Rano'a 15 - Alkitab bahasa Luang

¹ Twahla mnapalla de hota rira yawenanni nwal lia hamamuamua. Twahla makleklekla, de nareiniande yawunu-yawenna.

² La'pa lira-tun muaka riy mak katu, rakot nohora, de rhi'a rira yatnu pa npok lihira. Mere riy podku lirni-tunnu de npenpuen lia lira-tunu podku-padku.

³ Itmatromlawanni Makdenrer die, Nlina-nmata hya' maka ha rhi'a la' meni-meni to'a. E Nlin reri-nmat reri hihi'a-yapyap mak kaplollola me mak kyata-khala.

⁴ La' lira mnapnapla ed mak khi'a rira ralamni pa nahmuakru. Mere la' lira-tun muaka yatyata-halala de nhi' rira pa rakleha mhuakru.

⁵ Riy podku nparwah'a nana amni nnio'oni-niatnu. Riy mak katu, nwatniar reria mak kpolliohora.

⁶ La'a riy samomuou romni de re'a-tniaru maka kaniutni-kamdierna erla. Mere riy yatyata tniarnu de hota nodi ir la yatyatni-halalli.

⁷ La'pa riy mak katu, rwahauru, de nodia kirkira-ralma rior samomuou la'a riy mak katlina. Mere riy mak kpodku edon rhi' emkade.

⁸ Itmatromlawanni Makdenrer die, Nreiniana-na'nana samomuoga riy kalwiedweda re sniumbainni. Mere Nwayotlia himima-rere'a maka riy yatyata ral la E'a.

⁹ Orgahi-Orha'a Napetan gaini la riy maka kwehwa-klakat la yatyatni-halalli, mere Nsaynia riy maka ralamni nwahak nekpa nhi' mak kaplola la E' yamkekni.

¹⁰ La'pa he' ed mak yehwani de edonna nlol owa'an la talla plele'era de hota nlernana yamuki-yama'ala nniahora-nniala'a pa emekanekama hihi'ini-yapyapni re wniahlani. Me la'pa tahmena riy rpolliohora ita de hota tler la matmiati-molmuolu.

¹¹ Noh mati-rai miolu letni-ruhunni nor wutga loini-talanni la'pa ko'oni-ka'ani, de Itmatromlawanni Nat niohor momuog olekwa. Hota yeher to'ama E Nat niohora rimormiori ita ralma-riorni.

¹² La'a riy maka kpo'ona-kpei de sukni tia'ala riy rpolliohor e'a. Nahmen et miemna nwaka riy mak katu pa rwatutu-rwaye' e'a.

¹³ Ralma niniha-malmiali nhi' rira herni-gaini pa yamkekni nlita-nwora. Mere ralam mak susa de nhi' rira pa rakleha mhuakru.

¹⁴ Riy mak katu, rwahak reria kirkira-ralma rior samomuou. Mere riy podku rwahak reria lira-tunu podku-padku.

¹⁵ La'a riy mak kler la susa ralamni de lera-lera nekpa ralamni nmolu-nhelam doin la. Mere he' maka ralamni niniha-mamiali de lera-ler nekpa pa emeknekama rma ra'ana-remun la'a mei yamuki-yahepru.

¹⁶ La' samomuounu de itakleha-taplara hornama tatlina-tataili ta'unni-tamta'ata Orgahi-Orha'a. Yanhi'pa tre'a-ttaru mere it ihranu ralamni wolwo'la nohora.

¹⁷ Samounu de it ta'an mamainia ortawi-autiawi, hornama it idma ntulan reri-nsayn reri ida. Yanpa it tmahruru niohora hiwi anna ya'anni la' lera-lera mere it idma sukni tia'ala ida.

¹⁸ La'a riy maka pleta-plet pa kawenna de hade ed maka karieiniana kniokna-riarni. Mere la'a riy maka edonna kawenan taru de hade ed maka kodia mtiertierannu la'a rimormior wialli.

¹⁹ Rira inonni werta la tulla-kniari de hota rler la susa ralamni pa emeknekama rtuin la pu'na-kiarti, dunta-penta ralamni. Mere la'pa rimormiori ploi-ple'era de edonna rlernana yawuhi-yawe'eta la mormiorni-dardiarni.

²⁰ La' upa-a'na mak katu de hota er maka khi'a inni-amni pa ralamni rahepru. Mere la upa-a'na mak kpodku-kpadku de edon rala inni-amni la rekna-waiti.

²¹ Hota podku-padku lelgam reria riy mak podku, mere mak katu, nwehwa-nlakat la ploini-ple'erni.

²² Mak riy rwarora-rwalai niana id mana edonna rhi'a, yoma rakleha mak ktutga talan plolol la' ira. Mere la'pa mak katu kano'a-ka'atga harahu erla, de hya' maka rwarora pa hota rhi'a de plola pa ntutu-nte'ela.

²³ Lira-tun muaka takota de naplol la genni ed mak kodia ralam kalwieda me unut lawna.

²⁴ Riy maka katu, kafia'at nohora talan maka ktawniokur nana talan mormiori, mere edon riwra nalor temna talan mak kler la matmiati-molmuolu ralamni.

²⁵ Hota Itmatromlawanni ed maka kwaye'era riy maka katulu-kapetna romni-lewnu. Mere E' ed maka kruwun reria a'na riyi patyata id romni-lewnu la'pa nohananni-taniaratni.

²⁶ Hya' ed maka riy yatyata-halala rna'ohma re nhi'nande Orgahi-Orha'a pa Nahankeran rer lia. Mere lir mnapnapla de, naplola la Uplerlawna yamkekni.

²⁷ La'pa he' ed maka kwahaka ya'untu de nnairia wniarora-wnialai yatyata-halala, de e orgahani ed mak kweyata-kwaniaga e roma ihini-lewu nhiait wamueheni. Mere la'pa he' ed maka sukni tia'ala kupna nhiodal nuru, de hota nlernana mormiorni-dardiarni.

²⁸ Riy ralam kalwiedweda nhi'inde rakot hadom de rawierat ma'ta ralma-riorni. Mere la'a riy yatyata-halala de pleta-plet pa ranuru-ratierga rimormior wialli.

²⁹ Itmatromlawanni Makdenrer die, Nta'wa rer tlinni la riy samomuou sniumbainni. Mere olieta la riy yatyata-halala.

³⁰ Gai miaka kamalmiali ed maka khi'a yahepur la' rira ihranu ralamni, me kot kalwieda mana ed maka khi'a it ralma riorni pa nahmuakru.

³¹ Riy meni ed mak khu'ru-khelam nohora pniolliohora mak kodi mormiori, de ir rre' temn olek la riy mak katu.

³² Mere la'pa hameni ed maka kahmena yano'a-ya'atu, de hade emeknekama riy maka sukni tial la inonni owa'ana. Mere hameni ed maka kreiniana rira pniolliohorni de nwalia la mak katu nhioli-lieta.

³³ He' ed maka ka'unni-kamta'ata katlina-katailla Orgahi-Orha'a ed mak hota nwal lia riy orkirkira-or ralma riora. Me riy mak katu khu'ru-khelma hota rlernana yatota-yawawa.