Rano'a 16 - Alkitab bahasa Luang

¹ Rimormiori rwarora-rwalai pa hota rhi' hadoma. Mere Orgahi-Orha'a ed mak ketlia it hihi'ini-yapyapni.

² La'a riy ida hihi'ini-yapyapni de matialo'onama orgahi niwra samog oleka wa, mere Orgahi-Orha'a Nat niohora e ihranu-ralamni de naplolioi-naplele'era me edonna.

³ La'a hya' maka ha miwra mhi' nana re honona de muotil neka la Orgahi-Orha'a, ne hota hya' mak omiwra mhi'a de honona rler la ga'a.

⁴ Orgahi-Orha'a Nhi'a hare honona totpa rlernohora hya' ed maka Nwarora-nwalai tiarga oleka. La'a riy yatyata-halala nekane, Nror targa oleka pa hota rler la yatyatni-halalli yatlorni-yatra'ani.

⁵ Orgahi-Orha'a sukni tia'ala riy maka katulu-kapetna re honona. Hota plola, Orgahi-Orha'a edonna Nolin doinia riy id la ira pa nlewan la niukmu.

⁶ Mere la'a riy maka ralamni nden rer lia Uplerlawna de hota Namou-nawitna do'oni-halli. Me la' walia riy maka ka'unni-kamta'ata katlina-katailla Orgahi-Orha'a hota edonna nler la yatyatni-halalli.

⁷ La'pa hihi'imu-yapyapmu re rhi' nana Orgahi-Orha'a ralamni pa nahepru, de hota Orgahi-Orha'a Nhi' o' pa omuor arwalmu re mkialwiedwa.

⁸ La' samomuounu de mliernana siepmu-kaimu oke'a nmeh'a, hornama muplele'era. Mere yana mputra-mpualka totpa mliernana kupna-kai liawanni.

⁹ Rimormiori rwarora-rwalai niana hota hya' ed maka e niwra nhi'a, mere Orgahi-Orha'a ed mak ktutga talan la mormiorni-dardiarni.

¹⁰ Hota ray ed maka klernana plola-mneha la'a Uplerlawna pa netlia lira-tunu, pede ray edon npa'ei-npahal la yawerta-yataili.

¹¹ Itmatromlawanni sukni la riy rwadakan de edonna rohola-rautu me rnairi tatiaili maka nornora.

¹² La'a riy mak kodi plolli sukni tia'ala limni-rorni rhi'a yatyatni-halalli. Yoma lodanni-hairni nawniau kdededa onnila limni-rorni rden rer lia ploi-ple'era wawannu.

¹³ Mak ktorna-krautu ralamni nahepru yoma limni-rorni lirni-tunnu plolioi-plele'era, me sukni la riy maka kaltier die edonna nputra-npalka.

¹⁴ Ray id hankeranni-ralamha'arni hota nodia niukum matmiati. Mere la'a riy mak katu nanpena ed maka karinni-kawokia de.

¹⁵ Ray miaka ralamni kalwieda de nodi mormiori-dardiar miaka kalwiedweda la lima-rora, yoma emeknekama kakam maka kalernia otna la'a lerwarnu.

¹⁶ Tlernana kirkira-ralma rior samomuou de ha' inponni narehi dioinia riy ida e nlernana lel kiorkora-mah marmara. La'pa tlernana lira-yatu de hade welli narehia leli mah wawahra welli.

¹⁷ La'a riy samomuou wniehwani de nhi'inde olieta la yatyatni-halalli. La'a riy mak katiak reri wniehwani-liakatni nalewan la inon wamueheni.

¹⁸ Yatulu-yapetna ed mak kodia yatyatni-halalli yatlorni-yatra'ani. Me Uplerlawna Nalernia riy mak po'ona la mtatan genni.

¹⁹ La' samomuounu de takleha-taplara me tmori-tdar die tlola yawa. Hornama yana tlernohora riy mak katulu-kapetna pa tlernan walia hyonni-hyanni maka ha nwuri-ngalum nana.

²⁰ Mhuoratreria hya' maka ha rwatut tiarga la o'a, totpena mliernana ha samomuou lia hade. He' ed maka kha'ar mormiorni la'a Itmatromlawanni Makdenrer die, hota nler la unut lawna.

²¹ Riy rat niohora riy mak katu yoma tamkek la o'tani-kriahlanu, me la'a ltierni-ltianni mak kla' nana rira ihranu ralamni de it twarora de plola.

²² Emeknekama ger ormata mak kodi mormiori-dardiari, kirkira-ralma rior samomuou nodi kalwieda la riy maka katu kholi-kleta. Mere riy maka kpodku de nler la kropna-krieutu yoma podaknu.

²³ Riy mak ktarga kirkira-ralma rior samomuou natu natiak namni wnialawarni totpena lirni-tunnu naploi-naple'era. Lira-tun muak emkare de pleta-plet pa riy rreiniana-ra'nana samomuoga.

²⁴ Taltieri la rira de todia lira mnapla, de hade emekwalia gan tiuru mak khi' koda-atiawi lia rira inonni me nhi' riy ralamni pa rahepru.

²⁵ La' loi-talla dom de tamkek de samomuou! Mere hota la'awa honi dewade talan de nharan nana mati-molu yanin genni.

²⁶ La'pa takleha-taplara de tarur lia tulla-kniari werwerta totpena tlernana it tiernu-apannu.

²⁷ La'a riy yatyata nahia hu'ula pa na ntota mutwualli pa rler tar lia ralamni. Ir namni nwalawar de emekwalia ai wnialawarni.

²⁸ Riy maka khoitio'or doin la talan mak kaplollola de nodia yahuri-yawo'ora me la'a riy mak kapupu-kaheri ed maka kwaye'er targa ina-ela ama-hyali.

²⁹ Riy kaplialiahana nhiolli de nna'aili-nna'aili rimormior wialli totpa rwir olek la walli. Emkade pede nodia rimormior wialli la yatyatni-halalli.

³⁰ Ri'orahnioratmi la'a riy maka kna'ohma wunwunamnu. Yoma riy mak emkare de nhi'inde rwarora-rwalaiya yatyatni-halalli.

³¹ La'a riy maka kwehwa-klakat la ploini-ple'erni de hota ha rlernana mto'oni-pe'eni la' mormiorni. Pede morat wahrani emeknekama wutu-lai miaka klipa-ka'ma.

³² Yana plet pa tawenna, yoma riy mak katu katahan ralmha'arni de narehia riy maka karuri-kalai. Todi plolli la it inon wamueheni de tarehia riy maka ka'unut nana letlawna id la' ara ralamni.

³³ Nhi'inde rimormiori rwarora-rwalaiya hadoma maka hota riwra rhi'a. Mere la plollolli de, eneknekto'a Orgahi-Orha'a Nmeh'a mak ketlia.