Rano'a 13 - Alkitab bahasa Luang

¹ Upa-a'na mak ktaru o'ta-kriahlu de nhi'inde natu natlina-natailla amni lirni-tunnu. Mere upa-a'na maka kpo'ona-kpei, mak kparwah'a wniatutu-wniaye'a de, nahmen etia rira rpolliohora e'a.

² La'a riy samomuou lirni-tunnu rodia untu la e'a. Mere la'pa riy maka ralma-riorni koili-kaili de wniarorni-wnialaini penpuenu-tetem la maklekla-makdiaini.

³ Riy maka kaltier pia ka'ererma la ltierni de hota ha mormiorni namtiertiernu. Mere la'a riy maka kaltier pia hornama nanni pa naltieri de hota nhi' arukia inon wamueheni.

⁴ Riy pamalmalsa nwarora-nwalai liawna totpena nlernana re'a-tniaru mere oke' mana edonna nlernan etia. Mere la'pa riy mak kape'ela kniari hota nler la pripanni-fa'anni.

⁵ Riy maka kden rer lia plollolli wawannu, de sukni tia'ala ya'akla. Mere riy yatyata nhiolli-lietni nodi yamola-yama'a la inonni.

⁶ Yehwa plolioi-plele'era nruwun reria riy maka mormiorni-dardiarni naploloi-naplele'era. Mere yatyatni-halalli ntot weyata riy mak khi' do'a-kyap hiala.

⁷ Riy dom de rwehwa mak kre'a-mak ktaru, mere la' romni nayanni de nkerkerna. Riy dom de rwehwa kleleha-larlara mere rre'a-rtaru.

⁸ Riy mak ktaru re ralgota kupna liawanni totpena ralewna inonni la'a riy mak kiwra kwunu-kwen ira. Mere la'a riy mak kakleha-kaplara re, riy id mana edonna nheik la inonni yoma rakleha kupna-kai.

⁹ La'a riy samomuou de emeknekama hititni-repreparni. Mere riy yatyata emekwalima wa'du maka hare'u wuenna.

¹⁰ Mak ktutga manaratni de ha nwahak to'a yahuri-yawo'ora la'a rimormior wialli. Mere riy mak katu de nwahak to'a lira nnio'a-wawa niatu.

¹¹ Re'a-tniaru maka pleta-plet pa tlernana de hota pleta-plet pa ngai dioin la. Mere la'pa itkar werwerta pa itlernana oke'a-oke'a de hota na'ititar rer lia pa harahu.

¹² La'pa it edon tlernana ma'ta hya' ed maka ita ralamni nod rer lia de hota ita ralamni worworga me itmaphuna-tmahprai. Mere la'pa tlernana hya' maka it ralamni ha nwaka, de hota it tahmuakru owa'ana.

¹³ Riy maka kparwah'a wniatutu-wniaye'a de riy' de hota nlerwah'a gaini. Mere la'pa riy maka katailla Uplerlawna riorni-liaini de hota nlernana wniahlani.

¹⁴ Riy mak katu wniatutnu-wniaye'eni de nodi mormiori emeknekama gera matni mak kopli-kha'a. La'pa itlernohora wniatutnu de tahal doini talan mak toktokla me tlewan la matmiati-molmuolu ralamni.

¹⁵ Riy maka kirkirni-ralma riorni samoga, de hota riy rtutulu-rakwar reria nanni la heyanna. Mere he' ed mak edon kden rer lia plollolli wawannu de hota rler la susa ralamni.

¹⁶ Riy mak katu re rwaror ulga nampena rhi' hadoma. Mere mak kpodku rtutga podaknu-padaknu la meni-meni to' pa riy rahu rat niohor memna.

¹⁷ Riy maka itsopna mere nakleha kirkira-ralma riora, de hota nodia wunu-ara. Mere mak itpesiaya pa tsopna de hota nodia kalwiedwedni emeknekama maka ittahera.

¹⁸ La'a riy maka kwayotlia lira nnio'a-wawa niatu de hota nler la kleha-lara me yamola-yama'a. Mere la'pa riy maka kreiniana lira pniolliohora, de hota riy ratota-rawawa.

¹⁹ La'pa itlernana hya' ed maka itwahakhaka de it ralamni nahepuepru. Mere riy mak kpodku-kpadku rahmen memna rhoitio'or la yatyatni-halalli.

²⁰ La'pa riy maka kor wutga mak katu rwaloi wiutu de hota kirkira-ralma rior samomuounu na'ititar rer lia. Mere riy maka kwaloi wiut lia riy mak kpodku de hota rler la kropna-krieutu.

²¹ Riy maka kler olek la do'a-hala ralamni de hota rler la yatyatni-halalli yatlorni-yatra'ani. Yatyatni-halalli de emeknekama arwalli mak khokar reria totpena rdamit nana. Mere riy kalwiedweda rlernana hya' ed mak khi' ir pa rahepuepru.

²² La'a riy samomuou raltarga re'eni-tniarnu la upni-a'nani gahani. Mere riy maka kler la do'a-hala re re'eni-tniarnu nawniatierun pa ra rweiya riy maka kholi-klet la ploini-ple'erni ed maka klernana.

²³ Mak kakleha-kaplara re nohananni-taniaratni ralgota wullu-we'elli, mak riwra ra'an lola-remun lol la. Mere riy maka khi' hadom de edonna naplola-namneha ed mak nhi'nande mak kakleha-kaplara re edon rlernana hadom la tan wamueheni de.

²⁴ La'pa riy edonna nliwra a'nani de emekwalima riy' de edonna nsaynia a'nani. Mere la'pa nsaynia a'nani de ralamni edon werta-werta la'pa npolliohora.

²⁵ La' lera-ler nekpa riy samomuou na'ana penpuenu-nemun penpuenu. Mere riy yatyata, de rden rer lia kleha-lara.