Rano'a 4 - Alkitab bahasa Luang

Unut lawna maka ha rlernana la kirkira-ralma rior samomuou

¹ Upa-a'nami re! Mitlina-mitailla ammi yano'oni-yanatnu! Mtia'wa reria tlinmi la hade totpena mliernana kirkira-ralma rior samomuou.

² Maka awuatut lia miy di ha samoga pa yana mpiar nana.

^3-4 Yoma lerni pa a kuku' ma't a'u de i'nu a'nani eneknek amueh'a pa nhi'inde a a'mu de nwatutg a' die niwra: “Mhuoratreria a nnio'u-nia'tu di! Yan memmemna mhuoratdoinia la. Mliernohora maka awuatutu-wuaye'a ri totpena mliernana mormiori-dardiari.

⁵ Muatu mhuoli-mlieta mhuoratreria a nnio'u-nia'tu me yan memmemna mhuopliala ameee!

⁶ Mhi'a-myap die mliernohora kirkira-ralma rior samomuou, yana muolin doinia. La'pa emkade emeknekama kirkira-ralma rior samomuou de e nruwun reri o'a. Ralammu nod rer lia totpena natia'ku pa yana riy rawo'lu.

⁷ La'pa maka hota o' nanpena ed mak khi'a, idni de totpa mliernana kirkira-ralma rior samomuou. La'a hya' ed maka o ralammu nod rer lia de ononni de totpa ompualia la riy makatu.

⁸ Mutota-muwawa kirkira-ralma rior samomuou die totpena omliernan walia yatota-yawawa. Mtiorreri pitpitga totpena hota mliernana ya'uli-yawedi.

⁹ La'pa mtiorrer kirkira-ralma rior samomuou de, hota omliernana yatota-yawawa. Yatota-yawawa hormata-kanala maka omliernan de emeknekama hadeutu samomuou ida maka rayapia emeka wutmu-laimu.”

¹⁰ Mutlina ama! Mtia'wa reria tlinmu la a lira nnio'u ri totpena mormiormu naplalahwa.

¹¹ Awuatutu-wuaye'a kirkira-ralma rior samomuou la o'a. De atiutu-ghoi tiy o'a la'a loi-talan mak kaplollola.

¹² Totpena o' edonna mlier la oruli-augewat la loi liawna-talan lawna, me la'pa muwlari miana edonna mdiunti-mpuetru.

¹³ Amee! Mtiorreri pitpitga hya' maka awuatutu-wuaye'a la o'a re me yan memmemna mhuoplial harella. Mutiak samomuou totpa mliernohora hare yoma la'pa mliernohora wniatutu-wniaye'a re de hota omliernana mormiormu.

¹⁴ Yana mhi'a-myapi emeknekama riy yatyata re hihi'ini-yapyapni. Yan memmemna mliernohora re.

¹⁵ Yana muiwra muat niohora ir hihi'ini re. Olie'tu la ira, ne mriu' nian pa muodi liarmu.

¹⁶ Riy yatyata re edonna ranin irannu-matni, yoma ir edonna rhi' nan ma'ta yatyatni-halalli ida. Matni re edona pre'eta, yoma ir edonna rwano'a-rwarar ma'ta riy ida.

¹⁷ Ir rhi' yatyata-halala wuhura-tekla re emeknekama ya'ana-yemnu maka ha ra'ana-remnia la' lera-lera.

^18-19 Riy yatyata re loini-talanni emeka mel maka kmel'uta-maliena. Ralala' pa rdunit tar die rhokal gaini ho'mana raplin niohora hya' ed mak karieiniande irtuini. Mere riy kalwiedweda loini-talanni de emeknekama lera mak matni npah' olekwa pa hota edon nalo'on wali ne lera nwawuau ro'onni.

²⁰ Mutlin reria a li'ru ama! Mtia'wa tlinmu.

²¹ Yana mhuopliala, mere mkien tiarga la ihramu-ralammu.

²² Yoma la'pa hameni o'tani nta'i nan a li'ru-tu'nu re, de hota nlernana mormiori-dardiari me inon tetema mana hota nkalwied la mehrani-maunu.

²³ Ononni de mhuoratreria totpena hya' maka ompuarora de naplola me samoga. Yoma hare honona maka mhi'a-myapia la mormiormu di, de ha rwatiaga hya' mak kden la ihramu-ralammu.

²⁴ Mukot hadom de naplollola. Olie'tu la lira-tun muaka kodia ohpa-lahara kdiori-kdieha.

²⁵ Mulola-mula'a de mdien nek la ploi-ple'era ralamni. Yana mutlin la rira lira yawewalli.

²⁶ Mpuaror samomuoga nanpena mhi'a, totpena mliola talan mak kaplola.

²⁷ Olie'tu la'a yatyatni-halalli mere muori-mdiar lia plolioini-plele'erni. Yan memmemna mpir dioin la talan mak kaplola.