Rano'a 27 - Alkitab bahasa Luang

¹ Yana mutulu-mupetna la'a hya' maka hota mhi'a la' repar lerni. Yoma hya' maka hota ha mliernana la repra, de o' nek de muplin niohora.

² Yana orgahamu mu'ulia orgahamu. Muolin doinia pena riy dom to'a er mak ra'uli-rawedi o'a.

³ Ralam mehra onnila riy podku hihi'ini-yapyapni narehia eni-watu werwerta.

⁴ Yawenan de niapokni-niawalli gai pietna nora wniadupla-wniahya'ala. Mere payah'a de nareh dioin harella!

⁵ La' samomuounu de itpolliohora it rimormior wialli totpena nat niohora ha plollolli mere yana itsaynia e'a mere it edon ttutga la it hihi'ini-yapyapni.

⁶ It heiwialli rpolliohor it de hade emeknekama itlernana no'a-rara, mere emkade ho'mana tatga de it heiwialli de e rsayn reri ita. Mere erammi la it arwalli re rkola-rkau it de hade nheno! Erammi!

⁷ La'pa tpehera, de yamanan mikmikri mana itahmena ta'ana, mere taplara de launu nek de it tiwra: elekde! ha mikarni neee!

⁸ La'a riy maka nawlar dioin romni de emekwalima onu-ma'nu maka kei dioinia puonni.

⁹ It heiwialli lira nnio'oni-wawa niatnu mai it de nhi' it ralamni pa naruri-nalai owa'ana. Hade emekwalima itlernana wu'ru hup mikmikri mak khi' it ralamni pa nahepru.

¹⁰ Yana mhuoratdoinia o heiwialmu onde o' ammu heiwialli. La'pa omlier la susa ralamni de yana mlia mpuaka tniulan la hyalmu mak olietleta. Mhuoratreria! La'a rom heiwialmu mak krehgorgoru re, hare rtulla-rsayn nan o'a rarehia o' inmu-narmu mak kden la olietleta.

¹¹ A'nu nee! La' hya'-hya' to'owa de mhi'a-myapia mniairia kirkira-ralma rior samomuou, totpa nhiolmu re rwokliamin nan a ralmu. La'a nhiolmu-lietmu mak kaplola de pede aliernan talan pa awuahla la he' ed mak kiwra kapolu-kalielan a'u.

¹² Riy mak katu namkek pa edon nalo'on wali ne hota hadom ntai e'a dewade nrei lia walli. Mere riy mak kaplin niohor ma'ta wniarora-wnialai la kirkira-ralma rior samomuou de nru' nian to'pa ple'er wa pa hota hadom ntaiya de ntuwun du'urnu nwag' onni de polpuol ina-wakwak ama.

¹³ He' ed mak ka'oin nana npairia rira dom otanni-arni, la' samomuounu de mak kal otna hota na'ala e hyonni-hyanni pa ntorreria totpena emekwalima kniohlima ida.

¹⁴ La'pa yawyawar ma'ta de he'a nwak kalwieda la heiwialli de nhaun matmiat niohora, de ha wniak kalwiedni de emekto'a e nlokra-nhautu.

¹⁵ Hawa pat meni mak la' ha kuku'a id to' mana petpue'tu-dadiai niohora yawunnu-yawenanni mai ita, de emeknekama otan mak kturu la' ler tetema.

¹⁶ Hota takenniana rpolliohora hawa pat de emeknekama anin maka takenniana rtoran reria onde wu'ru maka takenniana tkukmua.

¹⁷ La'pa emkameni la rnairi wehla id pa rpona la wehla doma pa naplokra, de rimormiori idma nwatut lia ida totpena wniarorni-wnialaini na'ititar rer lia.

¹⁸ Mak kahnyi' orwo'-auwo' ida hota na'ana nhyi'ini de mniotni. Emkade walia hopopna-lili'iru ida mak kar samomuou lia upni-matromni de hota nlernana rekna-waiti.

¹⁹ Itamkeka it gaini samomuou onde yata la totmemi. Emkade walia itat niohora rira ihranu ralamni samomuou onde yata de itamkek memna la ir wniehwani-liakatni.

²⁰ Rimormiori ralamni rwakwak rer tio'owa. Lera-ler nekpa ramkek hadom de ralamni nal nana. Hade emeknekama lera-ler nekpa riy rler la matmiati-molmuolu ralamni, edon rho'taru.

²¹ Leli-maha re de rala ai ra rhudia totpena ramkek nan memna maha de molanni. Emkade wal lia rimormiori. La'pa riy harahu ra'uli-rawedi ira de itamkek nan memna plola pa ir ralamni samomuou onde rtot to' ya'ulli.

²² La'pa emkameni ho'ola ratipu-rato'a riy podku ida, mere podaknu de edon nhoru eti.

²³ Mhur dioinia nhiurmu-wnia'anmu totpa ra'an wewan la nohanna-taniarta. Mutiak samomuoga re

²⁴ yoma yanpa hota re'emu-tniarmu rhoru me la' walia o genmu-tienmu la o'ta-mata mana hota edonna nodi liarni pa nodia la' tuwu.

²⁵ La' lera-ler nekpa wewan mak kmor lia'a wo'ora-kawru re de rtipna-rhewar reria pa rwa'ana nhiuri-wnia'anmu, mere la'pa rtipna-rhewra de plet pa rmormior owa'ana.

²⁶ Hota duma re wullu de mhi'a la hewewta-naniairi me pipi re mu'olga re pa mua muweli owa'ana nohanna-taniarta.

²⁷ Me la'a pipi-duma re korni de mliernana ya'ana-yemnu pa muor wutga inmu-narmu me lili'irmu-hopopanmu re mi'ina-miemnia.