Rano'a 20 - Alkitab bahasa Luang

¹ Itemnia tgo'-arka de nhi'a rimormior it pa tkurangairi (kurang ajar) me nodia riwtu-hora. He' ed maka nemun pa nma'wu de, ha podaknu neee!

² Ray hankerna-ralmha'arni emeknekama ohpora-ahu diawra e rapolu, ne la'pa he' ed maka karei pia ray nawenna de hade enahak to'a matmiatni.

³ It tatga de, riy podku nanpena sukni rahuri-rawo'ora. Mere he' ed mak olieta la' yawunu-yawenna de riy ra'ulia.

⁴ Mak kahnyi'a-katlunin pa edonna ntutni-nharna nwed lutru-nwali tiani, hota la'awa rieiki-wnio'ora dewade nhyi'ini wewna rmeh'a rmor lia.

⁵ Rimormiori ihranu ralamni de emeknekama gera tnyip muaka kakdieldelma. Mere riy mak ktaru kirkira-ralma rior samomuou natu ntipua.

⁶ Riy rahu rran inonni de riwra ir ratu rtulla-rsayn ir rimormior wialli. Mere mowen nianpena itlernana riy samomuou mak emkadena?

⁷ Riy mak kden rer lia plol wawannu de nhi' hadom de ploi-ple'era, de hota upni-a'nani re rler la unut lawna.

⁸ La'pa ray nla'awa liwan genni totpa netlia limni-rorni lirni-tunnu de nlernohora ir hihi'ini-yapyapni honona mak edon kaplola.

⁹ Hota he' ed mak kgau pua niwra: “A ihru-ralmu nmou-nwitn” ooo? Onde: “A'g e ukleha do'a-hala la'a ilu-wniehwa yotyota-yatyata re honona!”

¹⁰ Orgahi-Orha'a sukni tia'ala la'a tatiaili lahannu maka kwotra-ktali.

¹¹ Upa-a'na mak samomuou, de nwehwa-nlakat la ploini-ple'erni. Itat niohora ir nhiolli yoma tamkek memna ir hihi'ini-yapyapni.

¹² It tlinni etla pa tatlina me it matni etla pa tamkeka. Itmatromlawanni ed mak khi' nana ha rora.

¹³ La'a riy maka kanin lawna de hota ntuin tar lia kleha-lara ralamni. Me la'a riy maka kdu'du rer lia tulla-kniari de rlernana ya'ana-yemnu liawanni.

¹⁴ La'pa riy rawel lia riy mak ka'olu-kala'a, de nhi'inde riwra: “Yohya'a ri edon samoga mere welli werta!” Mere la'pa rawel lia pa nhorwua, dewade rla rpo'on nohora yoma rlernana yohya'a samomuou mere welli prana.

¹⁵ La'a lira-tun mak kodia kirkira-ralma rior samomuou de hade nareh miemna maha nora watu-watu mak weli werweratni.

¹⁶ He' ed mak ka'oin nana npairia rira dom otanni-arni, la' samomuounu de mak kal otna hota na'ala e hyonni-hyanni pa ntorreria totpena emekwalima kniohlima ida.

¹⁷ La'a hya' maka ta' nana de ta'ohpa-talahar nohora, emeka ya'ana-yemnu maka mulaliaini ta'ana de wokliamanni. Mere la'pa nhorwua de emeknekama watg o'ol maka ittaut pa it nihini-ra'ani dwera-dwahaiya.

¹⁸ La'pa miwra mhi' hadom de mpiahaka lira nnio'a-wawa niatu pleini. La'pa mlier la ara ralamni de mhioratrer lia hya' maka ha rano'a-ra'at ulga tiy miy.

¹⁹ La'a riy maka sukni la kwahauria riy dom to'a de takenniana nawunmua ha kuku' eti. Pede yana miora riy maka kwahaur lawna pa mpiatam putu.

²⁰ La'a riy maka klokra-khautia inni-amni de mormiorni edon naplahwa, ne nmati mtiete'el pa emeknekama wa'du ema reu wenna pa nlol melli-kalamni.

²¹ La'a re'a-tniaru maka plet pa itlernana, de la'awa honi de re'a-tniaru re edon rodi ra'a-palu mai ita.

²² Yana mpiahla rira hihi'ini-yapyapni mak khala. Mere mhia'ar reria miy mormiormi la Itmatromlawanni Makdenrer die, ne hota E' ed mak kod nian miy.

²³ Orgahi-Orha'a sukni tia'ala tatiaili nora toptopa-tatia'u mak edon kaplola maka mniair pa ma mi'olu-mila'a.

²⁴ Rimormiori id mana naplin niohora mormiorni yala'ani mai noh di wawannu. Orgahi-Orha'a Nmeh'a ed maka ketli oleka talan mak hota itlola la it mormiorni di.

²⁵ La'pa edonna mial ma'ta nhiurliwtu-wnial odaw la Orgahi Orha'a de mpiaror samomuoga nanpena mikottarga hadom la E'a. Yoma la'pa miy edon mhi' nan hya' maka mikottarga de hota orgahami mtiokal nan inon wamuehemi.

²⁶ Ray mak katu de e nwahakhaka totpena hota natga he' ed mak khala, na'nama nala niukum werwerta la' ira.

²⁷ La'pa rimormiori rawerta-rataili ir ihranu ralamni ploini-plele'erni de emeknekama Itmatromlawanni Nmeh'a ed mak knairi wa'du pa nhita-nrepar wah'a ira ihranu ralamni.

²⁸ La'pa ray ida nkukmu-nto'ma de nod reria tniulla-sniayni me ralma ploi ple'era, de hota ray die nkukmu-nto'ma pa nodi liarni.

²⁹ Rira ra'uli-rawedi tuwari-laweru yoma la'a rurni-laini namuanu. Mere rira rhu'ru-rhelam la ina-ama, yoma la'a mortu hamamarni.

³⁰ Liwliwra-kakaklu ed maka kaul doinia yatyatni-halalli la'a it wawayanni. Me nwuri-nohma doinia rimormiori it ralma kdedeheni-ktialtiahlani re honona.