Rano'a 23 - Alkitab bahasa Luang

¹ La'pa omuora o'ta-mat lawna ida mimtatan wut lia ya'ana, de nhiorta ndella temmu! Omuora he' mimtatan wutu pa mi'ina?!

² La'pa omuiwra mu'un lalawna, de mutatahan ralammu la ya'an de!

³ Yan memmemna muya'ante'ela la'a ya'ana-yemun mikmikri-lamliamni maka ha rhoi tiaru re. Yoma yanhi' pa hade entot o'a.

⁴ Yan memmemna mpuadieh pa mpual lia riy mak kre'a-ktaru. Yoma riy mak katu kwarora-kwalai samomuou de edon rhi' emkade.

⁵ Yoma hota edon nalo'on wali ne re'emu-tniarmu re ha molga, de emeknekama ma'nu lawna ida e nnem olek pa nmol wua.

⁶ Yan memmemna mu'un la riy tawtawra meini wawannu. La'pa nhoiya ya'ana-yemun mikmikri-lamliamni la o gaimu ralamni mana yana muya'ante'ela.

⁷ La'pa niwra: “Muprir pia ma ta'ana.” Me la'pa miy mi'in ma'ta de niwra: “Mu'itar la! Mu'itar la!” Mere yana mpuesiaya de! Ha ralamni ematia'a de! Mere nur mi'na to'a de.

⁸ Muora pa mi'in wutu de edon nodi untu hadomdoma yoma hota la'a yamanan maka ha mtiel oleka de hota omumot dioinia owa'ana, me lir maka omukota la e'a, de samoga mere edon nreiniana.

⁹ Yana muno'a-mu'atga riy podku yoma hota edonna natlina-natailla mak ha mukotkota re honona.

¹⁰ Yan memmemna mpuareiya rira tiemni-lyannu onde mua'ala a'na riy patyata nohananni-taniaratni.

¹¹ Yoma Orgahi-Orha'a Naruri-nalai toto' memna me hota E' ed maka kodniana ir la watghudi lokarni.

¹² Mutlina-mutail samomuou lia wniatutu-wniaye'a, me muala ralammu tetema pa mliernohora lira nnio'a-wawa niatu re.

¹³ Yana ralammu nwerta-nwerat la wniatutu-wniaye'ela upmu-a'namu. La'pa omuala liwliwra ma mliwra, de hota hade edonna nmati

¹⁴ mere hota ha nler la mormiori-lewlewna.

¹⁵ A'nu nee! La'pa muatu mpuarora-mpualai samomuou de a ralmu nahepru.

¹⁶ La'pa utlina o lirmu-tunmu maka ha mukotkota re a'uhepuepur memna yoma rlol memna genni.

¹⁷ Yan memmemna ralammu nal nana hya' ed maka riy dodo'a-halala gahani. La' samomuounu de mu'unni-mumta'ata Orgahi-Orha'a la lelera-melmela,

¹⁸ totpena mlier la mormiori-dardiari samomuou me mliernana hya' ed maka mhua'ar aranmu la.

¹⁹ A'nu nee! Mpuarora-mpualai samomuou totpena mumkek samomuou lia mormiormu-dardiarmu.

²⁰ Yan memmemna mpualoi wiut lia mak kemun pa kma'wu, rora riy maka kaya'ante'a.

²¹ Yoma hota riy mak emkare hota rler la kleha-lara, me la' walia omunin lawna de hota edon nalo'on wali ne mupola-murainia pritni-phiaratni.

²² Mutlina-mutailla ammu, yoma e' to' mana o' edonna mdiella noha wawannu. La'pa o' inmu nhape'ewa, de mtiutga ya'unmu-yamta'atmu la.

²³ Mpuatut lia kirkira-ralma rior samomuou die totpa muat niohor memna hya' ed mak kaplola. Mtiorrer pitpit lia hare honona, yana mhuoitio'or doinia la.

²⁴ Ama ida ralamni sukni meman la upni-a'nani nhiolli-lietni samoga. Hota ralamni nahepru yoma upni-a'nani ratu rwarora-rwalai samomuou.

²⁵ Pede mhi' nana inmu nora ammu ralamni pa rahepru la'a hihi'imu-yapyapmu re. Emkade hota inmu mak kayori-kadar niana o'a de niniha-mamialia.

²⁶ Ama! Mumkek samomuoga a wniehwa-liaktu pa mliernohor reria!

²⁷ Patke' yatyata mak kahaka yalirni-yaliaini de hare emeknekama dedesu maka tlernan tutga de tahniokla.

²⁸ Patke' yatyata re emeknekama mak kwuri-kgalmu mak kwuw rer lia talan letgara. Rtaw nan it de rwatorna pa nhi'nande muanke'a harahu ralira-raliai pa edon rdenrer lia Uplerlawna.

^29-30 Omuat niohor oleka la'a hya' ed maka mak kemun lawna arka liawanni re rlernana. La riy mak emkare de nhi'inde rler nek la yatlorni-yatra'ani. La' mormiorni de nhi'inde rawunu-rawenna, me polpuolu-wakwaka. Tamkek la matni re rmera-rlairi, me inonni mermera-rarara mere rpehera-rma'wu pede rhoratdoin oleka la'a hya' nariei pa ramno'a-ramrara.

³¹ Yana mhur dioinia inonmu pa arka nareh'nia'nu. La'pa mumkek la klasi ralamni de arak de yamkekni de nwakwaka, ne yamkekni nmermer mikmikir la klasi ralamni me mlie'etla de nmikmikir la teltelanmu.

³² Mere la'pa repar wa dewade mu'eram nana inonmu tetema emeknekama niy miaka namni khena e nho'w ole'ku wa.

³³ Ne o matmu mana roro'a de ramkek nana hadomdoma mak edon kaplola, me nhioratmu edon namtemna, pa nurmu mamainia.

³⁴ O mu'eram la inonmu de emeknekama o' etla puou rerni tutnu la'a hletan lawna letgarni, ne o'tamu namehra nande litlitri purpurnu.

³⁵ Hota omuatniekama riy rpahara o'a pa mukota: “Riy e rpahara waklili-wakdiori a'u. Mere a'g edon u'eram nana. La'pa arka ngai dioinia la' a ga'yu de agiwra umat pa a gemn owa'ana!”