Rano'a 28 - Alkitab bahasa Luang

¹ Riy yatyata re rawlar mere rira edonna rhokra re. Mere mak kden la ploini-ple'erni rparan die emeknekama ohpora-ahu diawra.

² La'pa riy harahu sukni rmalawna hairi, de o'tani-matni rherun la'a-rherun maia. Mere la'pa o'ta-mata riy mak katu de hairi edonna rwaler la genni, mere namteman plalahwa.

³ La'a riy mak kakleha-kaplara maka rutni-rdahla reria riy mak kakleha-kaplara re korni maka kla' ta'eni-kmai ta'enia, de emeknekama otna-anni mak kweyata-kwaniaga rieiki la ya'ana-yemnu.

⁴ La'pa he' ed mak edonna katlina-katailla Uplerlawna riorni-liaini deullu-tatarni de rrekna-rwaiti rhormata-rkanala riy yatyata-halala, mere he' ed maka katlina-katailla riora-liai de nora riy yatyata-halala re rwahapra lia'ara-rwarahmi wehla.

⁵ La'a riy yatyata re raplin niohora retlia rira niukamnu rdella plol wawannu. Mere la'a riy maka khu'ru-khelam la Orgahi-Orha'a nanpena rna'erit nan memna rhi'ina-rella yala'ani.

⁶ Samomuounu de takleha-taplara, mere it ralamni ploi-ple'era. Hornama yana tre'a-ttaru mere twakdiori-twakdieha ta'ohpa-talhara.

⁷ Tuwari mieni maka kwehwa-klakat de klernohora deulu-tatar maka ha rora-rlai tiarga, de tuwari miaka ka'o'ta-kriahluga de. Mere la'pa riy maka kwatamput lia riy mak ksukni rhopliala kupna-kai lia hadom mak edon kperkuna, de ed mak khi' amola-ma'a amni inhatte.

⁸ Riy mak kre'a-ktaru, mak kal kupna-kai lia riy ra'otna de nnairia ya'itarni-yalawanni, hota naplin niohor neka tniarnu re ntuin tar targho'ola la'a riy maka nhi'inde kara'a-kapal reria riy maka kla' ta'eni-kmai ta'enia.

⁹ La'pa o' edonna mhu'ru-mhuelam la Uplerlawna riorni-liaini, de hota Uplerlawna mana Natlin nana o sniumbainmu, de hota ralamni yotyata pa Niwra Namota.

¹⁰ La'pa he' ed maka knori-ktama riy ralma plele'era pa nhi'a-nyapia yatyatni-halalli, de hota e' orgahani maka ktuin tar lia totot de ralamni. Mere la'a riy maka ihranu ralamni ploi-ple'era, de emkameni ho'mana hota nlernana mormiori-dardiari samomuou.

¹¹ Riy mak kre'a-ktaru nhi'inde rran inonni riwra ir e ra'o'ta-rakriahlu, mere mak kakleha-kaplara makatu kwarora-kwalai samomuou de nat niohora de hya' maka ha rakotkota de edon naplola.

¹² La'pa riy samomuou mak kodi plolli de hota riy rahu sukni. Mere la'pa rlernana riy yatyata mak kodi plolli de hota lima-rora rwatrom nana la' talla kmamah'ani mana rade' apitga la wewan pona ralamni.

¹³ La'pa he' edonna nakota plele'era do'oni-halli re de hota edonna nlernana mormiori-dardiari samomuou, mere la'pa he' ed maka kwayow nohora do'oni-halli pa nhoitio'or doinia, de Uplerlawna Ntutga ralam kalwiedni la' e'a.

¹⁴ La'a riy maka ka'unni-kamta'ata khu'ru-khelma Orgahi-Orha'a de hota nler la unut lawna. Mere he' ed mak kmalawan la E'a de hota nlerwah'a gaini.

¹⁵ La'pa riy kaplialiahana ida nodi plolli la'a riy maka kakleha-kaplara, de hota emeknekama ohpora-ah diawar maka ktowur pa kiwra klihir matmata-khaw riarara.

¹⁶ O'ta-mat maka kutni-kdahla limni-rorni de rakleha nhiorat la temni. Mere la'a o'ta-mat maka sukni tia'ala rwahaka ya'untu de rnairia wniarora-wnialai yatyata-halala de hota rodi plolli pa anni-anni.

¹⁷ Mak kwunu-kwenna ida de hota lol meni-meni to' mana gaini kil lia'a-kil miaya, ne hota nden ma'ta la oliet pa itpol lia pa tiwra tora twahaur mana, niwra nneh pua nawlari wia. Pa hota nodi nieka emkade la'pa nmati. Yana mumori-mulewn e'a.

¹⁸ Mere la'a riy maka kakleha wu'u-hana la'a do'a hala de rler la mormiori-lewlewna. Mere he' ed maka khi'a-kyap die rkoili-rkaili, de hota rler wah'a gaini.

¹⁹ La'a mak kawuli-katniamnia re hota rler la rieiki-wnio'or lawna. Mere la'a riy maka khi'a-kyapia hihi'a-yapyapi mak edon kperkuna de hota rarehka-raplara.

²⁰ La'a riy maka kwehwa-klakat de ploi-ple'era de rlernana Itmatromlawanni ra'ani-pallu. Mere riy maka kiwra plet pa ktaru, hota edonna rlewan la wehla ara gai plokarni.

²¹ Mak ktorna watghudi-lokarni me tatiaili-lahannu de yan memmemna rwerat la honi. Mere la'a mak ktorna watghudi doma de rwatut lia wniotra-lie'u la' emkameni ho'mana rlernana kupna oke'ela wniotra-lie'enu re.

²² La'a riy maka tawtawra yoma ntota-nwud tio'ola inon wamueheni riwra plet pa rtaru, mere raplin niekla hota edon nalo'on wali ne kleha-lara ntuin temna de hoho'a-hayaya la' genni.

²³ La'a riy maka kpolliohora rira totpena rlola talan plollola de hota riy rala la rekna-waiti, mere maka nhi'inde rhi' nur mi'na pa rrana-rran nohora rira la heyanna de, edonna.

²⁴ La'a riy maka ktitni-ktauria inni-amni hyonni-hyanni, de ratniekame ir inni-amni gahani pede riwra kniamna'a atia'a hade, raplin niekla la' ir de de emeknekama mak kreyahru.

²⁵ He' ed mak ktota-kwud tio'ola ir inon wamueheni, nhi'nande riy rahuri-rawo'ora. Mere he' mak kha'ar aranni la Itmatromlawanni Makdenrer die, nlernan mdududga pripanni-fa'anni.

²⁶ La'pa he' ed maka kha'ar aranni la lira-yatu wamueheni, de nakleha o'ta-kriahlu, yoma hota nler la yatyatni-halalli yatlorni-yatra'ani. Mere he' ed mak katu kholi-klieta nlernohora wniarora-wnialai samomuou de hota nler la mormiori-lewlewna.

²⁷ La'pa he' ed maka kara'a-kapal reria riy kleleha-larlara, de hya' ed maka nmeh'a nakleh ma'ta de hota nlernan momuoga. Mere la'pa he' ed maka ktutup matni la riy mak kakleha, de hota nler la liokra-nhiautu.

²⁸ La'pa riy yatyatni re rodi plolli de hota lima-rora rwatrom nana la' talla kmamah'mani mana rade' apitga la wewan pona ralamni. Mere la'pa ralernia la' mtatangenni, de hota riy maka kholi-kleta plola-mneha wawannu de ra'ititar rer lia liawanni me rodi plolli.