Rano'a 30 - Alkitab bahasa Luang

Agur lirni-tunnu

¹ Emkadi la'a Agur, Yaka a'nani mak kwatiaga Masa, de lirni. Niwra: Uplerlawnu neee! apuosposa, a'g e puosposa Matroma! A ru'ru-la'yu madwie'er wa.

² Apuodku emeknekama ha mormior miaka kakleha nhiorat la' temni.

³ A'g edonna wuatut tiar lia kirkira-ralma rior samomuou. La' hade pede Uplerlawna hihi'ini-yapyapni kuku' mana a'g e uplinga.

⁴ Mai noh di wawannu de rimormior mieni e nalernu-naha'ata Ilyamou-Watyatoha? Me nhi'inde he' ed maka kukum reria anni la lo'mani ralamni, me he' wal pia nhi'inde nala rayanni na ntoman gera? Onde nhi' nana nohkeran di tiemni-lyannu? Hade de he'a de? Me a'nani de he'a? Matiala o' e muatga!

⁵ Uplerlawna Ntorreria nnio'oni. La' he' ed maka kha'ar mormiorni la' E'a, de E' de emeknekama keliau-halwa'ana maka rira yaheu genni.

⁶ Yana omu'itra-mulawan la'a hya' maka ha Nakot taru. Yanpa hota E' ed maka kpolliohoru. Ne hota Ntut momuoga re totpena o putarmu-palakmu re honona rayamkeka.

Riy samomuou id de sniumbainni

⁷ Uplerlawnu ne! Awuak la O' pa Mhi' emkadi la a'u la' a mormio'ru la nohkeran di wawannu,

⁸ de Mhi' a' pua yana awualia la riy mak suksukni pudi-akla ohpa-lahara. Me yana Mual a' pua ukleha-uplara onde rie'a-tiaru. Mual neka hya' maka a'ukleha.

⁹ Yoma hota la'pa a tiaru, yanpa hota a'g edon pusin nohor owa'an O'a. Ne la'pa ukleha-uplara de yanpa hota kiamna'a pa ghi'a kdeha O kotmu-nanmu.

Nnio'a-niatu dom to' wali

¹⁰ Yana mupupu-muheria lili'iru-hopopna id la upni-matromni, yoma hota rlokra-rhaut o' pa riwra omhuala, ne hota mliernana hihi'imu-yapyapmu de wniahlani.

¹¹ La' riy dom de rapolu-raliella amni, ne la' walia edon rala inni la rekna-waiti.

¹² La' dom de rwarora de ira rmou-rwitan la do'a-hala, mere raplin niekla ir rakdieha-raktiahli ma'ta.

¹³ La' dom de rran inonni yoma e ra'eram reria la ir de rarehelia riy dom to'a.

¹⁴ Ne la' riy dom de rwaka tiernu-apannu de rodia yawunu-yawenna me rakapliahan nande ra'ana mak kakleha-kaplara re rora mak kakleha ruri-lai re liwatnu-odawni.

^15-16 La' gargara maka kdihmi rer lia keranni (lintah darat) a'nani worga re. Irrora rwakwak rer tio'owa. Idni niwra: “Muala hadom mai a'u!” Me wornu nakot emkade owa'ana niwra: “Muala hadom mai a'u!” Mak kwakwak pa nodi liarni er wal lia. Idni de la'a noh mati-ray miolu yoma lera-ler nekpa riy rmati-rmolu, wornu de patke'a mak kiwra nlernan a'na pede lera-ler nekpa rwahakhak nekpa totpa nlernana a'na, wotellu de tani kieran maka katieru keran la otna, wogatni de la'pa ai nram lola etnu-liolli.

¹⁷ La' riy mak kapolu-kaliella amni me o'ta watu pa nahmena natlina-natailla inni, de hota nmati pede ma'nu wawi rmai pia rtotan matni me inonni mak kmati olek de mana ih pona nma nakihiya.

^18-19 La' noh di wawannu de hihi'a-yapyapi re wogata er maka a'g edonna nia'erit nana, yoma ha samomuou memna re. Idni de ih maka knem lola darta, wornu de niy miaka kawrik lola watg au ralamni, wotellu de kapil maka khopal lola hletan lawna letgarni, me wogatni de ha trapriapi mak kora talanwalli hararara maka ralamni idma nalla ida.

²⁰ Patke' ida mak kora patke' doma hawni raliai de nhi' emkadi: La'pa raliai pia nhorwua noma nla naroha pa emeknekama na'nama na'ana pa nah doinia nurnu kdeheni na'nama niwra: “A'g edonna ghi' hadom ooo!”

²¹ La' noh di wawannu de hihi'a-yapyapi wogata er maka riy nohkeran di wawannu rwayotlia.

²² Idni de, hopopna-lili'iru ata-wa'ara ida nla' ray. Wornu de riy podku ida nlernan re'a-tniaru harahu.

²³ Wotellu de, patke'a ida maka rira sukni tial la yoma nhiolli yata mere emkade ho'mana nlernan talan pa nmehlima, me wogatni de hopopna pata id ho' de nwarui nian targho'a tun de la' hawni pata.

²⁴ Mai noh di wawannu de hamormiori wogat er la de kuku'a mere ratu:

²⁵ Idni de tiehra, hamormior miaka kakleha ruri-lai, mere rwaho'a-rwatierun targa ya'ana-yemnu la'a ler warwuarnu.

²⁶ Wornu de pelanduk de nakleh ruri mere nhi' romni la' wo'or watwuatu.

²⁷ Wotellu de kongoha, yoma kongoha ho' de nakleha ray mere rparis de ratattatra.

²⁸ Wogatni de, lawehel maka it tal to'a it limni ta torna, mere rla rora ray rhol wiutu.

²⁹ La'a hamormiori wogata ho' de nhi'inde ralola-rala'a de rodi inonni emekwali ray ida.

³⁰ Idni de ohpora-ah diawra (singa) re de hamormior miaka karuri-kalai lia hamormiori re honona, me ralamni edonna ndiwar tar lia la'a hya' to'a.

³¹ Wornu de pipi muanu, me wotellu de hiwi lallu, me wogatni de ray mak kor wutga mak kodi keki-rautu rala'a pa rerun la ar ralma.

³² Mere la'pa la o podakmu hihi'ini pede mrian inonmu pa mpuaror nana yatyatni-halalli. Hadewa la hihi'imu-yapyapmu mak emkade!

³³ Yoma la'pa mriahmi nora de hota mliernana iwnu. Ne la'pa mliwra rira irannu, de hota narara. Emkade walia la'pa mhi'a riy pa rawenna de hota omrie' teman la yahuri-yawo'ora kokokna-rariarni.