Rano'a 3 - Alkitab bahasa Luang

Lira yano'a-tun ya'atu la' tuwari-laweru

¹ A'nu ne! Yan memmemna mhuoratdoinia hya' maka awuatutu-wuaye'a la o'a. Orahniortu la'a hya' maka ukota re.

² Totpena muor niana tupmu me mliawan nana liawanmu me mlier la pripanni-fa'anni mai nohkeran di wawannu.

³ Mtiut rieria ralam kalwiedmu la' mormiormu de pa mpual lia riy maka ha rpesiaya. Emkade pede nhiolmu-lietmu de hota emeknekama wui miaha mak kden rer lia tiermu. Mpuarora-mpualai samomuoga hota emkameni totpa mtiutga nhiol samomuoumu de.

⁴ Totpena mhi'a Uplerlawna ralamni nal o'a, ne it rimormiori wialli mana ratota-rawa'wu.

⁵ Mual ralammu tetema pa mpuesiay Itmatromlawanni, Makdenrer die. Me yan memmemna mhua'ar mormiormu la' yat wuamuehemu.

⁶ La'pa omhi'a hya' to'a de mhuoratreria Uplerlawna totpena mutlina-mutailla, ne hota E' ed maka ktutga talla mak kaplollol la' o'a.

⁷ Me yan memmemna mpuarehia yat wuamuehemu. Mere mu'unni-mumta'ata mutlina-mutailla Orgahi-Orha'a me olie'tu la yatyatni-halalli.

⁸ Totpena nhiolmu-lietmu re ed maka kagapnia inonmu, me nhi'a ihramu ralammu pa namtiertiernu.

⁹ Yatotmu-yawapmu la Orgahi-Orha'a de nayamkek la o nhiurliwtu-wnial odapmu de muala samomuounu mak omliernana la meloimu-mensiarmu me nhyi'imu-tlunanmu.

¹⁰ Totpena dudanmu re pala penga la'a ya'ana-yemnu, me la'pa lokrahi maka ha muemnia re mana riwgerun la kuhumu-khamu potla-plesmu.

¹¹ A'nu ne! Yana mpuarwah'a Orgahi-Orha'a wniatutnu-wniaye'eni la o'a. La'pa Npolliohora o' de yana ralammu werta-werta.

¹² Yoma Itmatromlawanni Nwatutga me Nliwra-nkaklia riy maka Ensaynia, pa emekwalima ama ida e nwatutga me nliwra-nkaklia a'nani mak ha nsaynia.

¹³ Riy mak klernana kirkira-ralma riora samomuounu de nat niohora hya' ed mak kaplola pa hota nler la unut lawna.

¹⁴ Unatnu de narehi miemna lelkiorkora-mahmarmara welli.

¹⁵ O kirkirmu-ralma riormu ho' de nareh dioinia watu maka welli werta. Hya' to' maka ompuahaka ho'mana edonna nora hade tutur wutu.

¹⁶ O kirkirmu-ralma rior samomuoumu de ed mak kodi o' pa mlier la mormiori plalahwa me re'a-tniaru, me hota riy ratota-rawaw o'a.

¹⁷ Ne hota la' o mormiormu de mlier la kalwiedni-paitiotni me ralma mtiertiernu.

¹⁸ La'pa he' ed maka ktorreri apitga wniarora-wnialai samomuounu de hota mormiorni-dardiarni samoga me nlernana unut lawna.

¹⁹ Onnila kirkirni-ralma rior samomuounu pede Orgahi-Orha'a Nakoki nayapi niana nohkerna rai miarna, me Nweran targa lyanti la' genni.

²⁰ Nala E yat wamueheni pa na Nhi'a gera la'a tani wikni na'nama nhopil pa nwau liora me lyanti mana ntowr ernia otan lawna la nohkerna wawannu.

²¹ A'nu ne! Mtiorrer apitga kirkira-ralma rior samomuou. Emkade pede muat niohora mliernohora hya' mak kaplola. Yan memmemna muolin doinia de!

²² Totpena mormiormu naplahwa me samoga. Yoma kirkira-ralma rior samomuou de emeknekama wui miaha maka khi' rira inonni pa yamkekni nayawe'ena me samoga.

²³ La'pa mulola-mula' ho'mana hadom edon ntai o'a, me edonna dudunti-wetwetru la'a loi liawna-talan lawna, mere omdiella mtiertierannu.

²⁴ La'pa muni'nu ho'mana mhelwioranmu de hadom edonna namta'tu la mela plahwani.

²⁵ Yan mumta'at hota plin-plinnianama hadom ntai o'a, onde mumta'ata hota mlier la yatyatni-halalli yatlorni-yatra'ani maka riy yatyata re rler la.

²⁶ Yoma hota mhua'ar mormiormu la Itmatromlawanni Makdenrer die, ed maka katiak o'a. Hota edonna Nolin doin o'a la' pa lakmu nwatro' tar lia tani nniahi maka ra rtota rira.

²⁷ La'pa riy mak kakleha-kaplara nwak hadom tiy o' de, etla de, muala, yana mpualgei' lia.

²⁸ Yana mukottarga la pena repar nanpena mual la, mere mual memna la ler de.

²⁹ Yan mpuarora-mpualaiya yatyatni pa mtiot aruki rom heiwialmu, yoma ir nek de e rpesiay o'a.

³⁰ Yana muora riy maka kakleh hal tiy o'a pa muora mihuri-miwo'ora.

³¹ Yana ralammu nal nana re'a-tniaru maka riy maklekla-makdiaini rlernana me yana mtiolliohora nhiolli-lietni.

³² Yoma Orgahi-Orha'a sukni tia'ala la riy maka ralamni nkoili, mere Enrehgor reria riy maka mormiorni naploloi-naplele'era.

³³ Ne Orgahi-Orha'a Nukmua riy maka khol lia riy yatyata romni, mere Nara'a-napalga rom maka kawoka-kale'ga riy maka kden rer lia plol wawannu.

³⁴ Hota Orgahi-Orha'a Nhi' amola-ma'a riy maka katulu-kapetna inonni maka kahe'i-kamalia rimormior wialli, mere Ntutga ralam kalwiedni la riy mak klola yawa.

³⁵ La'a riy mak ktarga kirkira-ralma rior samomuou hota riy ratota-rawawa. Mere la'pa riy mak podku-padku yoma mak kaplola mana niwra yata, de yeher to'ama riy rwohora-rtatra rahe'i-ramalia.