Rano'a 29 - Alkitab bahasa Luang

¹ La' pa he' ed maka rira takenniana rpolliohor nana de hota la'a mtatande nekpa nler la yatyatni-halalli yatlorni-yatra'ani.

² La'pa riy maka kholi-klet la ploini-ple'erni ra'ititar rer lia liawanni me rodi plolli, de hota lima-rora rahepur nande rloi-rhek nohora. Mere la'pa riy yatyata ida rwet la pa nodi plolli de hota lima-rora la'a leta mniotni polpuol inni-wakwak amni.

³ Upa-a'na mak kwahak totpa rlernana kirkira-ralma rior samomuou de rhi' amni ralamni pa rahepru. Mere la'pa he' ralamni sukni la patke' yatyata de emekwalima e nhoplial to'a kupna-kaini la hletna letgarni.

⁴ La'pa ray ntorna-nrautu nodi plola-mneha de lodanni-hairni nawniau kdededa. Mere la'pa eneknek to'ama ntot nan to' kupna la limni-rorni de hota edon nalo'on wali ne letni-ruhunni ntuini kdieulu.

⁵ La'pa he' ed maka kanur mi'na la e rimormior wialli, de emekwalima e nhi' owa'ana totota id la ira.

⁶ Riy yatyata do'oni-halli ntot owa'ana orgahani la tototni ralamni. Mere la'pa riy maka kden la plola-mneha ploi-ple'era ralamni, de hota nden la mormiori-dardiari miaka kamtiertiernu pa nahei-nahepru nande neniehu-tertera.

⁷ La'a riy maka kwehwa-klakat samomuou de rat niohora riy kleleha genni-tienni wawannu pa nhi'inde rodniana riy kleleha re lirni-tunnu, mere riy yatyata-halala raplin niohora rhi' emkade.

⁸ La'a riy maka nhi'inde kapolu-kaliella, hare er maka khi'a kokokna-rariarin la leta-ruhuna ralamni. Me la' riy mak katu nanpena er maka kodia lina-lera.

⁹ La'pa mak katu rora mak kpodku rhi' lira-tunu, de hota mak kpoduk de polpuolu-hawaunu onde nahe'i-namali mak katu la maketlia lira-tunu gaini ralamni. Hade nariei pia kokokna-rariarin to'owa.

¹⁰ Riy mak kwunu-kwenan lawna sukni tia'ala la riy ralma plele'era, mere hota riy samomuou re er maka kruwun reri-ka'ahla reria re.

¹¹ Riy podku rawenan de rto'pi-rgaur to'owa, mere la riy mak katu de natahan rer nieka lirni-tunnu re wa.

¹² La'pa mak kodi plolli ida natlin la riy mak kodia lir lalahara, de hota riy honona mak kar lia e' de rwalia la riy mak khi' yatyatni-halalli.

¹³ Riy mak kakleha rrora mak kdunti-kwetria ira nekpa ramnenehela' ida, yoma Itmatromlawanni ed maka kal ir rewre'wa pa rmori-rdari me Nhi' ir matni re ramkeka.

¹⁴ La'pa ray ida netlia riy kleleha re lirni-tunnu nodia rhi'ina-rella plola-mneha, de hota ray die nkukmu-nto'ma pa nodi liarni.

¹⁵ Liwliwra nora lira pniolliohora ed mak khi' pa upa-a'na rwalia riy mak ktaru kirkira-ralma rior samomuou. Upa-a'na maka inni-amni rlernohor neka hihi'ini-yapyapni de hota nhi' amola-ma'a inni mak kayori.

¹⁶ La'pa riy yatyata-halala mak kodi plolli la'a leta ida de hota do'a-hala ra'ititar rer lia. Mere riy yatyata re hota rler la yatyatni-halalli yatlorni-yatra'ani, la'a riy plele'era re gaini ralamni.

¹⁷ Mliwliwra-mkakaklia mpuatutu-mpuaye'a upmu-a'namu, ne hota e nodia ihru-ralma mtiertierun la' miy me nhi' miy pia niniha-malmialmi.

¹⁸ La'a noha-rai miak edon nlernana Itmatromlawanni lira nnio'oni-wawa niatnu mak ktutga talla la' ira, de hota nariei pia lima-rora kokokna-rariarin to'owa. La'pa maka katlina-katailla Orgahi-Orha'a riorni-liaini de hota rler la unut lawna.

¹⁹ Rwatutu-rwaye'a ata-wa'ara ida de edonna rala lira-tunu nmeh'a, yoma hota natg oleka wa, mere edon nlernohora ne nhi' owa'ana hadom owa'an de to' owa'ana.

²⁰ Riy mak kpodku-kpadku de samou ma'ta la'a riy maka edon nwarora pleini mere pleta-plet pa natlier tio'owa.

²¹ Hopopna-lili'ir maka it tsur niohora la' kuku' ma'ta de hota nlawan wa dewade nhi' targho' it pa it o'tani nmehra yoma e na'o'ta kpau.

²² La'a riy maka pleta-plet pa kawenna de nhi' riy rahu pa rawunu-rawenna me nhi'nande dodo'a-halala na'ititar rer lia liawanni.

²³ La'a riy po'ona de hota Uplerlawna ed mak kalernia la yawa. Mere la' riy maka khu'ru-khelma de hota rlernana ya'uli-yawedi.

²⁴ Riy maka kwalidan wut lia mak kamnelu-kamna'a de emekwalima sukni tia'ala e inon wamueheni. La'pa nwahaur momuoga hare la'a mak ktoran watghudi gaini ralamni de hota mak ktoran watghudi retlia e lirni. Ne hota la'pa nahmena nakot lirni ho'mana hota nlernana niukamnu la Uplerlawna Mempulwatnu.

²⁵ La'pa ittuin tiar lia do'a-hala ralamni yoma tamta'at rira pa tlernohora ir yawewalli, hade emekwalima rtot it la ir tototni ralamni. Mere la'pa itsa'ar it mormiorni la'a Itmatromlawanni Makdenrer die, de E ed mak kruwun reri ita.

²⁶ Riy rahu nhi'inde rla rwahaka gai lia mak ktorna-krautu totpa rtulan la ira, mere eneknek to'ama Orgahi-Orha'a Nmeh'a maka kodnian it la'a plola-mneha wawannu.

²⁷ Riy samomuou ralamni sukni tia'ala riy yatyata. Emekwalima riy yatyatni re gaini rpetan la riy samomuou.