Rano'a 21 - Alkitab bahasa Luang

¹ Orgahi-Orha'a Nawiru-nawewla ray ralma-riorni de pa emeknekama Nhi'a ger mak kwau die nlernohor neka maka ralamni ha Nakota.

² La'a rira nhiolli-lietni de matialo'onama la'a ralma-rior wamueheni de samoga. Mere Orgahi-Orha'a ed maka klin reri-kmat reria e ihranu ralamni.

³ Nhioli-lieta ilu-wniehwa mak kaplola-kamneha la Uplerlawna me rimormior wialli ed mak khi' memna Itmatromlawanni Makdenrer die, ralamni pa nkalwieda-npaitiota nareh miemna nhiurliwtu-wnialodwa re honona.

⁴ La'a riy yatyata re de ha rler olek la do'a-hala ralamni, yoma tullu-petanni re rodi plolli olek la inonni wa.

⁵ La'a riy mak kape'ela re wniarorni-wnialaini de nodia tniaru liawanni. Mere la'pa tmahruru niohora it ralma-riorni pa it ttulla-tkaria hmuakmuakru de hota tler la kleha-lara.

⁶ Re'a-tniaru muaka tlernana de edonna naploi-naple'era de hota edon nalo'on wali ne ha molga, ne nodia it la hoi-kietra ralamni.

⁷ La'a riy maka kyata-khala edon rhi' mak kaplola-kamneha la ir rimormior wialli. Rhi' hadom de rodia tekla-wuhura pa hota orgahi rmeh'a rakropan tar lia hihi'ini-yapyap wamueheni.

⁸ La'a riy maka khi'a-kyapi hala, de raplin niohora rlola loi-talla mak kaplele'era. Mere la'a riy kalwiedweda, de ratu rholi-rlet la ploini-ple'erni.

⁹ Samounu de taliu'ut la'a heyanan la likit ku' di pohnerni di, hornama yan tor wutga it hawni pata maka la' ha kuku'a id to' mana petpue'tu-dadiai niohora yawunnu-yawenanni mai ita.

¹⁰ La'a riy yatyata-halala ralma-riorni de sukni to'ola nwehwa-nlakat la yatyatni-halalli. Nakleha yatota-yawawa ya'unni-yamta'ata tniulla-sniayanni la'a he' to'a.

¹¹ La'pa riy po'ona maka nhi'inde kahe'i-kamalia lira-yatu re rlernana niukmu demade riy dom mak kaplin niohora ma'ta wniarora-wnialai la kirkira-ralma rior samomuou re rwahaka wniatutu-wniaye'a. Mere la'pa mak katu kholi-kleta rlernana lira nnio'a-wawa niatu de hota yeher to'ama o'tani-kriahlanu rpoklihira.

¹² Uplerlawna mak kden la plola-mneha wawannu, Nat niohor oleka hya' ed maka riy yatyata re rhi'a la romni nayanni. Hota Orgahi-Orha'a E' ed maka kal ir pa kwasyor tiar lia tuini lokarni-werna tetni.

¹³ La'pa he' ed mak edonna katlin la a'na riy patyata polpuollu-wakwakni, koko'oni-hererni de hota e nwaka hadom mana riy edonna ramkek la pa rtulan la.

¹⁴ Riy ida nahaka totpena mak kawenna de yawenanni namdiar wua de nhi' wunwunamnu pa nala' teman neka pa nala kupan nhiodal nurnu.

¹⁵ La'pa rden rer lia plol wawannu pa rhudi-rpara lol talanni de hota riy kalwiedweda re rahepru, mere riy yatyata-halala re ramta'at wenna.

¹⁶ La'a riy maka kahmena klernohora kirkira-ralma rior samomuou yala'ani de hota nler la mati-molu genni-tienni.

¹⁷ La'a riy maka sukni la'a nriw rer tio'a limni pa na'an wa, de riy de nler la kleha-lara. Ne la' walia riy maka nhi'inde sukni la nahoru kupanni pa na'ana-nemun lola pliorni, de ha nhi' emkameni ho'mana takenniana ntaru.

¹⁸ Yatni-halli hota nwaldioinia pa ntuin niek la riy yatyata re wawannu. Riy maka ta'enniana riy rpesiaya re er mak klernan niukum de, riy kalwiedweda edonna.

¹⁹ Samounu de tden la wo'orletna-kawurloini, hornama yana it tora hawa pat maka la' lera ntuini repar doin de nurnuru-tetierga la yawenna.

²⁰ La'a riy mak katu, de rawoka-rale'u nieka re'a-tniaru. Mere la' riy podku de hota nahoru re'eni-tniarnu.

²¹ La'pa he' ed mak kahak pa nden rer lia plol wawannu me nahak totpa ntutga tniulla-sniayni la rimormior wialli de hota nler la pripanni-fa'anni, nhiu'ru-nhielma nora mormiorni plahwa la'a nohkeran di wawannu.

²² La'a riy mak ktaru kirkira-ralma rior samomuou nwaleran la leta maka makodi keki-rautu ratiak reri, ne ngor dodioinia makodi keki-rautu re yaro'wa genni maka ha rariuwun rer lia.

²³ La'pa it tiwra oliet it la'a kropna-krieutu lui-nuhru, de taltieri die riyorahniorta.

²⁴ La'a riy mak sukni kran inonni de nhi'inde npo'on nohora tullu-petanni. Nakleha yatota-yawawa la e rimormior wialli.

²⁵ Riy pamalmalsa inonni nwerta la kniar pa rhi' hadom de rlernohor to' ir sukni pa hota rler la matmiati-molmuolu ralamni.

²⁶ La' ler matmiati liawan de ha nwarora-nwalai tio'a hya' maka ha sukni la. Mere rwaldioinia de la'a riy maka kwehwa-klakta ploi-ple'era, la mormiorni de hota nara'a-napal e rimormior wialli de edona nho' et miemna.

²⁷ Orgahi-Orha'a sukni tia'ala nhiurliwtu-wnialodwa maka riy yatyata-halala re rala, rereh mieman walia la'a rhurliwtu-rwalodwa rnairia wniarora-wnialai yatyata-halala.

²⁸ La'a riy maka ka'ohpa-kalahara rakot hadom pa riwra rodniana onde rakot nohora lirni-tunnu pa rwakdieh'a la plola, de rira edonna rpesiay kuku' eti. Mere la'pa lir maka kwatiaga mak kat niohora lira-tunu onni-ga'arni de hade ed maka ha rnairia la' watghudi lokarni.

²⁹ La'a riy maka kaplele'era de edonna nwaler la hya' maka ha niwra nakota yoma natga de e naplola. Mere la'a riy yatyata de gaini kpauga pa edonna nmola-nma'a.

³⁰ Rimormiori lirni-yatnu, o'ta-kriahlanu, la'pa lirni-tunnu wawa-niatnu ho'mana edon npar nana Orgahi-Orha'a kirkirni-ralma rior samomuounu.

³¹ Keki-rautu rwahi' targa kuda ya'ara yoma rha'ar aranni la totpena ra'unut nan ir arwalli. Mere la' emkameni ho'mana eneknek to'a Orgahi-Orha'a Nmeh' ed mak kal untu.