Rano'a 26 - Alkitab bahasa Luang

¹ Emeknekama otna ntur lia la' ler warwuarnu, onde tah'i muti la ler panpahna, emkade walia la'a it ta'uli-tawedia riy mak kpodku-kpadku de ha genni atia' hade.

² It tlokra-tsautia riy maka edonna khala, de emeknekama onu-ma'nu maka knem la darta letgarni pa nwatiri-nwaliakar nohora niemni la' heyanna mere edon nerun pa ntai lia hadomdoma. Omliokra-mhuaut emkade to'a, mere o liokarmu de edonna na'eni.

³ La'pa itkeni tali la kuda-laidiarna nurnu totpena nlernohor ita, me tliwra totpena nawlari. Hade emekwalima liwliwra lala' reria mak kpodku re inonni, totpena eramni la' temni pa nwarora.

⁴ Yana mpuahla riy podku lirni de mliernohor e podaknu. Emkade hota mimrio' mimneneha.

⁵ Mpuahla nana riy podku de mniairi lir maka riy podku pleta-plet pa nna'erit nana totpena yana nwarora de riy mak katu id e'a.

⁶ La'pa it tsopan pa riy podku ida nodia it lirni pa nla nakota la mak kden la olietleta, de emeknekama it tamkek reria hu'ula-kriawa ida mere it tot owa'ana it lakni pa itwaraut targa it nihini, na'nama tropan watia pa tamdieran la' it genni.

⁷ Riy podku lirni-tunnu mak ha nala na nano'a-na'atu rira de emeknekama riy mak kawrik de na'it nan onni.

⁸ La'pa ta'uli-tawedia riy podku de emolmolla itkohua ra'p'ihi la' rapra'pa. Itsedua de edon nlara mere nawali owa'an pa ntai owa'an it inon wamueheni.

⁹ Emolmolla mak kma'wu ida ntepartar lia knioki la limni pa niwra nlehu dioinia kanyeu ruri mak katnyiwar la lo'mani ralamni, de hade emekwalima riy podku lirni-tunnu mak ha nala na nano'a-na'atu rira.

¹⁰ He' nala tulla-kniar lia riy podku onde riy maka ha raplin niohor ma'ta riy de illu-wniehwani de hota rhi' arukia rira liawanni.

¹¹ Emekwalima ahu nram owa'ana motni, emkade wal lia riy podku nawali owa'ana la podpodaknu.

¹² Riy mak kpodku-kpadku re e rsamou mua'ta la'a riy maka kran inonni pa kiwra e' nanpena mak katu e'a.

¹³ La'a mak kpamalmalsa re riwra: “Samounu de adien nek la roma nayanni, yoma hota alia tio'ora pa uhaka kniari de ohpora-ahdiawra rtapnia a lia talla ralamni pa rlihira-rnai a'u.”

¹⁴ Hota nden nek la lewu wawannu pa na'edul la'a-maiya inonni de emeknekama nhiari maka rtutuw la'a-rtutuw maiya.

¹⁵ La'a riy dom de pamalasni yan takot memna, la'pa nhor yamanan la wawni nek de limni werta.

¹⁶ Mak kpamalsa nran inonni niwra e' nanpena mak katu ida e'a me yatnu narehia riy mak katu wo'itu, mak nhi'inde rala lira nnio'a-wawa niatu mak kaplollola.

¹⁷ La riy maka kaplin nieka lira-tunu onni-ga'arni mere nre'ela nlernohor pa na'itra-nalawan la, de emeknekama riy maka kaplin niohora ahu diawra yehwani pa ntorna noma ntota tlinni to'pa ntoran reria.

^18-19 Riy kputra-kpalka na'ohpa-nalahara rom heiwialli dewade nwaldioin pa niwra: “Atiotpa pa akakrom to'a,” naplin niek la lirni de emekwalima riy mak kga'u ida e nnairia ra'p'ihini mak klomlomra makodia matmiati-molmuolu.

²⁰ La'pa au nhor lia li'ina ralamni dewade ai nmati mtiete'ela. Emkade walia riy mak kod niuru nhoitio'or wa dewade mak kawenna re mana ranewar wa.

²¹ La'pa ai kwiari nora au rden ma'ta la li'ina ralamni, de ai e na'an ma'ta. Hota emkade walia la'a riy maka sukni la yahuri-yawo'ora er maka rhi'a yawunu-yawenna.

²² Riy sukni ratlin la lir yapupu-yaheri re pede rta'wa targa tlinni pa rkenia la ralamni, pa emeknekama ra'ana-remnu ya'ana-yemnu mikmikri-lamliamni.

²³ Emolmolla riy rala perak turnu ra rtutwua ran tani, emkade walia la'a riy mak knur mi'na mere ralamni re yata.

²⁴ Riy maka kagai pietna de ranur mi'na mere la ralma-riorni de nna'ohma yatyatni.

²⁵ Tamkek la de gaini namalmiali, mere yan memmemna tpesiaya yoma yata-hala nwah'a nan oleka nhioratni.

²⁶ La'pa nade' gai pietanni ho'mana hota riy mutliawna ramkeka putarni-palakni ohpani-laharni.

²⁷ La'pa he' ed maka kahia hu'ula pa na ntota mutwualli de hota orgahani nler tar lia ralamni. Me la'pa he' ed maka kwaklolia watu totpena ntaiya rira de hota watu nwaklol pia ntaiya orgahani.

²⁸ La'pa it ta'ohpa-talahara riy ida de emekwalima ita ralamni edonna nala e'a. Me riy maka knur mi'na nodi riy la'a yatyatni-halalli yatlorni-yatra'ani.