Rano'a 14 - Alkitab bahasa Luang

¹ Patke'a ida mak ktaru kirkira-ralma rior samomuou de nhi'inde natu natiak romni mniotni totpena rler la kalwiedwedni. Mere patke' maka kpodku-kpadku nhi' romni mniotni rahuri-rawo'or nekneka pede edon rdella mtiertierannu.

² La'a riy maka illu-wniehwani plolioi-plele'era de na'unni-namta'ata Orgahi-Orha'a. Mere la'pa riy maka edonna nwehwa ploi-ple'era, de napolu-naliella Orgahi-Orha'a.

³ Riy podku sukni nmeh'a na'uli inon wamueheni, mere lira-tun mak klergot la e nurnu er mak khi' pa rira rliwra-rkaklia e to'orni owa'ana. Mere la'a riy maka katu de orgahi lirni-tunnu ed maka kruwun rer owa'ana e' inon wamueheni.

⁴ La'pa hayori-orpau hadamonan de awrieha hadamonan wali. Yoma la'a ruri-lai hayori-orpau pede rieiki-wnio'ora naniutni-namdierna.

⁵ Mak ktutrier niohora (saksi) plola nhi'inde nakot nohora plollolli. Mere la'pa mak ktutrier niohora (saksi) mak edon kaplola de sukni la nalahara.

⁶ Riy maka kpo'ona-kpei nwahak pa ntutga inonni emeknekama orkirkira-ralma rior samomuoga, mere la' plollolli de naplin niohor hadomdoma. Mere riy maka katu de hota nahaka lira nnio'a-wawa niatu de plet pa natga.

⁷ Olietmi la riy podku-padku. Yana sukmi miora mpiatam putu. Yoma hota miy edonna mliernana kirkira-ralma rior samomuou la' ira.

⁸ Riy maka kirkirni-ralma riorni samoga niwra nhi' hadom de nwarora pleini hota emkameni la wnialolli. Mere riy podku-padku podaknu nodi ir inon wamueheni rler tar lia klierat lawanni.

⁹ Riy mak podku edon pusin nohora do'oni-halli pa edon rwak Itmatromni totpa Namou-nawitna ira ihranu ralamni maka kakdeha-kaktiahli. Mere Uplerlawna ralamni Nal nana riy samomuou yoma rwak Uplerlawna totpena Nolin doinia ir la do'oni-halli.

¹⁰ Samoga onde yata ho'mana nden nek la up apun pa na'apun reria. La he' to' mana edon nat niohora.

¹¹ La' riy samomuou romni-lewnu de hota nayarir atehra, mere riy yatyata romni-lewnu de anin lawna nwo' doinia la' genni.

¹² La'a loi-talla dom de tamkeka de samoga, mere la'awa honi de talan de ntawniokur nana talan maka kler la matmiati-molmuolu ralamni.

¹³ Riy rkakru pa rapolu-ratniani mere hota rala niha-mali ra rtutwua totpena yana rira rat niohora. Yaniha-yamali liawna hota nwaldioinia de knio'a-kniakru.

¹⁴ Riy maka khoitio'or doin la talan mak kaplola de hota rlernana nhiakarni la hihi'ini-yapyapni re. Mere riy samomuou hota rreiki-rwo'or nana wo' samomuou.

¹⁵ La'a mak kakleh ma'ta wniarora-wnialai kirkira-ralma rior samomuou, de sukni npesiaya lira-tunu rupni-rupni. Mere la'a riy mak katu de nhi' hadom de de na'ereram la temni.

¹⁶ La'a mak katu kholi-kleta riwra rhi' hadom de orahniorta pleini totpa rahal inonni la yatyatni-halalli. Mere la' riy podku raplinu rodi inonni. Ir edon rwarora pleini mere riwra rhi' hadom de pleta-plet pa rhi' nana.

¹⁷ La'pa riy maka sukni la yawenna de nhi'inde nhi'a hihi'a-yapyapi mak kpodpodku-kpadpadku. Mere riy mak katu re, edonna naralmha'ara mere natu nhu'ru-nhelma rimormior wialli.

¹⁸ La'a riy mak kaplin niohor ma'ta la wniarora-wnialai kirkira-ralma rior samomuou hota nwal lia riy podku. Mere mak katu de hota lirni-yatnu ra'ititar rer lia.

¹⁹ Riy yatyata emkameni ho'mana hota rmai lia riy miaka ihranu ralamni raploi-raple'era pa ruh' idma-rrama lia'ar la totpa rwaka tulla-sniayni.

²⁰ La'pa riy maka kre'a-ktaru de mutwualli riy harahu. Mere riy kleleha de, ir mutwualli nek de ralamni edonna rala.

²¹ La'pa he' ed maka kmakriarni rimormior wialli, de ha nler la do'a-hala olekwa. Ne la'pa he' ed mak khi' samomuoga mak kakleha-kaplara de hota ha mormiorni nler la kalwiedni-paitiotni.

²² La'pa he' ed maka kwarora-kwalai rieri samomuounu de hota Uplerlawna Ntutg la E tulanni-sniayanni makodi liarni. La'a riy maka kna'ohma yatyatni, de hade nler olek la talan lawna klieratni.

²³ La'a tulla-kniari re honona de nodia unut lawna. Mere riy pamalsa de hanni to' yaltieri pede nodi e' la kleha-lara.

²⁴ Riy mak katu de riy ra'ulia onnila yatnu. Mere riy podku de riy raho'a-rawanin podaknu-padaknu.

²⁵ La'pa mak ktutrier niohora ida naltier lia plola wawannu, de ha nalewn oleka riy mormiorni. Mere la'pa nputra-npalka de ha nwotra-ntali oleka mutwualli.

²⁶ La'a riy maka na'unni-namta'ata Orgahi-Orha'a, de hota mormiorni namtiernu, me upni-a'nani mana Orgahi-Orha'a Nruwun reria.

²⁷ Ya'unni-yamta'ata la Orgahi-Orha'a de nodi mormiori emeknekama gera matni mak kopli-kha'a. Totpena tahal doini talan mak toktokla me tlewan la matmiati-molmuolu ralamni.

²⁸ Ray rurni-laini plolli-mneheni de tamkek nek la limni-rorni liawanni. La'pa lima-ror hadamonna de hota edonna nodi plolli.

²⁹ Riy maka katu de edonna plet pa nawenna. Mere riy podku de ta'eni nod niana inonni.

³⁰ Ralam maka kamtiertiernu, nhi' it inonni pa edonna namehra-namau. Mere ralam mehra emeknekama nnieni mak khi' agehpa rurni-kliakallu.

³¹ La'a riy maka khi' kalwiedweda a'na riy patyata, de hade na'unni-namta'at oleka Orgahi-Orha'a Uplerlawna Mempulwatnu. La'pa he' ed maka kterna riy mak kakleha, de hade napolu-naliel oleka Orgahi-Orha'a, yoma mak kakleha-kaplara re E limni enni ir wali.

³² Riy yatyat rler la yatyatni-halalli yatlorni-yatra'ani onnila yatni-halli mak kariei. Mere riy samomuou rlernana riuwun genni yoma rwehwa-rlakat la ploini-ple'erni.

³³ Kirkira-ralma rior samomuou e nden rer lia riy maka katu kholi-kleta ihranu ralamni. Mere it edon tlernan ma'ta mak kpodku-kpadku rtarga kirkira-ralma rior samomuou lia ihranu ralamni.

³⁴ Rden nek la plol wawna ed mak krana lodna-hairi pa nakota-nanana. Mere do'a-hala nhi' amola-ma'a kotni-nanni.

³⁵ Ray sukni la tniutnu-nhianni nhielli-liarni mak katu kholi-kleta mere nawenan la mak khi'a mola-ma' e'a onnila edonna ramkek la tulanni-kniarni.