy mtia'wa tlinmi la a lir kalwie'du di!

⁵ La'pa miy miak kakleha ma'ta wniarora-wnialai kirkira-ralma rior samomuou, mpiatutu-mpiaye'ela totpena mliernana kirkira-ralma riora plahwa. Makpodku-kpadku mpiatutu-mpiaye'a totpena miatu mpiarora-mpialai samomuou.

⁶ Mtia'wa tlinmi re, yoma lira-tun muaka ukota ri, ha raplola me rperkun la miy.

⁷ Mak a'ukota re raplol momuou, yoma a' di oliet a lia putra-palka ohpa-lahara.

⁸ A li'ru-tu'nu honona raplollol momuou. La' id mana edonna nwotra-ntal tiaru.

⁹ La' riy mak katu kwarora-kwalai samomuou, de a li'ru-tu'nu rla' nan o'tani yoma raplola, me la'pa riy maka o'tani kriahlanu etla de riwra a li'ru re raplol toto' memna.

¹⁰ Mitota-miwawa a lira-nnio'a wawa-nia'tu, yoma hare welli narehia maha wawahra. Me kirkira-ralma rior de welli narehia lel korkora-mah marmara welli,

¹¹ me welli narehelia watu-watu mak welli werweratni, me edonna nora hya'-hya' to'a maka rimormiori ralamni nala re rtutur wutu.

¹² A' muaka ha rweta la kirkira-ralma rior samomuou, de wuaror samomuou pleini nampena ghi' hadoma, agatu wualiria ha samomuounu, me nhi'inde a li'ru-ya'tu na'ititar rer lia.

¹³ La'pa he'a natota-nawawa na'unni-namta'ata Orgahi Orha'a de riy de sukni tia'ala yatyatni-halalli. A' muaka ha rweta la kirkira-ralma rior samomuou, de a su'ku tia'ala riy maka khi' inonni pa katulu-kapetna. A ralmu edonna napal niana ilu-wniehwa yatyata-halala me kdiori-kdieha ohpa-lahara.

¹⁴ A'g ed mak kwatutu-kwaye'a, me a' wal pia ed mak ktutu talan samomuou. He' mak klernohor a'u de natu liawanni me nodi plolli.

^15-16 A'g ed mak khima ray-ray re totpena tulanni-kniarni rla' ga'a. De a'g ed maka ktulan la o'ta-mata la'a hairi re honona, totpena plolli-mneheni re rewre'wa pa raplola. La a hihi'u pede marna-wuhura o'ta-mata rawerta-ratailla rira lirni-tunnu de edonna npa'ei-npahal la watghudi-lokarni.

¹⁷ A ralmu napal niana la he' maka sukni la mai a'u. He' ed maka kwahakhak a'u hota rlernan a'u.

¹⁸ A' di de re'a-tniaru yatota-yawawa etla a'u. He' ed maka klernohora a lira nnio'u-wawa nia'tu re rlernana pripanni-fa'anni pa nodi liarni.

¹⁹ Maka ha mliernana la a' die narehelia leli mah marmara welli.

²⁰ He' mak klernohor a'u, de nlola loi-talan mak kaplola yoma a'ula'ala la loi talla mak kaplele'era.

²¹ La'pa he' ed mak ralamni nal nan a'u de agala pa nre'a-ntaru. Me a'upenga romni la hya'a-hya' to'a.”

Orgahi-Orha'a Nnairi kirkirni-ralma riorni pa Na'ohi-na'ara nohkerna-rai miaran di

²² Kirkira-ralma rior samomuou die emeknekama mak khar lirni niwra: “Orgahi-Orha'a ed mak khi' nan ulga a'u. E limni enni mulaliaini de a'u la' ululu memna.

²³ Nohmarna nek de, a'ula' ulga. Noha gergera-tatiah'i ma'ta de Nhi' nan olek a wua.

²⁴ Rmori a' die gera tah'i edonna nden ma'ta, me la' meni-meni ho'mana gera ormatni mak kopli-kopli edonan ma'ta.

²⁵ Rmori a' die wo'ora-kawru mana edonna rawniau ma'ta.

²⁶ Nohkerna nora rai mtatanni mana Orgahi-Orha'a edonna Nhi' ma'ta, me la'pa tan wiok yanulnullu mana Orgahi-Orha'a edon Nhi' ma'ta.

²⁷ Adien wal pia Nwerna lyanti me umkek nan walia Nhi' tiema-lianu la gera-tah'i nora darta letgarni.

²⁸ La'pa Orgahi-Orha'a Nkenia kakma la darta, ne Nhari wialia gera matni mak kopli-kha'a la'a hletan lawna-yoiri kdieldelamni.

²⁹ La'pa Nhopan pa gera-tah'i yana nlergot lola tiema-lianu de a'g ed wal lia, ne a'umkek nan memna Nwahoiya nohkerna la watu liari wawannu.

³⁰ Lera-ler nekpa atiutrier niohora ha Nhi'a hare honona de emeknekama Orgahi-Orha'a a'na sniayanni a'u mak khi' E ralamni pa nahepru. A'g ed maka uhe'i-uhepur nande neniehu-tierter a lia E gaini ralamni.

³¹ Uhe'i-uhepur wal lia noha wawannu maka Ena'ohi-na'ara nor wutga rimormiori mak ha Nakoki-nayap niana totpena rdella noha wawannu de.

³² La' hade pede mitlin la mai a'u tuwari-lawermi re! Yoma la'pa mliernohora a wniatu'tu-wniaye'u de hota miy mlier la samomuounu.

³³ La'pa mia' nana lira nnio'a-wawa niatu ri, totpena mpialia la riy mak ktaru kirkira-ralma rior samomuou, ne yana mpuarwah'a!

³⁴ La'pa he' natlina-natailla mai a' die hota nlernana unut lawna. Lera-ler nekpa nwewiei-nnarnar a lia a nhia'ru gaini yoma niwra nor a lia roma ida.

³⁵ La'pa he'a nlernan a'u, de hota nlernana mormiori, ne Orgahi-Orha'a ralamni Nala e'a.

³⁶ Mere he' edon nlernan a' die, hota nhi' arukia inon wamueheni. La'pa he' ed maka sukni tia'ala mai a'u, de riy de sukni la matmiati-molmuolu.”