Rano'a 17 - Alkitab bahasa Luang

¹ La'a samomuounu de ta'ana yamanna wra'u ralamni tututu mere it idma nhi' samomuou ida. Hornama yan ta'ana lawruru awrieha wra'u pala penga, mere tawunu-tawenan nohora.

² Ata-wa'ara hopopna-lili'iru mak ktaru kirkira-ralma rior samomuou, de hota nodi plolli la matromni upni-a'nani mak khi'a hihi'a-yapyapi mak kodi molmola-mama'a. Ne hota nwaga matromni a'nani de pa nlernan nhiakra pa nora matromni a'nani korni ramneneha.

³ Leli-maha de rala ai ra rhudia totpena tlernana maha molanni. Emkade walia Orgahi-Orha'a ed mak kta'aga it ihranu ralamni totpena Nlernana he' maka ihranu ralamni plolioi-plele'era.

⁴ Riy yatyata sukni ratlina wniahaur yatyata. Ne mak kputra-kpalka sukni ratlin la yapupu-yaheri.

⁵ La'pa he' ed maka nhi' amola-ma' riy mak kakleha, de hade napolu-naliel oleka Orgahi-Orha'a, yoma mak kakleha-kaplara re E limni enni ir wali. Me la'pa he' ed maka kahepur nohora rira kleheni-larni, de riy' de genni namtemtemn olek la niukmu ralamni.

⁶ Hamto'a-hape'a rayadil lakni yoma upni re rpenpuenu tetema. Ne upa-a'na wali miana rayadil lakni yoma inni-amni honona rdena.

⁷ La'a mak kpodku-kpadku de yana rwahaur de rtot pa rnairia lir marna. Mere mak yatyat rehia de o'ta-mata marna-wuhura rputra-rpalka.

⁸ Riy dom de sukni rnairi kupna nhiodal nuru. Yoma rwarora de rnairi kupna nhiodal nuru de hya' maka riwra rhi'a de hota pleta-plet pa ntutu-nte'ewa.

⁹ He' ed mak khoratdoinia rira do'oni-halli nhi'nande riy idma nkalwied nohora ida. Mere riy ida nor mutwualli rawo'ora yoma idma nwetwet rer lia ida halli.

¹⁰ Mak katu kholi-kleta ida riy rpolliohora, de nleretniekla natlin la, mere riy rliwar muanu id mak kpodku pa namrorohola genni ho'mana ta'enniana nollia nhiolli.

¹¹ Riy yatyata nhi' nekpa rira polpuolu-hawaunia la' leta ralamni. Mere hota o'ta-mata rhopan doinia riy rla rler temna pa rliwra-rkaklia rwatei-rwahapra.

¹² La' samomuounu twatroma mdudud niana ahu puor matra'na ida mak ktowr ita onnila natiak a'nani. Mere mak yatyat rehia de, itlernana riy podku-padku la' ler maka nhi'a-nyapia yatyatni-halalli.

¹³ He' ed maka kala yatyatni ka kwahla samomuounu, de hota emkameni ho'mana yatyatni de nden owa'an la pa na'ititar rer lia pa edonna nlergot la roma nayanni.

¹⁴ La'pa riy riwra ror it pa tawo'ora, pleta-plet pa itlar dioin la e'a. Yoma la'pa tawo'ora de hade emeknekama gera mak kmai lia puou ida ralamni lola hu'ul kuku' ida mere hota edon nalo'on wali ne gera npenpuen liola pa ittepar wa.

¹⁵ Orgahi-Orha'a sukni tia'ala rira rodniana riy malawlawna, me la' walia la'a riy maka kwaghala riy mak kaplola.

¹⁶ Persum to'ola riy podku nahorga kupan pa na nwahaka totpa nwalia la riy mak katu. Yoma riy mak kpodku-kpadku sukni tia'ala wniatutu-wniaye'a.

¹⁷ Wniehwa-liakta samomuou de it edonna taloi dioinia it talanwalli, ne la'a riy ida nora hyalli mana la'pa ida nler la susa de rewre'wa pa ramkek la sniusni de.

¹⁸ La'a riy maka kano' tar pua nhernu mutwualli otanni-arni, de ha npodku.

¹⁹ Rimormiori miaka suksukni nhi' do'a-nyap hiala de nhi'inde sukni rahuri-rawo'ora. Me la'a riy maka nurnu re inponni de hota nler la yatyatni-halalli yatlorni-yatra'ani.

²⁰ La'a riy maka kputra-kpalka de hota edon nler la kalwiedni-paitiotni. Maka namni nasila de hota nler la yatni-halli.

²¹ La'pa it upni-a'nani rpodku-rpadku de it ihranu-ralamni nmayo' doin la, ne ralma yaniha-yamali oke' mana edona tlernana.

²² Ihru-ralma yaniha-yamali de, emekwalima koda-atiawi la' it inonni. Mere la'pa it ralamni nmolu-nhelma de nhi' it inonni pa nakleha ruri-lai wia.

²³ La'a mak ktoran watghudi maka klernana kupna kniukum nuru de edonna rkokan nohora. Yoma edonna rlola loini-talanni mak kaplola.

²⁴ La'a riy mak katu de nwahak to'a pa nlernana wniarora-wnialai samomuounu. Mere la riy podku ralma-riorni de la id mana edonna nlernan walia.

²⁵ La'a upa-a'na mak kpodku de rhi'a inni-amni pa rler la susa, me nhi'inde inni lului-nurnuhru nohora.

²⁶ Yana itsopna riy mak edonna khala rpairia denda, yoma ha talanni atia' hade. Ne la' walia riy maka ha rhu'ru-rhelam maka hihi'ini-yapyapni kalwiedweda re, yana rukmua, yoma ha genni atia' hade.

²⁷ La'a riy mak katu kholi-kleta de edonna naltieri liawanni me nhi'inde namtiete'ela genni.

²⁸ La'a riy mak kpodku dom nek de tatniekame mak katga de, yoma edonna nhari et lirni.