Rano'a 12 - Alkitab bahasa Luang

¹ La'a riy maka kirkirni-ralma riorni samoga de sukni riy ra rwale'era ira la'pa rhi'a do'a-hala. Mere riy maka kpodku de rahmena rpolliohora.

² Itmatromlawanni Makdenrer die, ralamni nodi rerlia riy samomuou. Mere la'pa riy maka kna'ohma yatyatni de hota hare nhiakarni niukum lawna.

³ Riy yatyata-halala de mormiorni-dardiarni edon namtemna. Mere la'pa riy maka ralamni nora wniehwani plolioi-plele'era de ntutrier pit lia genni de edonna nwo'la.

⁴ La'pa patke' mak nhiolli-lietni samoga me ntulla-nkaria la hya'-hya' to'owa de ed maka khi'a muanke'eni pa nanni samoga. Mere patke' mak khi'a mola-ma'a muanke'eni de emeknekama nnieni mak khi' agehpa rurni-kliakallu.

⁵ La riy ploloi-plele'era nhi'inde rwarora-rwalaiya ha samomuou maka hota riwra rhi'a. Mere la'pa riy yatyata de rwarora-rwalai nieka ohpa-lahara klili-kdiori.

⁶ Riy yatyata nurnu-tiernu de emeknekama mak e rwuw rer lia talan letgara totpena rwunu-rwenna rira. Mere riy plele'era lirni nodi rira la yamori-yalewna.

⁷ Riy yatyata hota rtuin de rakleh lira-wawa memnu-tatra. Mere la'pa riy samomuou de, hota riy edon rawo'la ir la genni me nodia pa duratni-waitni emkade wali.

⁸ Nhi'inde ra'uli-rawedia riy mak katu yoma la'a kirkira-ralma rior samounu, mere riy maka ralma-riorni nkoili-nkaili de hota e rapolu-raliella.

⁹ La' samomuounu de tla'a lima-rora mere ita kniarni etla, mere yana tutga it inonni emeknekama maktaru mere takleha ya'ana-yemnu kupna-kai.

¹⁰ La'a riy samomuou de namkek la nhiurni-wnia'anni. Mere riy yatyata nmaklekla-nmakdiain to'owa. Raplinu-raplo'a la wniehwa-liakat mnapla.

¹¹ Mak kahnyi'a klialli pala penga la ya'ana-yemnu. Mere la'a riy maka khi'a-kyapia hihi'a-yapyapi mak edon kperkuna de podaknu neee!

¹² La'a riy dodo'a-halala de e riwra ra'ala riy yatyata-halala dom unatnu. Mere la'a riy samomuou de emekwalima ora-au lialawan maka uhwanu nwalapi me ga'arni nwahipni pa wo'oni na'unu-nayeha.

¹³ La'a riy yatyata re de nhi'inde lira-tunu yatyatni emek toktokla pa na ntokla inon wamueheni. Mere la'pa riy samomuou nler la susa ralamni de hota Uplerlawna Nalewan nan ira.

¹⁴ Riy rlernana yara'a-yapalu edon nhal la la'a e lirni-tunnu mak ksamomuou pa emeknekama la'a riy maka klernana siewni-kaini de edonna nhal la la'a tulanni-kniarni.

¹⁵ Riy mak kpodku natniekame hya' ed maka nwarora-nwalaiya de naplol olekwa. Mere la'a riy mak katu de sukni natlina lira nnio'a-wawa niatu.

¹⁶ La'pa riy rapolu-raliella riy mak kpodku de pleta-plet pa rawenna. Mere riy mak katu nodia inonni, edon rawenna la'pa riy ramola-rama' ira.

¹⁷ La'pa riy ploi-plele'era de ntutrier nohora (saksi) de nakot nohor neka hya' ed mak kaplola. Mere riy yatyata ntutrier niohora de nakota nohora kdiori-kdieha ohpa-lahara.

¹⁸ La'pa ita edon twarora-twalai pa taltieri-taltiani de it lirni de emeka nhior lawar kokoki-tawta'wa la rira ihranu ralamni. Mere la'pa riy mak katu de ir lirni-tunnu re emeknekama koda atiap maka ha rala rwatunu-rwatah'a nnieni-nhiena.

¹⁹ Ohpa-lahara de hota pleta-plet pa riy rat niohora. Mere la'pa lira-tun mak kaplola de hota riy rhoratreria pa nodi liarni.

²⁰ La'a riy maka kna'ohma yatyatni-halalli, de ralamni nhoratreria kdiori-kdieha ohpa-lahara. Mere he' ed mak kahak totpa rimormior wialli re rmori-rdar lia kalwiedwedni, de nden rer lia ralam yaheparnu.

²¹ Riy plolioi-plele'era de hota edonna nler la kropna-krieutu. Mere rimormiori yatyata-halala de nler la yatyatni-halalli yatlorni-yatra'ani.

²² Orgahi-Orha'a Nagai pietan la'a riy maka kputra-kpalka ohpa-lahara. Mere ralamni nahepru la riy maka kwehwa-klakat rer lia ploi-ple'era ralamni.

²³ La'a riy mak katu de edonna nwarehia lirni-yatnu. Mere riy podku de nwarehia podaknu la' meni-meni to'owa.

²⁴ Kniari werwerta de nhi'a rira pa rodi plolli. Mere riy mak kpamalsa hota rwalia la hopopna-lili'iru.

²⁵ Ralma-rior maka kworworga de nhi' rira pa ralamni nmolu-nhelam reri. Mere lira-tun samomuou nhi'a rira pa rahmuakru owa'ana.

²⁶ Riy ploi-ple'era ntutga talan plollola la rimormior wialli. Mere riy yatyata de nler la klierat lawna yoma la'a hihi'a-yapyapi maka kyata-khala.

²⁷ He' ed maka kodi rer nieka inon weratni de hota edonna nlernan walia hya' maka ha nahniar niana. Mere mak kape'el la kniari de hota riy de nlernana re'a-tniaru.

²⁸ La'pa he' ed maka khapar reri plollolli, de hota nlernana mormiori-dardiari. Mere he' ed maka sukni la loi-talla koili-kaili de e nla' pa nler tar lia matmiati-molmuolu ralamni.