Rano'a 18 - Alkitab bahasa Luang

¹ Tamkek la riy maka kahal doinia inonni la riy doma, de ha nnia'eratni de riy' de eneknek to'ama ntota-nwud tio'ola inon wamueheni. Nhi'inde nparwah'a riy mak ktaru kirkira-ralma rior samomuou re lira nnio'a-wawa niatnu.

² La'a riy mak kpodku yehwani de nahmena rira rala ralma-rior la e'a. Eneknek to'ama sukni la nakot nohora e ralma-riorni.

³ La'pa itsi'a do'a-hala de hota riy rakleh oleka nhiu'ru-nhielma mai ita, me la'pa itsi'a-tyapia mak kodia molmola-mama'a, hota riy rwohora-rtatra ita.

⁴ Riy mak ktaru kirkira-ralma rior samomuou de lira nnio'a-wawa niatnu de kdielamni emeka hletan lawna wikwikni, ne emeka ger mak kwau.

⁵ Yan memmemna todniana riy malawlawna, ne twaldioinia pa ttutni-tdahla riy maka edonna khala la watghudi lokarni.

⁶ La'pa riy podku yaltierni de, nodia yawunu-yawenna. Emekto'ama e nwahaka liwliwra-kakaklu.

⁷ Lir maka ha nakota re de nweyata-nwaniag owa'ana inonni. Orgahi ntokal nan inon wamueheni yoma lirni-tunnu re.

⁸ Riy sukni ratlin la lir yapupu-yaheri re pede rta'wa targa tlinni pa rkenia la ralamni, pa emeknekama ra'ana-remnu ya'ana-yemnu mikmikri-lamliamni.

⁹ La'a riy maka edonna kla kar lia kniarni de emekwali riy yatyata ida mak nhi'inde nweyata-nwaniawu.

¹⁰ Itmatromlawanni Makdenrer die, emeknekama il tutulu ida. Riy mak kaplele'era re rawlar lia E'a. Yoma la'a E' de, de riy mak kaplele'era rler la gen miaka kamtiertiernu.

¹¹ Mere mak kre'a-ktaru ratniekame hota re'eni-tniarnu ed mak kruwun reria ira, yoma rwarora de tniarnu re emekwalima leta lutur tutullu mak karuri-ka'orta pa nle'u niana leta.

¹² Riy mak khi' inonni pa katulu de hota rala la yaw de rtuwun watwiatia du'urnu la tani kierna wawannu. Mere la'pa riy mak katu khu'ru-khelma de riy ratota-rawawa.

¹³ He' ed mak edonna katlina-katailla rimormior wialli mere pleta-plet pa naltieri yoma nat nieka e natga olek hare honona, riy de nhi' oleka hihi'a-yapyapi podpodku-padpadku hade, me nodi molmola-mama'a la inon wamueheni.

¹⁴ La'pa riy maka nwatekal pa nmormiori, la' ler mak nlernana nnieni-nhiena mehra-mau ho'mana ralamni e naruri-nalai ma'ta. Mere la'a riy maka ralamni nsus doin la lelera-melmela de ta'eni ntahan nana mormiorni.

¹⁵ La'a riy mak katu kholi-kleta de tiernu kerna la lira-yatu. Enahak reria totpena nlernana kirkira-ralma rior samomuounu.

¹⁶ Limtutu-lakga'a mak itodia ed maka kwahyari talan totpena itler la riy lalawna gaini ralamni.

¹⁷ Mak kaltier lia mulaliaini la' yawoka-yale' liawna mak khudi-kpara, de it itiwra naplola. Mere la'pa mak ha nora kwahapra lia'ara nakot walia hanni, nampena makhudi-kpar retlia lirni-tunnu re la plol wawannu.

¹⁸ Rhedga patui nanpena yahuri-yawo'ora namtie'el taru. Emkade pede o'ta-mat lalawna maka kwatoran wut lia mei wawannu rwapahar lima-rware'et mat wa yoma ir honona rla' olek lir id wa.

¹⁹ La'pa itsi' it hyalli pa ralamni namehra de hota e' edonna rwakrian owa'an it wa, ne tahaka de nala'a kdiordior wia. Nahmen memna nhoratdoini it do'oni-halli la' e'a. Hota yawenanni de emeknekama rho'pa matmiati liawna id pa ra rho'pa targa letlawna ida puohrani.

²⁰ Ora-au maka na'unu-nayeh nohora wo'a samomuounu de ora nhyi' de, na'an lola-nemun lola. Emkade walia lira-nnio'a mak samomuou de nodi mormiori me rhi' rira ihranu ralamni pa namtemna.

²¹ It namni nodia ulin pa na nalewna mormiori onde nwunu-nwenna. La' lira-tun muaka klergot la it nurnu de it orgahani tutulu-takwara.

²² Muan muaka kmehlim olekwa, de ha rlernan oleka ha samomuounu la Uplerlawna. Yoma it hawni pata re emeknekama ra'a-palu maka Itmatromlawanni Makdenrer die, Nala mai ita.

²³ Mak kakleha-kaplara rwak lilili-mamuau totpa maktaru rtulan la ira. Mere mak kre'a-ktaru nhi'inde rwahla de rkamot ira.

²⁴ Rira rwatalan de lera dom de idma edonna rla'a-rmai ida, mere la' dom de idma nkulit reria ida pa tatniekame ha rwahyali raralma.