Rano'a 19 - Alkitab bahasa Luang

¹ La' samomuounu de it mormiorni raplele'era la' emkameni ho'mana itakleha-taplara. Mere yan mememna itwalia la riy podku mak sukni ra'ohpa-ralahara.

² La'pa it tala it ralamni tetema pa tsi' hadomdoma mere it edon twaror samomuou niohora ho'mana yat walia. La'pa riy maka nkar pia nmahruru pua nhoru de hota hya' mak nhi' de nhal to'owa.

³ Rimormiori rtot arukia inon wamueheni yoma la'a podaknu, mere rwaghala Orgahi-Orha'a.

⁴ Mak kre'a-ktaru mutnu-rahanu ra'ititar rerlia. Mere mak kakleha-kaplara ho'de to' owa'ana. Yoma wonyira tamkeka de riy ida-woru ra'itra e'a. Mere reprepar rer mia'ta dewade mutwualli re rmol wua.

⁵ La'a riy maka kputra-kpalka la'a mak ktorna watghudi gaini, de emkameni ho'mana rlernana niukmu.

⁶ Riy rahu sukni ra'ala riy lalawna ralamni. Ne riy honona sukni rwakrian reria riy mak kara'a-kapalu.

⁷ La'a riy mak kakleha-kaplara de inni-narni amni-hyalli rparwah'a nana. Rereh mieman la heiwialli re honona. La'pa niwra nrehgorga pa npolga ho'mana rhoitio'or doin olek e wa.

⁸ La'pa he' sukni la nlernana o'ta-kriahlu de emekwalima e nsayn reria inonni me la'a he' ed maka khoratreria la'a hya' maka ha nlernana la wniatutnu ralamni de hota mormiorni nler la samomuounu.

⁹ La'a riy maka kputra-kpalka la'a mak ktorna watghudi gaini, de emkameni ho'mana rlernana niukum matmiati.

¹⁰ La'pa riy mak kpodku nwalia mak ktaru de edonna nla' nana it ralamni. Mere yatyatni rehia de ata-wa'ara ida nodi plolli la upni-matromni.

¹¹ La'a riy mak katu de edonna plet pa nawenna. Riy ra'ullia yoma edonna nhoratreria rira do'oni-halli la' e'a.

¹² Ray nawenna de emeknekama ohpora-ahu diawra e rapolu. Mere ray ntutga ralam kalwiedni de emeknekama howna-kgara nape'era-napahia yawuli-yatniamni.

¹³ Upa-a'na mak kpodku de, hota ntota amni la yatyatni-halalli yatlorni-yatra'ani. Me la'pa it hawni patke' maka nhi'inde nwohora-ntatra, de emeknekama ger maka kadwia'i pa nodi liarni.

¹⁴ La'a likti nora re'a-tniaru korni de nhi'inde tlernana la it inni-amni, mere it hawni pata mak katu kholi-klieta de Itmatromlawanni ed mak kala.

¹⁵ Inon werta de nhi' rira pa rhel wioranni la yanina, mere ntutu-nte'ewa dewade nmat liara.

¹⁶ La'a hameni mak khu'ru-khelam la Uplerlawna riorni-liaini de hota nlernana mormiori-lewlewna. Mere la'pa hameni edonna nhu'ru-nhelam la de hota nler la matmiati-molmuolu.

¹⁷ He' ed maka ktulan la riy mak kakleha, de emekwalima e nala kupan la Orgahi-Orha'a na'otna-na'ara pa meman neka la otna-ara, de Orgahi-Orha'a Nhernia.

¹⁸ Mpuatutu-mpuaye'a a'namu la' ler maka kuku' ma'ta de edon na'o'ta wat mua'ta. Yoma la'pa edonan de emekwalima o' e mlielgam reria yatyatni-halalli matmiati-molmuolu la'a a'namu.

¹⁹ Rolin doin neka mak kawenan lawna re pa pena orgahi rlernana hihi'ini-yapyap wamueheni wniahlani totpa la' talan emkade pede plol toto'a pa hota rhoitio'or doini hihi'ini-yapyapni mak edon kaplol de. La'pa edon rlernana wniahlani de hota inni-amni ramau tiar lia ya'ursu halli.

²⁰ La'pa o sukmu la wniatutu la o'a, me mutlina-mutailla rira lira nnio'oni-wawa niatnu de hota la' hohoni de mpual lia riy mak katu kwarora-kwalai samomuou.

²¹ Rimormiori honona nhi'inde rwaror nohora hya' ed maka ha riwra rhi'a. Mere hota Orgahi-Orha'a nanpena ed mak ketlia hare honona pa rayamkeka.

²² Rira nhiolli-lietni maka ha rahaka la riy nenenna, de totpena e sniayanni nden rer lia rimormior walli. La'pa rakleha-raplara ho'mana hade samou ma'ta. Mere yan mememna rputra-rpalka la mei watghudi.

²³ Mu'unni-mumta'ata mhu'ru-mhuelma Orgahi-Orha'a totpena mliernana mormiormu-dardiarmu. Emkade hota o' ihramu-ralammu namtiertiernu, me edonna mlier la yatyatni-halalli yatlorni-yatra'ani.

²⁴ La'a riy dom de pamalasni yan takot memna, la'pa nhor yamanan la wawni nek de limni werta.

²⁵ La'pa riy po'ona maka nhi'inde kahe'i-kamalia lira-yatu re rlernana niukmu demade riy dom maka kaplin niohora ma'ta wniarora-wnialai la kirkira-ralma rior samomuou re rwahaka wniatutu-wniaye'a. Mere la'pa mak katu kholi-kleta rlernana lira pniolliohora de hota yeher to'ama o'tani-kriahlanu rpoklihira.

²⁶ A'na maka knahora-knala'a amni me khokar doinia inni, de upa-a'na mak kodi molmola-mama'a la inni-amni.

²⁷ A'nu ne! La'pa muhmena mutlina-mutailla lira nnio'a-wawa niatu de hota emeknekama lira-tun muaka ha mliernana oleka re de ha molga re.

²⁸ La'pa omuala lir maka omtiutrier niohor pa omukota la mak khudi-kpara gaini de omulahar pa omuolta-muautia, de emekwalima o' edon pusin nohora yaweratni-yatailli mak kodi rhi'ina-rella. Riy yatyata re sukni meman la rtota rira la yatyatni-halalli.

²⁹ Mak kpo'ona mak kahe'i-kamali lira-yatu re hota rlernan memna niukamnu. Mak kpodku-kpadku edon rawlar lia liwliwra-kakaklu.