Rano'a 10 - Alkitab bahasa Luang

Salomo lira nnio'oni-wawa niatnu

¹ Hadi ed maka Salomo na nano'a-na'atga a'nani. Nano'a-na'at pua niwra: La' upa-a'na mak katu kwarora-kwalai samomuou de hota hare er maka khi'a inni-amni pa ralamni rahepru. Mere la upa-a'na mak kpodku-kpadku de hota rhi' inni-amni pa ralamni rmayo'a.

² Re'a-tniaru maka it tlernana la yahuri-yawo'ora onde matmera-wulkgaulu, de hota edon nal untu mere nwaldioinia la de ploi-ple'era ed maka kodia mormiori-lewlewna.

³ Itmatromlawanni Makdenrer die, edonna Nolin limni la riy samomuou rler la rehka-lara, mere E' ed maka khi'a orguli-agewta la riy yatyata totpena edonna nlernana hya' maka ha nwaror nana.

⁴ Riy pamalsa de hota rler la rehka-lara. Mere riy mak kape'ela de hota rlernana re'a-tniaru.

⁵ La'a tuwarwiari mak ktaru kirkira-ralma rior samomuou de la'awa rieiki-wnio'ora de hota nwaho'a-nwatiernia ya'ana-yemnu. Mere la'a mak kanin lawna de nmai lia rieiki-wnio'ora de hihi'ini-yapyapni de nodia molmola-mama'a.

⁶ Hota riy mak kden rer lia plollolli rlernana yara'a-yapalu la Itmatromlawanni. Mere riy yatyata de namtie'el nohora kapliahanni mak hota niwra nhi' nana.

⁷ It ralamni nahepuepru la'pa itsoratreria riy samomuou re nhiolli-lietni mai ita. Mere la'pa riy yatyata de pleta-plet pa itsoratdoinia wa.

⁸ La' riy mak katu de sukni ratlina lira nnio'a-wawa niatu, mere riy mak kpodku-kpadku yaltierni-yaltiani narieiniande orgahani rler la klieratni.

⁹ La'a riy mak kwehwa-klakta plele'era de hota mormiorni namtiertiernu. Mere riy mak kputra-kpalka ka'ohpa-kalahara de la' emkameni ho'mana hota riy rat niohora ir nhiolli-lietni.

¹⁰ La'pa he' ed maka kawunum targa yatyatni la ihranu-ralamni de hota nhi' rira pa rler la susa ralamni. Me riy mak kpodku-kpadku yaltierni-yaltiani narieiniande orgahani rler la klieratni.

¹¹ Riy mak kden la plollolli wawannu, lirni-tunnu de rodia untu emeknekama ger ormata mak kodi mormiori-dardiari. Mere la'pa riy yatyata raltier die, rade' targa wniarora-wnialai yatyatni-halalli maklekla-makdiaini.

¹² Gai pietna de nodgiota yahuri-yawo'ora. Mere riy mak ksukni ktulla-ksayni rimormiori wialli de edonna nwahla taru rira lir yatni me edon nwahla rira wniehwani-liakatni maka kameru ati-kamhan ralma.

¹³ Riy maka ralma-riorni plokra naltier die nnairia lira-tun samomuou. Mere makpodku-kpadku naltier die lirni-tunnu edon naplola pede nlernana liwliwra-kakaklu.

¹⁴ Riy mak katu de nhi'targa lira-yatu. Mere la'pa mak kpodku raltier wia de hade e na'ail to'a kropna-krieutu.

¹⁵ Mak ktaru re'a-tniaru emeknekama keliau-halwa'ana maka irayahew lia. Mere riy kleleha rler la kropna-krieutu ralamni yoma rakleh hadomdoma.

¹⁶ He' maka khi'a-kyapia la plol wawannu, de ha wniahlani de nler la mormiori-dardiari, mere mak khi' do'a-kyap hiala de nlernana do'oni-halli wniahlani.

¹⁷ La'pa he' ed mak kta'wa tlinni la lira pniolliohora, de hota nlernan mormiori-dardiari, mere la'pa he' edon natlina lira pniolliohora de hota nler la klieratni.

¹⁸ He' ed maka kwehwa-klakat samomuou mere nade' targa yawunu-yawenna la ihranu ralamni de putra-palka olek hadewa. Me riy maka kapupu-kaheri rimormior wialli de riy podku olek hadewa.

¹⁹ La'pa italtieri harahu rehia de hota tler la do'a-hala. La'pa he' ed mak katu kodia namni wnialawarni de riy mak katga de.

²⁰ Riy kalwiedweda rhar lirni de hade emeknekama mah wawahra ida. Mere riy yatyata wniarorni-wnialaini edonna nal untu.

²¹ Riy samomuou lirni-tunnu nodia ra'a-pal lia'a rimormior wialli. Mak kpodku lira podaknu nwenan nana orgahani.

²² Yoma Itmatromlawanni Makdenrer die ra'ani-pallu pede rimormiori rler la re'a-tniaru. Kniar werwerta edonna na'itar la tniaru.

²³ Riy mak kpodku sukni rhi'a yatyatni-halalli. Riy mak katu sukni rahaka kirkira-ralma riora me lira-yatu samomuou.

²⁴ Riy maka kaplele'era re rlernana hya' to' maka ha rahaka. Mere riy yatyata re rlernana hya' maka ha ramta'ata.

²⁵ La'pa anin lawna kakmoranni ntai tiemna de hota riy yatyata rram nana nhiakarni. Mere riy kalwiedweda de hota ntutrieri apit lia genni pa nodi liarni.

²⁶ Yana mhiopna-mli'irga riy pamalmalsa, hota nhi' to' pa riy ralamni ramehra sidu pa nhi' it nihini pa nmilu, onde emekwalima ai miokla la it matni pa nmakriarni.

²⁷ Mhiu'ru-mhielma mitlina-mitailla Orgahi-Orha'a totpena mmiormiori plalahwa. Mere riy yatyata tuwnu edona naplahwa.

²⁸ Riy mak kden la plol wawna de rha'ar reri aranni la Uplerlawna ne hota rler la ralam yaheparnu. Mere hya' maka riy yatyata ha rwahaka re hota ha molga.

²⁹ Orgahi-Orha'a Nruwun reria riy maka kaplele'er la do'a-hala. Mere Orgahi-Orha'a Nweyata-nwaniaga riy yatyata pa rmati-rmolu.

³⁰ Riy maka kden la ploini-ple'erni de hota namtemteman samomuou. Riy yatyata-halala de edonna nmor niana liawanni la'a noha-rai miaka ha ndella de.

³¹ Riy plele'era rwahaur de rnairia kirkira-ralma rior samomuou, mere la'pa riy yatyata rwahaur de Uplerlawna Nkukum nurnu.

³² Riy mak kden la plola wawannu rwahaur de rlol talla pede riy ratlin nande ralamni rahepru, mere riy yatyata nhi'inde rpudi-rakla, ra'ohpa-ralahara.