Rano'a 24 - Alkitab bahasa Luang

¹ Yan mememna ralammu nal nana hya' ed maka riy yatyata gahani me yan mpuahak pa muora re mpiatam putu.

² Yoma la'a ira wniarorni-wnialaini penpuenu-tetem la maklekla-makdiaini, ne rwahaur nohor neka la'a hya' maka hota nodia riy lia yatyatni-halalli yatlorni-yatra'ani.

³ Itnairia kirkira-ralma rior samomuou pa itariria it romni.

⁴ Me la'pa itatu de hota la' it romni nayanni de itlernan neka hya'-hya' to' mak kalwiedweda.

⁵ Mpuakdieh'a pa mpualia la riy mak katu kwarora-kwalaiya kirkira-ralma rior samomuou. Yana mpuakdieh'a pa mpual lia riy mak karuri-ka'orta, yoma lira-yatu de nareh dioinia ruri-lai.

⁶ La' hade pede la'pa it edonna tler ma'ta la ara ralamni de tatlin la mak katu kano'a-ka'atu re lirni. La'pa mak katu kano'a-ka'atu harahu erla, de hota yeher to'ama itler la unut lawna.

⁷ La'a riy mak kpodku de takenniana nwarora-nwalai niana kirkira-ralma rior samomuou. Ta'enniana nakota hadomdoma la leta puohrani gaini, de gen miaka ina-ama leta nhi'inde humra-kailia.

⁸ La'pa hameni ed maka kwarora-kwalaiya yatyatni-halalli de hota rwet harella mak khi'a kokokna-rariarni.

⁹ Riy podku lira nnia'ailli de do'a-hala de. La'a hameni ed maka sukni kahe'i-kamalia lira-yatu de riy honona sukni tia'ala e'a.

¹⁰ La'pa aruple'a nal o'a la'a ler maka omlier la susa ralamni de rwet o la mak kakleha oleka ruri-lai.

¹¹ Yan mumta'ata mumori-mulewna riy mak edon khala mak ha riwra rukum penna. Muhak talan pa mulewna riy maka ha rlidan nohora pa riwra rla rwair wenna.

¹² La'pa o' edon mulewna ira mere muheri-muhelta inonmu muiwra: “Plola pa a'uplin niohora riwra rla rwair wenna!” Mere mu'ererma! Uplerlawna e Nlina-nmat re'ru. O ralma-riormu honona re de E Natga me hota E' ed maka khudi-kpara de. E' ed maka kwoili-kwahla rimormiori honona hihi'ini-yapyapni.

¹³ A'nu nee! Mu'una-muemnu gan tiuru, yoma ha samoga. Me gan tiuru re it temnia de minmi'na.

¹⁴ Emkade wal lia mpuakdieh'a pa mliernana kirkira-ralma rior samomuou yoma ha samoga. La'pa mpualia la riy mak katu de mlier la mormiori-dardiari samomuou me mliernana hya' ed maka mhua'ar aranmu la.

¹⁵ Yana mhi' emeknekama riy yatyata re pa mnia'ohma pa mpuarui-mpuate'la la riy ploi-ple'era re hyonni-hyanni nor wutga romni-lewnu.

¹⁶ Yoma la'pa emkameni ho'ola riy mak kaplola re rtuin pa rtuini, mere hota namat pa ntutrier owa'ana. Mere erammi! Hota rwaldioinia de la' he' ed maka khi'a-kyapia yatyatni de hota anin tipru-anin warta nmai die nwal lia riwtu-hora pa ndorin watwiatia du'urnu re pa pala matia re.

¹⁷ Yan muhepur nohora arwalmu re rler la rururi-karkiarti pa polpuolu-wakwaka. De la'pa rwaga onni me rhokal du'urnu, de yana mihepru yoma o ralammu nmikir wenna.

¹⁸ Yoma erammu! Hota Orgahi-Orha'a Nlina-nmat o' de riy yata id o'a. Ne hota E' edonna Nukum pal lia arwalmu de.

¹⁹ Yana herieri-walwialmu yoma mhuoratnana riy yatyata rler la pripanni-fa'anni. Yan memmemna ralammu nal nana hya' ed maka riy dodo'a-halala gahani.

²⁰ Yoma hota hya' ed maka riy yatyata re rha'ar aranni re ha molga. Hota ir emeknekama wa'du maka ha lielam penna.

²¹ A'nu nee! Muatu mu'unni-mumta'ata Orgahi-Orha'a me muatu mutota-muwawa ray. Yana muor wutga riy mak ka'o'ta watu pa edon mitlina-mitailla ir rora.

²² Yoma hota la'a mtatande nekpa mlier la yatyatni-halalli yatlorni-yatra'ani. Yoma niukum matmiat liawan de nwatiawua Orgahi-Orha'a me la'a ray.

²³ La'a riy maka ralma-riorni plahwa re lira-nnio'a wawa-niatnu hadi wali: De mak ktorna watghudi-lokarni me tatiaili lahannu de yan memmemna rwerat la honi.

²⁴ La' meni-meni to'a de, la'pa mak ketlia mak khala re lira-tunu, de riwra ha raplola, de hota riy rahu hota rlokra-rhautia me ranuru-ratierga pa rwohor weyata-rtatar weyata.

²⁵ Mere la'pa mak ktoran watghudi meni mak kukmua mak khala, de hota ha nlernana mormiori-dardiari samomuou, me rira hota rhu'ru-rhelma.

²⁶ He' ed maka kwahla it yatianni nnairi lir mak kaplollola de e' de emekwalima it talanwalli mak ksayn matmiati ita.

²⁷ Yana mpuarora-mpualai pleinia mehlima-marya'a yoma o' edonna muwuli-mutniamin ma'ta, me edonna mliernan ma'ta tulla-kniari totpena ma mtiera-mliahga hapmu-a'namu.

²⁸ Yan memmemna mtiutrier pia muodniana rira lirni-tunnu de mukleha wniatikil genni mak kaplola. Me yan walia mu'akla de.

²⁹ Yan omiwra: “O' inhatti eno! Dodo'ondi de awuahla o hihi'imu-yapyapmu maka lera o mhi'a la mai a'u.”

³⁰ La' lera ida ne aliola riy pamalmalsa ida nhyi'ini, maka nhi'inde ha ntamnia lokrahi (anggur).

³¹ Mak a'umkek nana la pamalas podpuoduk de nhyi'ini ralamni de eneknek to'ama kanyeu, kiarti, nor wut nieka wewnih'i mamain pa rdeh'a nana nhyi' de. La'a nhyi' lutarnu nek de ratpuor doin momuou lia.

³² La'pa umkek reria nhyi' de noma awuarora la a ralmu dewade awuaror nana talla ida de emkadille:

³³ Plola! La'pa it matni pre'eta pa tanin it wa, ne la'pa tamat wa dewade triw it limni nhorwua noma tren kuku' it owa'ana.

³⁴ La'pa it tsi' mamainia emkade de hota kleha-lara lerni pa nmai wia de emeknekama mak kwuri-kgalmu nora mak reyahru e rler temna it de rodia keki-rautu.