Rano'a 5 - Alkitab bahasa Luang

Olie'tu la yalira-yaliai

¹ Ame, mutlin la ammu a'u! Mhue'du nana la'a hya' maka a'ukota ri. Mtia'wa reria tlinmu la'a lira nnio'a-wawa niatu maka agala wuatutga o'a ri.

² Totpena omuat niohora la emkameni la orgahamu muodia inonmu me multieri-multian de mliernohora kirkira-ralma rior samomuou.

³ Yoma patke' yatyata re raltier die nurnu re mi'nani emeknekama gani turnu me lirni nerun de o ralammu nakwali amhuakru.

⁴ Mere la'pa hohoni dewade mermueru-kapkiapli maka tmadodo'or nohora.

⁵ Hota o' mana e ni'it targ ole'ku la'a matmiati-molmuolu ralamni.

⁶ E' edonna nlol oleka talan maka klola mormiori-dardiari. Nler oleka la talan mak edon kaplola, mere naplin niana.

⁷ La' hade pede am e! Mutlina! Yana mpuayotlia a li'ru-tu'nu ri.

⁸ Olie'tu la patke' mak emkade! Rerehnianama romni gaini nek de yana memmemna mhuapar la.

⁹ Yoma la'pa omtiam la, de hota riy edonna ratota-rawaw o'owa. Ne hota patke' de hawni nahankern nande nwunu-nwen o'a la lerni la omtuwarwiar mia'ta.

¹⁰ O re'emu-tniarmu hota riy meheni ra' nan to'a, me liwatmu-odapmu wniahlani ho'mana lupmu-rommu edonna rlernana.

¹¹ Hota la'awa hohoni de muhe'lia lewu ko'oni pa muhe'i kniahi la kermu-ga'armu pa polpuol inmu-wakwak ammu.

¹² Demade lirmu niwra: “Inee! Hya' nariei pia uhmena-upraiya lira-tunu la a i'nu-a'mu?! Nihya'pa uhmen utlin la lira pniolliohora?!

¹³ Uhmena utlin la riy maka kwatutu-kwaye' a'u re,

¹⁴ pede hota alier la tututu-wawuau ralamni. Yoma o'ta-mata leta riwra ra'ursia a ha'lu. Leta mniotni rat niohor olek a wua pede rakleh oleka yatota-yawap mai a'u.”

¹⁵ La' hade pede, am ee! Yan olie'tu la hapmu ne ralammu nod rer lia hapmu pa emeknekama muemun ger wamuehemu me yana muemun riy meheni gerni.

¹⁶ La'pa o ralammu nod lia patke'a doma de nakleh et miemna untu kuku'a. Hade emeknekama mhuopliala kotmu la leta ralamni.

¹⁷ Ha samounu de omuor to'a o patke'emu me edon riwra patke'a dom pali.

¹⁸ La' hade pede omuora patke'emu maka muora mmiehlima la'a lerni mimdien ma'ta la tuwari-harara lewatni. Enmemeh'a ed mak khi' ralammu pa nahepru. Yana muora patke'a dom to'a.

¹⁹ Ndella pa lera-ler nekpa mpi'u-mga' niohora hapmu to'a. E' de nsayn reri o'a. Ndella pa e nmeh'a ed mak khi' ralammu pa nahepru me namtemtemna.

²⁰ Hya'a nrei pia mga'ga' niohora patke' yatyata?! Hya'a nrei piede muora muanke' dom hawni pa mila' wutu?!

²¹ Am ee! Hare honona de Orgahi Orha'a e Nlin reri-nmat reri hare honona. La' meni-meni to'pa rimormiori rden la, de Itmatromlawanni mana e Namkek reria re.

²² Do'a-hal maka riy yatyatni rhi'a-ryapia de emeknekama toktokla la inon wamueheni. Ne hota ta'enniana ral doinia la inonni.

²³ Onnila podaknu re pede rwir dioin la talan mak kaplollola nhi'nande rler la do'a-hala ralamni. Raplinu rodi inonni pede la' hohoni de rler la matmiati-molmuolu ralamni.