Rano'a 22 - Alkitab bahasa Luang

¹ Nan samomuou de ha weli wierta narehia re'a-tniaru muaka tanin la honi-ta'an la honi. Rira rsaynia it de ha samounu reh wialia rira rala leli-maha la ita.

² Mak ktaru onde mak kakleha rrora nekpa ramneneha la' ida, yoma Orgahi-Orha'a ed maka kakoki-kayap niana ir honona.

³ Riy mak katu de natu na'ererma totpa la'pa namkek hadoma niwra nma ntai e'a dewade nrei lia walli. Mere riy mak kaplin niohor ma'ta wniarora-wnialai la kirkira-ralma rior samomuou de nru' nian to'pa ple'er wa pa hota hadom ntaiya de ntuwun du'urnu nwag'onni de polpuol ina-wakwak ama.

⁴ Ne la'a riy maka khu'ru-khelma ka'unni-kamta'ata Orgahi-Orha'a de hota nlernana mormiori plalahwa, re'a-tniaru nora yatota-yawawa.

⁵ Totota-wudwiudi yapi'u-yaga'u de emeknekama au rururi-karkiarti me dedesu nora rapra'pa rhapet reria mak kwakdiori-kwakdieha liol genni. La'a hare honona de olie'tu la hare yoma omuhaka o lewlewanmu.

⁶ Mpiatutu-mpiaye'a upmu-a'namu re totpena rat niohora talan mak kaplollola. Ne hota rhoratrer nieka pa nodia la mto'oni-pe'eni.

⁷ La'a riy kleleha-larlara re, nhi'inde ha rahnia'ar to'ola riy mak ktaru pa nhi'nande mak ktaru rodi plolli la ira. Me la' wali riy maka ka'otna-ka'ara mana ratlina-ratailla mak kal otan la ira.

⁸ La'a riy maka rawuli-ratniamnia yatyatni de hota rreiki-rwo'or walia yatyatni pa rler la yatyatni-halalli yatlorni-yatra'ani. Pa la'awa honi de edonna rhi' owa'ana matmera-wulkgaulu la rimormiori wialli.

⁹ Riy nhioli samomuou de hota Itmatromlawanni Nara'a-napalga me Ntera-ndem reria, yoma la'a hya' maka ha nlernana, de nora mak kakleha re rhakra.

¹⁰ Mhuokar doinia riy mak katullu-kapetna, maka kahe'i-kamali lira-yatu totpena yawunu-yawenna plet pa namdiaru lol walli-walli.

¹¹ La'a riy maka ralamni kaple'era, me ltierni mnapnapla de ray sukni la nora rwaloi wiutu.

¹² Itmatromlawanni Makdenrer die, Natiak reria riy mak kwarora-kwalai samomuou totpena lirni-yatnu re rden rerlia plola wawannu, mere Nwaye'er nana mak ka'ohpa-kalahara putarni-palakni.

¹³ Riy pamalmalsa nahmena nla nkari ne nlu'ut rer nieka la romni nayanni, niwra: “Yanhi'pa alier la tio'or wa dewade ahu diawra muan liawna ida nakwera-nakwahi tiarga a lia leta ralamni, pa hota amuat mieman wa!”

¹⁴ La'a patke' yatyata nur mi'nani de emeknekama dedesu de. La'a riy maka nlernana Orgahi-Orha'a yawenanni de nler tar lia dedesu de ralamni.

¹⁵ Upa-a'na nhi'inde rhi'a-ryapia podpodku la inonni. Mere liwliwra-kakaklu ed maka kwatutga re totpena rherun doinia nhiolli la.

¹⁶ La'pa he' ed mak nutni-ndahla mak kakleha-kaplara yoma niwra nwalia la riy mak kre'a-ktaru hota nmeh'a neka nwalia la riy mak kakleha-kaplara. Emkade walia la riy mak kala hadom la mak kre'a-ktaru totpa na'ala ir ralamni.

Yano'a-ya'atu terampwotelu

¹⁷ Mutlin reria me mtia'wa reria tlinmu la a wniatu'tu-wniaye'u ri pa mpuarora-mpualai niohora. Yoma hare rwatiawua riy mak katu kwarora-kwalai samomuou.

¹⁸ La'pa a wniatutu-wniaye'u ri de mhi'targa la ralammu me mtiorrer lia totpena ompuahi' targa pa omniairia, de hota ralammu nahepru.

¹⁹ Awuatutu-wuaye' o' la' dodo'ondi totpena pesiaymu narur lia Itmatromlawanni Makdenrer die.

²⁰ La'a yano'a-ya'atu terampwotelu de atiulis momuog oleka wa pa agala la o'a. Yano'a-ya'atu re de e rpenpuen lia lira-yatu nora kirkira-ralma rior samomuou.

²¹ Hya' maka awuatut tiy o'a re de hare raplola-ramneh memna, totpa la'pa o'ta-matmu ratia'nu de ompuet la de kmemeheni.

²² Yan memmemna mhi' arukia a'na riy patyata la'a watghudi lokarni yoma nakleha riy mak hota kodnian e'a la lirni-tunnu. Yana mniutni-mdiahla re.

²³ Yoma Orgahi-Orha'a hota Nodniana hare lirni-tunnu, me hota Nlehga mak kutni-mak kdahla hare aranni la' temni.

²⁴ Yan memmemna muora riy mak katu kawenan lawna re mpiatamputu.

²⁵ Hota omtiolliohora ir yehwani ne la'pa omiwra muollia de takenniana.

²⁶ Yana mpuaran pia muno'targa hota ompuairia rira otanni-arni,

²⁷ yoma hota la'pa o takeni mpuair nana de hota o u'tamu-klunmu nekane riy rwarui-rwate'la nana yoma la'a otna-ar de.

²⁸ A'ukot targa de yan memmemna mpiareiya tiema-lianu la' tan miaka miy upmi-tgarmi ha rhi'targ oleka re wa, yoma la'a lerni la ha rhi'a de miy edonna mior la.

²⁹ Mimkek la riy mak katu ntulla-nkari kniarni. La'a riy de hota ra'ala pa nkar lia ray-ray istanni, mere edon riwra hota rtulla-rkar lia'a lima-rora ida romni nayanni.