Rano'a 25 - Alkitab bahasa Luang

Salomo lira nnio'oni-wawa niatnu dompali maka Hiskia rhopna pa rtulsi

¹ Nhoru pua nmai wia hadi de Salomo nakot targa lira nnio'oni-wawa niatnu dom pali. La'pa ntutu-nte'ela Yehuda rayni id nanni Hiskia de lerni dewade nhopan pa rtulsi momuoga lira nnio'a di la puka id owa'ana:

² Ra'uli-rawedia Uplerlawna la'a genni-tienni, yoma la'a hya' maka Uplerlawna orgahani Nade'a-namoinia de rimormiori ha raplin niohora. Me la' walia riy rhu'ru-rhelam la ray, yoma nwahak pa nat niohora hya' mak kayade'a re.

³ Ray-ray re ralma-riorni, de ta'enniana rira rwaror nana yoma emolmolan nekama hletan mak kdieldelma me lyanit mak tutulu.

⁴ Ral doinia leli-mah de karte'eni totpena hota mak ktukna nhuri-nwewla leli-mah de.

⁵ Emkade walia mhuokar gota riy yatyata maka kano'a-ka'at lia ray totpena ray lodanni-hairni nawniau kdededa yoma ntorna-nrautu de nodi plola-mneha rhi'ina-rella.

⁶ He' ed mak kiwra kla kwatrom ray pa niwra nakot hadom la, de natu nodi inonni pa nlola yawa. Me yana nwehwa-nlakat de emeknekama o'ta-mat lalawna ida.

⁷ La' samomuounu de ray nmeh'a ed mak kwak pa tamtatan la gen tiutulu. Mere la'pa nhopan pa terun la it genni totpena o'ta-mata id namtatan la, de molmola-mama'a hade. La'pa mumkeka hya' maka ompuarora de nhala, de

⁸ yan memmemna muahrur pua muodia lir la mak ktoran watghudi. Yoma la'pa hya' maka omukota de nhala de hota omuola-mua'a la rira gaini ralamni.

⁹ La' samomuounu de omuora o he' wialmu mhi'a sal hadoma de miy mrio' nekpa ed maka mhi' ahorga, me rira halli maka kayawunmu de yana mpuahaur nohora totpa riy ratga.

¹⁰ Yanpa hota omlier la molmola-mama'a yoma rwet o la riy nur yatyata, me hota la' o mormiormu plahwani de rira edonna rpesia'yu.

¹¹ Itala lira nnio'a-wawa niatu mak kaplol meman la genni, de emeknekama tsuri-twewla leli-maha maka yamkekni samomuou memna.

¹² Riy mak katu lira pniolliohorni de nodi untu la riy mak katlina-katailla. Yoma lira pniolliohora de emeknekama leli miaha-kdieli miaha weli wierwerta.

¹³ La'pa riy maka ha rhopna nlernohora reria mak khopna e'a lirni dewade mak khopan de ralamni namtiertiernu pa emekwalima ger wokwiok miaka mak kreiki-kwo'ora remnia.

¹⁴ He' ed maka kran inonni pa nakottarga hota nala limtutnu-limho'oni, mere edon nala hadomdoma, de hade emeknekama wowta-kakma mak anin lawna nod lia'a-nod miai mere hota otna edonna ntur wali.

¹⁵ It edon pleta-plet pa tawenna, mere tala lira mnapla ta taltieri lia, de hota o'ta-mata rpesiay ita me hota la'pa he' ed maka kahmen memna rreiniana it wakwakni de rherun doinia nhiolli de mai ita.

¹⁶ Herwalia ta'ana-temnia gan tiuru liawanni yoma hota tiwra tamota.

¹⁷ Yana lera-lera nekpa ma mpualoha-mpualakat la rom heiwialmu, yoma hota ralamni npen wua de hota sukni tia'al wa.

¹⁸ He' ed mak kodniana riy mak khala me nalahar pa nwaghal riy mak kakleha do'a-hala de hade emekwalima wehla onde au wnianalu onde ra'p'ihi ploklokra.

¹⁹ La'pa itweiwiei rieri riy maka edon rtorreri lirni totpa rtulla-rsayn ita la' ler maka itler la susa ralamni, de hade emeknekama it tala it nihini mak kahyoyoi ta takwi'i onde it tala' de it lakni nwaini-nwaini.

²⁰ Twatunu-twahniar la'a mak kler la kleha-lara polpuol inni-wakwak amni mere it edon ttulla-tsayni ira, de emeknekama it tlehwa mak ksusa rella la'a mela wokwioki, onde emekwalia it tawdia'ia sidu la ir no'oni.

²¹ La'pa o' arwalmu naplara, de muala na'ana, ne tiernu kerna de mual ger la nemnu.

²² Yoma hota omhi' emkadella' e'a de hota nmola-nma'a pa nherun doin hihi'ini-yapyapni, ne hota omliernan memna hihi'imu-yapyapmu de wniahlani la Orgahi-Orha'a.

²³ Hota plola! Anin mak kgot warta de nodia otna pa nturu. Emkade wal lia tapupu-taheria rira de hota nodia yawunu-yawenna.

²⁴ Samounu de taliu'ut la'a heyanan la likit ku' di pohnerni, hornama yan tor wutga it hawni pata maka la' ha kuku'a id to' mana petpue'tu-dadiai niohora yawunu-yawenanni mai ita.

²⁵ Tlernana kot samomuou la'a noh olietleta de emeknekama it temnia ger wokwioki.

²⁶ La'pa riy samomuou mere nwaldioin pa nlernohora rira pa nhi' yatyatni-halalli, de emeknekama ger ormat mak kwalia la ger mak kmokla-kmahu onde ger tnyip muaka kakdieha-kaktiahli.

²⁷ Yana muemnia gani lawlawna. Ne hota emkade walia yana mtiot rer nieka ya'ulmu.

²⁸ La'a riy maka takeni nodi samomuou inonni de emeknekama leta-ruhuna maka lutarni-wa'arni ro' dodioin olekwa.