Rano'a 2 - Alkitab bahasa Luang

Riy ida nwatutu-nwaye'a la'a kirkira-ralma-rior samomuou mak kodi unut lawna

¹ A'nu ne! Mua'ala a wniatu'tu-wniaye'u ri pa mhi'a la gahamu, totpena mhuoratreria a nnio'a-nia'tu ri la' o'a.

² Mutlin reria me mtia'wa reria tlinmu la a li'ru-tu'nu mak kodia kirkira-ralma riora samomuou, mtiekal pa mliernan memna pa muatga!

³ A'nu ne! Mpuakwak rer mieman la Itmatromlawanni totpa mpual lia riy orkirkira-or ralma riora me muhaka pa muat muemna.

⁴ Muhak hare de emeknekama muhak leli-maha, me emeknekama omrur lia re'a-tniaru wniahakni, maka ha rade' targa la tani nniahi ralamni.

⁵ Emkade de hota omuat niohora la' talan emkameni pede ita'unni-tamta'ata tatlina-tatailla Orgahi-Orha'a, ne hota kirkirmu-ralma riormu naphyar pia muat niohora Uplerlawna-Mempulwatnu.

⁶ Yoma Orgahi-Orha'a ed mak kala kirkira-ralma rior samomuou. La' E' lirni pede o muat niohora haneka-harah wuawannu.

⁷ La'pa hameni nhiolli-lietni samoga, me nlola talla mak kaplele'era, de hota nlernana tniulla-sniayni la Itmatromlawanni, me E Nruwun reri ira.

⁸ Yoma Itmatromlawanni de Natiak reri riy maka rhi'a-ryap die rlol talanni, me Nruwun reria riy maka ralamni nden rer lia E'a.

⁹ La'pa mpiallia riy orkirkira-or ralma riora na'nama muatu mdien rer lia plollolli wawannu la'a Uplerlawna yamkekni me mhi' rer niek hya' ed mak kaplola la rimormior wialmu. Emkade de hota muat niohora momuou wua plola-mneh de yala'ani.

¹⁰ Yoma o lirmu-yatmu kirkirmu-ralma riormu ed mak khi'a o ralammu pa namtiertiernu.

¹¹ Onnila omuat niohora mliernohora hya' ed mak kaplola de hade ed maka kruwun reri-ka'ahla reria o'a.

¹² Ne hota hade ed maka kalewn o' la riy yatyata-halala hihi'ini-yapyapni, me nahal doinia o la'a riy mak nurnu-tiernu yotyota-yatyata.

¹³ Ir edonna rlernohora ilu-wniehwa samomuou pa hota rler tar lia loi-talan maka kmelmela-kalkalma me mak kpenpuen lia do'a-hala.

¹⁴ Ir rahepur nohora hihi'ini-yapyapni mak yata re.

¹⁵ Hihi'ini-yapyapni re rkoili-rkaili. Tamkek la yehwani de edonna nlol talla plele'era mere nhi'inde rpudi-rakla ra'ohpa-ralahara rimormior wiali.

¹⁶ Mere a'nu o' de hota mpuahak neka wniarora-wnialai mak kwatiaga Orgahi-Orha'a totpa muatu mpuayotlia patke' yatyata re yawirnu-yawewalli la o'a.

¹⁷ Yoma patke' yatyat de edonna ndenrer lia hawni onni, yoma nhortapling oleka orgahani lirni maka nano' targ olek la Uplerlawna gaini ralamni.

¹⁸ La'pa o mlia mpualoha-mpualakat la e romni nayanni de hade emeknekama o mlia mpuahi' targa dudgenmu la matmiati-molmuolu ralamni.

¹⁹ He' to'a maka kla kwaloha-kwalakat la patke' yatyata romni-lewnu de hota edonna rlol olek la loi-talla mak kodi mormiori.

²⁰ La' hade pede amoo! Mliernohor neka riy mak samomuou loini-talanni wa. Me mpuehwa-mliakat de mdien rer niek la plol wawannu.

²¹ Yoma he' maka ralamni naplele'era hota hare er maka kholi-klet la'a noh maka Orgahi-Orha'a ha Nano'targa. Riy mak kden rer niek la plollolli wawannu de e' ed makdella tan die.

²² Mere la'pa riy yatyata-halala hota Orgahi-Orha'a Nte'la nana pa Nwaliakra la lutur lawna to'orni la'a let de. Riy maka la' mormiorni de riy edon rpesiay etia de, de emeknekama wewan maka ha rwuh dioinia la' tan die.