Rano'a 6 - Alkitab bahasa Luang

Yano'a-ya'atu dom to' wali

¹ Ame! Matialo'onama o' e muno' targa hadom la mutwualmu miwra hota omhuernia e otanni.

² Mere la'pa mutwualmu de ta'enniana npairia otanni, me o' nek de ta'enniana mhuernia, de hya' maka omuno' targ olek la e'a, nwalia toktokal maka ktokal nan o' owa'ana.

³ La'pa emkade samomuounu de orgahamu mpue'er doinia toktokla la inonmu. De ple'tu pa mlia'a riy de. La' pa mpuaka lilili-mamuau lia totpena e nolin lim la o'a.

⁴ Yan munin matmu la hadi!

⁵ Muolin doinia toktokal de pa emekwalima ma'nu onde kijang maka rlewan la toktokla pa rawlar wia.

⁶ Riy mak kpamalsa de nwatutu-nwaye'ela tiehra.

⁷ Tiehra re rakleha ina-ama yanulu-manatu.

⁸ Mere la'a rieiki-wnio'ora plahwani, de rawoka-rale' reria warehera ya'ana-yemnu pa ra rwei lia rehka-lara lerni.

⁹ Mak kpamalsa miy re! Hota la moweni mieman la miy yaninmi la inon werweratmi dina?! Moweni nianpena miy mimata?!

¹⁰ Mimtatanmi pa mriw limmi demade miwra: “A'unin oke' owa'an a'u, yoma aghoki tiemn olekwa.”

¹¹ Mere la'pa miy kniarmi to' yanina dewade kleha-lara nmai die emeknekama mak kreyahru rmai die rodi keki-rautu.

¹² Riy yatyata-halala rod nieka lir halala-tun halala. Ir rpudi-rakal rira la meni-meni to'a.

¹³ Idma nahe'i matni la ida totpena rla' rhi' yatyatni-halalli.

¹⁴ Ralma-rior yatyata de eneknek to'a rwarora yatyatni-halalli ya'ohpa-yalahara pede nareiniande yahuri-yawo'or la'a meni-meni.

¹⁵ La'pa emkade, mtatandi nekpa rler la yatyatni-halalli yatlorni-yatra'ani pa rler la matmiati-molmuolu ralamni.

¹⁶ Do'a-hala wo'itu maka Orgahi-Orha'a sukni tia'ala pa Nahmen memna riy rhi' nana:

¹⁷ de rhi' atulu-apetna inonni, rputra-rpalka ra'ohpa-ralahara, rwunu-rwenna riy mak edonna khala,

¹⁸ rna'ohma-rnakatia totpa rhi' yatyatni, pleta-plet pa rla' rhi' yatyatni-halalli,

¹⁹ rodniana riy ohpa-lahara, me rhi' mutwualli pa idma rahuri-rawo'or nohor ida.

Olie'tu la yalira-yaliai

²⁰ Ame! Mhi'a hya' ed maka ammu nakota. Me yana mhuoratdoinia inmu nnio'oni la o'a.

²¹ Mhuoratreria ir lirni-tunnu la'a ihramu-ralammu. Mhi'a nnio'oni re emeknekama wui miaha mak kden rer lia tiermu.

²² Ira wniatutnu re de rodia o' la'a loi-talla kalwieda-paitiota. La' melmela de emeknekama e ratiak reri o'a, ne la'pa omumat la o yaninmu de rtutga talan mak kaplollol tiy o'a.

²³ Yoma maka inmu-ammu ha rwatutu ri emeknekama wa'du mak kmormiori, me lira pniolliohorni de ed mak kodi mormiori-dardiari.

²⁴ Mliernohora inmu-ammu wniatutnu totpena olie'tu la patke' yatyata, de rira hawni maka kanur mi'na.

²⁵ Yana ralammu ntuin la samounu, me yana mtiella aparmu, la'pa nahe'i matni la' o'a mana, yana mumkek la.

²⁶ Omuora patke' yatyata mak kakleha hawa de do'a-hala hade, me welli yamanna wra'u ralamni to'a. Mere ame, la'pa riy or hawa de hota leli-maha rakuri-ratla'a me hota riy o'ta ntuini!

²⁷ Hota riy ida nkorreri ai de ai edonna na'ana rayanni?! Me edonna nhi' amutni-aki'ira inonni?!

²⁸ Hota riy ida nhapar nana ai kwiari ne lakni edonna nmutni?!

²⁹ Hade emekwalima it tora rira hawni tala' wutu. La'pa he' ed maka khi'a-kyapia hade de edonna nawlar lia niukum lawna.

³⁰ Ama, mpuaror nohora riy ida mak kaplara pede nkamna'a. Hota riy edonna rawenan memna yoma rat niohora e naplar rehia.

³¹ Mere la'pa rtoran nana de hota rhopan pa npair de narehi-nalawna la'pa rti'il nana la wo'itu ralamni la hya' maka ha nkamna'a. Hota npair doinia re'eni-tniarnu honona.

³² Mere hota emkameni wal lia muanke' mak kaliai ida?! Podaknu ne! Hota nler la yatyatni-halalli yatlorni-yatra'ani.

³³ Hota ramuki-rama'ala me rapolu-raliel la. Nanni nyat wa pa nodi liarni wa.

³⁴ Yoma nhiolli-lietni de nariei pia pat de hawni nayah'a e'a, nhi'nande nawenan memna, me la'pa e niwra nwahla e ralam mehrani de, nakleh oleka ralam samomuou wua.

³⁵ Nhi'nande nwayotlia kupna maka riy mak kor patke'eni raliai die nala pa npair dioin halli. Muanke' kaliai die nal kupanni liawanni ho'mana, pat de hawni nwayotlia.