Rano'a 7 - Alkitab bahasa Luang

¹ Ame! Mhuoratreria a li'ru-tu'nu; yan memmemna mhuoratdoinia oke'ela.

² Mliernohora totpena mliernana mormiori-dardiari. Mliernohora a wniatu'tu de emekwalima o e mutiaka matmu olli.

³ Omhuoratreria hare, de mhi'targa la ruh'amu nayanni. Me emeknekama wui miaha mak kden rer niek la tiermu.

⁴ Emeknekama nhi'inde omuora ammu-hyalmu inmu-narmu mlia' ihyida-ralmida, de emkade wal lia mniairia kirkira-ralma rior samomuou pa nodi liarni.

⁵ Yoma la'pa mliernohora kirkira-ralma rior samomuou die hota nodi oliet o la'a patke' yatyata. Hota o edon mliernohora rira hawni mak ralamni edon kdenrer lia muanke'eni. Nhi'inde patke' de nhi' nur mi'na la muanke' doma pa na nreinian de rlernohora lir yawewalli.

Patke' yatyata

⁶ La' lera ida de a'umkek lola a ro'mu folanni.

⁷ Dewade umkek nana tuwar riahu mere a ma'tu nod tio'ola riy mak kpodku id la' hande.

^8-9 La'pa lera nheria pa niwra nmel wa noma muanke' de nokria talla honi la'a patke' id likatni.

^10-12 Patke' de nhi'inde edonna namteman la likatni. Kekeneka etla talla aratni, edon nalo'on wali ne etla talan lawna, onde nwei lia talla nhiakarni. Edonna nmola-nma' taru mere naltier liawna. Nnairia lawra-raini mak ka'hira muanke'a pa narieiniande rlernohora e ralma-rior yatyatni. Dewade nla npertemna muanke' de,

¹³ na'nama nkola pa nkinnia. Edonna nmola-nma'a eti mere nakot la muanke' de niwra:

¹⁴ “Aga'al oleka ha'anan mak ha ra rhoi-rtan lia Uplerlawna rlernohora hya maka a'ukot targa olek la wa, pede dodo'ondi agodi oleka korni-tre'eni.

¹⁵ La' hade pede uhak o'a totpena trewre'wa pa ta'an ha'anan de la' a ro'mu nayanni. La dodo'ondi de awuatrom nan olek o'owa!

^16-17 Me aghuri oleka wu'ru mur, wu'ru cendana nora kayu manis la'a a le'wu wawannu maka awuern oleka saprei mak kamnurnuhru, mak horni rupni-rupni, mak a'uwel niana la'a Mesir,

¹⁸ pede mmuai pia tla' pa twamuri-twale'era la hande pa tsi' doin it sukni la mela plahwani.

^19-20 Yoma a muanke'u de krei wor nianpena nmai, yoma e nodi kupan rahu pa nla'awa la'a gen miaka oliet memna.”

²¹ Patke' de nhi' nur mi'na la muanke' de nala lir yawiru-yawewla pa na nreinian de muanke' de nlernohora.

²² Muanke' de edonna nwaror pa naplahwa, ne nlernohora wa de emeknekama i'n maka kiwa kte'la la ainiara naplin niek la ema rhewra kenna. Me emeknekama riy podku maka rtorna totpa hota rukmua.

²³ Hota edonna nalo'on wali ne ra'p'ihi nto'pi doinia wesolanni. Hota nheduma emekwalima hiwi maka ma'nu ha nlakam nana.

²⁴ La' hade pede upa-a'na miy re! Mtia'wa tlinmi pa mitlin a li'ru di me yan memmemna mhiopliala.

²⁵ Yana mliernohora patke' mak kanurmi'na nana muanke'a miy, me yan mihakaka re.

²⁶ Yoma ha rtotweyat oleka muanke'a liawanni, me edonna rrekan nan ma'ta muanke' maka ha ntot wenn oleka la anin maka ha rtoto'or la.

²⁷ He' niwra nhapar la ha romni, de rekanneka la ha nahmena nmormiori plalahwa la nohkerna wawannu.