Rano'a 31 - Alkitab bahasa Luang

Ra rano'a-ra'atga ray

¹ Hari de Lemuel, mak khi' ray lia Masa de lirni-tunnu maka inni nwatut tiarga la' e'a, de emkadi:

² Ama! A ralmu mniotni o'a, maka atior nana la nohkerna wawannu yoma polpuo'lu-wakwa'ku la Uplerlawna de Nreiniana. Hota agala hya' lira nnio'ola o'a?

³ Yan memmemna mual inonmu pa ma mpuorsena onde mkalgara inonmu nor wutga rurmu-laimu la a'na pata. Yoma la'a patke'a rerieini pede ray-ray liawanni rler la yatyatni-halalli yatlorni-yatra'ani.

⁴ Mhuoratreria Lemuela! Ompuali oleka la ray pede yan memmemna muemnia tgo' arka lawan rehia.

⁵ Yoma hota la'pa ray id nemnu tgo' arka, de hota nhoratdoinia deulu-tatra maka re'er targ' oleka wa, ne hota edonna nlernohora mak kaplola, mere plolli nek la e sukni pa nhoratdoinia a'na riy patyata ha rlolola.

⁶ Tgo' arka re ral to' hare la'a mak hota edon nalo'on wali ne rmati, onde la'a mak kler la ralma sniusa.

⁷ Ndella pa ir remnia totpena rhoratdoinia rehka-lara, nora sniusni la temni.

^8-9 Mere Lemuela, yana mhi' emkade mere muodniana riy maka takeni kodnian inon wamueheni, la'a riy mak ketlia lira-tunu re gaini ralamni. Mruwun reria riy honona la' genni-tienni de yana mhoitio'or la riy kleleha-larlara. Muetlia ir lirni-tunnu la plola-mneha wawannu.

Hawa pat maka katu kwahi'a-kwayod lia roma nayanni

¹⁰ La'a hawa pat maka nhiolli-lietni samomuou memna, de trema-trema it edonna tlernana, mere hade welli narehelia watu-watu welli werta.

¹¹ Hota muannu npesiay patke'eni de wa. Ne hota muannu de edon nakleha hadomdoma.

¹² Hawni pata edon nhi' arukia mere la' mormiorni plahwani de nhi' nieka kalwiedwedni la.

¹³ Nape'el meman la nawoka-nale'ga orau nora dum wulu na'nama natenni-namairia.

¹⁴ Nla nwahernu-nwahala ya'ana-yemun la olietleta, de emekwalima maka nhi'inde loi-puou ha rla rwatona re.

¹⁵ La'pa loka-lak ma'ta de, namat pa nwahi'a hawni-a'nani ya'anni-yemannu ne nhakra riy maka nhi'inde ktulla-kar lia e'a re tniulanni-kniarni.

¹⁶ Nla nwahaka nohanna-taniarat pa nawel lia totpena nhi'a la e gah wamueheni mak hota nawuli-natniamin lokrahi wo'a la' nhyi'ini-tlunanni ralamni.

¹⁷ Inonni naruri pede edonna nwaler et lia tulla-kniari.

¹⁸ Namkek memna de la'a hya' maka ha nkari re de nodia unutlawna la. Ne nkari pia nodia pa mela lawna.

¹⁹ Ahwa maka ha nhoran nana re, namairia nhor nianpena natennia.

²⁰ Nakleha nhiol yat la'a riy maka kwak la e'a. Ne ralamni kalwied la' riy maka kakleha-kaplara.

²¹ Ralamni edonna wolwo'l etia la hota edon nalo'on wali ne tah'i muti nmai wia. Yoma rain wola re er olek la wa pa hota romni mniotni rnairia.

²² Enmemeh'a nekpa orgahi nkaria saprei mak samomuou muemna me rayanni maka e nnairia de nhi' nana la koka lenan maka horni ungu pede honona re de samounu.

²³ Muanke'eni de rira rwetwet la nanni yoma nhi' walia o'ta-mat la leta ralamni.

²⁴ Hawa pat de nhi'a hewewta-naniairia rewa-lawra totpena na'olga la mak kwadakna.

²⁵ Hawa pat de naruri-nalai me nhiolli-lietni samomuou pede riy ratu ra'unni-ramta'at wali e'a, ne ralamni edonna nwo'la la ler mak kmai.

²⁶ Ltieri-ltiani de nodia kirkira-ralma rior samomuou. Onnila ntulan reri-nsayn reri rira pede nhi'inde naltieri la rira de nodia lira mnapla pa nwatutu.

²⁷ Ntulla-nkari die limni-lakni prana, me nhioratni edonna naloi lia tulla-kniari miaka kden la roma nayanni.

²⁸ Upni-a'nani ra'uli e'a onnila nhiolli-lietni mak samomuou memna, me muanke'eni na'uli wali e' la'a tulanni-kniarni la'pa illu-wniehwani.

²⁹ Muanke'eni niwra e namkek oleka patke'a liawanni kalwiedni mere e patke'eni mak karehi momuou lia.

³⁰ Patke' maka gaini samomuou de wniehwani-wnialakatni la'pa nur mi'nani de yana tpesiaya, yoma samou die hota nmol wua. Mere patke' maka khu'ru-khelma katlina-katailla Orgahi-Orha'a de plola hota nlernana ya'uli-yawedi.

³¹ Twak la Uplerlawna pa Nwahla pat mak emkare nhioli-liet samomuounu, ne hota ndella pa nden rer lia yatota-yawawa la' meni-meni to'owa.