Rano'a 11 - Alkitab bahasa Luang

¹ Itmatromni sukni tia'ala riy rnairia tatiaili mak'ana. Mere sukni la riy mak knairia tatiaili maka rnairia de nornora.

² La'a riy maka kpo'ona-kpei, de hota rler la molmola-mama'a, mere la'pa riy maka khu'ru-khelma la rimormior wialli de riy mak katga re.

³ La'a riy maka samomuou de nhiolli-lietni naplolioi-naplele'era. Ne la'a riy maka ka'ohpa-kalahara de hota ntuin la kdiorni-kdieheni wawannu.

⁴ La' ler maka Orgahi-Orha'a ralmha'arni ntuin la rimormiori, de ir re'eni-tniarnu edonna nodi unut hadom la' ira. Mere riy mak kden rer niek la plollolli wawannu de hota rlewan la matmiati-molmuolu ralamni.

⁵ Riy maka nhiolli-lietni naplolioi-naplele'era de rdella plola wawannu. Hade ed maka kwale'er reria talla totpa rala' lola talla samomuou. Mere riy yatyata-halala rodi inonni la yatyatni-halalli yatlorni-yatra'ani.

⁶ Riy samomuou rlewna yoma ihru ploi-ralma ple'era. Mere la'pa riy maka riy edonna rpesiaya de hota rtokal nan inonni la'a yatyatni-halalli maka rna'ohma nan de.

⁷ Tamkek nek la la'pa riy yatyata rmat die hota hya'a maka ralamni rod rer lia de hota nwalia la hamamuamua. Rha'ar aranni la'a ruri-lai wamueheni mere edon nwal lia hadomdoma.

⁸ La'a riy mak klernohor reria Itmatromlawanni de hota Nreiya ir la gera tlinni-ai aratni. Mere riy yatyata re de rler la dudunti-wetwetarni.

⁹ Riy mak edon pusin nohora Uplerlawna de rodia yatni-halli pa na nweyata-nwaniawua ir rimormior wialli, mere la'pa riy mak kden rer niek la plollolli wawannu de rler la yamori-yalewna onnila kirkirni-ralma rior samomuounu.

¹⁰ Mak kden la leta ralamni rahepru yoma riy plele'era rler la ga'a. Mere la'pa riy yatyata rmati de leta mniotni ramuki-rahepur nohora.

¹¹ Yoma riy ploi-ple'era ra'ani-pallu pede leta mniotni rler la kalwiedni-paitiotni, mere riy yatyata lirni-tunnu nweyata-nwaniawua leta ralamni.

¹² Riy mak kpodku-kpadku napolu-naliella rimormior wialli. Mere la'pa mak katu nhioli-lieta de namtie'el tar lia genni.

¹³ Mak kodi nuru edonna rawunmua hadoma mere nhi'inde rapupu-raheria rimormior wialli. Mere riy mak riy rpesiaya de rherier wia.

¹⁴ La'pa noha-rai ida limni-rorni nakleha riy mak ktutga talan plollola la' ira totpa rlernohora, de hota noha-rai die nler la wnieyata-wnianiawua. Mere la'pa mak katu kano'a-ka'atga harahu erla, de hota yeher to'ama limni-rorni rler la mounu-wahrani mori-lewna.

¹⁵ La'pa tano' targa de hota tsernia rira otanni-arni mere it kupanni edon ntu'tu de hota tler la tututu-wawuau. Samounu de yan takot targa, totpena tler la samomuounu.

¹⁶ Patke' maka nhioli-lieta nden la de nlernana yatota-yawawa la rimormiori wialli. Riy maka kwarui-kwate'la de nawoka-nale'u nieka re'a-tniaru.

¹⁷ Riy maka ktutga ralam kalwiedni la rimormior wialli de nlernan ha samomuounu la inon wamueheni. Mere la'pa riy miaka nhi' yatyatni la rimormior wialli de nhi' arukia inon wamueheni.

¹⁸ Hya' maka riy yatyata ra'unut nana de ha pniutra-pnialak nan to'a hade, yoma hota edon nwal lia hadomdoma. Mere la'pa riy kalwiedweda ida na'untu, de untu plollolli hade.

¹⁹ Plol toto' memna pa he'a ndenrer lia nhioli-liet samomuou de hota ha nlernana mormiori-dardiari. Mere he'a nden rer lia yatyatni de hota ha nlola talan mak kla'awa matmiati-molmuolu.

²⁰ Orgahi-Orha'a Nahankeran la rimormior miaka ralamni nkoili-nkaili, Mere Itmatromni Makdenrer die, ralamni napal reria riy maka nhiolli-lietni naplolioi-naplele'era.

²¹ Plol toto' memna riy yatyata re edonna rlewan la'a niukum lawna. Mere riy samomuou hota rler la yamori-yalewna.

²² Patke' ida inonni me gaini samounu mere nhiolli yata, de emeknekama e rkenia kdiel miaha la wawi irannu.

²³ Hya' ed maka riy samomuou rahaka re hota rodi ir la samomuounu. Mere hya' ed maka riy yatyata rahak reria nhi'nande Uplerlawna hankeranni ntuini la ira.

²⁴ La' riy dom de rara'a rira, ne yeher to'a pa re'eni-tniarnu ra'ititar rer tio'owa. Mere dom de ratawra ne yeher to' pa rakleha-raplara.

²⁵ La'a riy maka kara'a liawanni de hota ha nre'a-ntaru. Me riy maka ktulla-ksayn reria rimormior wialli, de hota riy rtulla-rsayn wali e'a.

²⁶ La'a he' ed mak kaniutnia yamanna pa edon na'olga la riy mak kaplara, de hota riy raliella, mere he' ed maka ka'olga yamanna hota nlernana ya'uli.

²⁷ He' ed maka sukni khi' samomuoga rimormior wialli, de hota rira sukni la. Mere he' ed maka kahaka yatyatni de hota nlernana yatyatni.

²⁸ He' ed maka kha'ar aranni la tniarnu de hota ntuin de emeknekama atiap miara. Mere riy mak kden rer niekla plollolli wawannu, de hota npoti-nkadwu pa emeknekama or uhwu-au uhwu.

²⁹ He' ed maka hihi'ini-yapyapni narieiniande inni-narni amni-hyalli pa rler la lir hala-tun hala de hota edonan nlernana inni-amni limho'oni-limli'irnu. Yoma hihi'ini-yapyapni mak kpodku-kpadku pede nwalia la mak kakleha pa hota nla ntulla-nkar lia riy mak katu nhioli-lieta.

³⁰ Hihi'a-yapyapi mak kden rer lia plollolli wawannu de nodia riy la mormiori-dardiari. Riy mak katu de yeher to'ama riy rlernohor reria.

³¹ Riy kalwiedweda hota rlernana nhiolli-lietni wniahlani la nohkeran di wawannu. Yaho'ma la'a riy yatyata mak khi' neka do'a-hala! Hota yeher to' pa rlernana hihi'ini-yapyapni mak kpa'ei-kpahal de wniahlani!