Rano'a 1 - Alkitab bahasa Luang

Salomo lirni-tunnu Nnia'eratni

¹ La' hadi de e nakot nohora Salomo, Ray Daud la Israel a'nani lirni-tunnu mak ha nala na nano'a-na'atu.

² La' Salomo lirni re nnia'eratni totpena na nwatutu-nwaye'a rimormiori totpena rat niohora nhioli-lieta me rlernan walia ralma-riora la'a lira nnio'a-wawa niatu.

³ La' lira nnio'a-niatu ri ha ra rwatutu-rwaye'a rimormiori totpena ratu rmori-rdari rlernohora ralma-rior mak ksamomuou, de rwatutu-rwaye'a re totpena nhiolli-lietni re rden rer lia plola-mneha, rhi'a-ryap die rlol talanni me rden rer lia ploini-ple'erni.

⁴ La'pa rimormior mak kakleha ma'ta wniarora-wnialai kirkira-ralma rior samomuou de rwatutu-rwaye'a totpena rlernana kirkira-ralma riora plahwa de la'pa maka ktuwarwiar mia'ta demade rwatutga totpena ratu rlernohora hya' mak kaplola.

⁵ La' lira nnio'a-wawa niatu ri, de rodia mak ktaru kirkira-ralma rior samomuou pa rlernan owa'ana lira-yatu me la'a riy maka ralma-riorni plahwa lirni-yatnu yeher to' pa na'itar la.

⁶ La' emkade pede lira kdieldelma (lir marna) e rat niohor nnia'eratni me mak katu re lirni-tunnu mak kayade'a re mana, e rat niohora lie'erni.

⁷ Ononni de rimormiori ratu ra'unni-ramta'ata me ratlina-ratailla Orgahi-Orha'a totpena rlernana lira-yatu plollolli de. Mere la'a riy maka kpodku de rahmena ratlina lira nnio'a-wawa niatu me rparwah'a rira wniatutnu-wniaye'eni la'a ira.

Lira nnio'a-wawa niatu

⁸ A'nu ne! Mtia'wa reria tlinmi la'a inmi-ammi lira nnio'oni-wawa niatnu!

⁹ Yoma hota la'a ira nnio'oni-niatnu la o'a, de hare er maka ra'itra o nhiolmu-lietmu pa emekwalima hadeutu samomuou ida maka rayapia emeka wutmu-laimu me wui miaha maka khi' inonmu pa yamkekni samoga.

¹⁰ Mliernana riy yatyata-halala pa rnori-rtam o'a, de yan memmemna mtial nohora re, a'nu nee!

¹¹ Emekto'ama riwra: “Ee! Mmiai pia honona it tawok pa tla twuwu riy mak kakleha ruri-lai maka klola la talan letgara. Itwuran nan it pa tlewria mak kakleha hal la mai ita re pa twenna.

¹² La' dodo'ondi de rmormiori lia kalwiedni-paitiotni mere hota rler la kropna-krieutu, de rwaran kmeha-kmeha. Plinu-plinnianamde noh molu-rai miati nlumu-ntell oleka re.

¹³ Tla ta'ala hyonni-hyanni mak samomuounu totpena ta tapenga it romni.

¹⁴ Mmiai pia tla twunu-twenna pa twuri-tgalmu hyonni-hyanni re! Pena itsakra mneneha re!”

¹⁵ A'nu nee! Yan memmemna mliernohora re! La'pa mitlin nan lirni re dewade mihal doinia la wa!

¹⁶ Hota edonna ramolmuolga la genni yoma edonna rhi' nan ma'ta yatyatni-halalli maka ha rwaror reria. Riwra pleta-plet pa rla rwahaka wniunnu-wnienanni.

¹⁷ Ma'nu prowta id nek de edonna nler tar lia dedesu yoma dedesu de etla ma'nu de matni taranni.

¹⁸ Mere riy yatyata re hare e raprehen wenna pa rhi' to'a dedes lia ir inon wamueheni, pa hota la' ir hihi'a-yapyap wuamueheni pede rler meman la matmiati-molmuolu ralamni.

¹⁹ Plola! La'a riy maka kwahaka re'a-tniaru de nodia wuhurni-tekalli, mere hota nala aranni na nhernia.

Lira nnio'a-wawa niatu mak kodia la kirkira-ralma rior samomuou!

²⁰ Mitlina! Lira nnio'a-wawa niatu mak kodia wniarora-wnialai samomuou de emolmolan nekama patke' ida maka polpuolu-hawaunia la' loi liawna-talan lawna! Me nhaunu-nhaunu la ya'olu-yala'a geni.

²¹ Nhaun la leta puohrani gaini, la'a geni-tien maka rirahu humumra-kakiailia.

²² Nhar lirni pa niwra: “Hei! Miy miak kakleha ma'ta wniarora-wnialai kirkira-ralma rior samomuou, hota miy emkade nekpa nodi liarni?! Mak kahe'i-kamali lira-yatu miy re! Hota mowen nianpena mhiopliala nhiolmi-lietmi mak edon kaplola rena? Hoi, mak kpodku-kpadku miy re! Hota ler wo'ir owa'ana nhiolmi-lietmi emkade mamaini?!

²³ La'pa apuolliohor miy die mitlin ma'u totpena lira-tun kalwiedwed makden la a ihru ralmu de hota a'ukota tiy miy, me ulgota walia lira-ya'tu mak kayade'a re la' miy.

²⁴ Apuol oleka miy wia, mere mpiayotlia pa edonna mhie'du nohor a li'ru me edon mitlin la a polpuo'lu.

²⁵ A nnio'u-niatu honona, de miy edonna mhie'du nana, me a pniolliohoru la miy miana edon mitlina.

^26-27 La' hade pede la'pa mdiunit nanpena a'uhe'i-umal niohora miy. Mlier tar lia la hadom pena mpiahniort oo! La'pa mlier la diwdiwra-dada'ala, polpuol ina-wakwak ama, kowlora-pah'a meti onnila mlier la lir hallawna-tun hallawna, pena mimkeka hota a'g ed maka kahe'i-kamal miy.

²⁸ La'pa emkade hota mpiol ma'u, mere noha nanina pa nhel wioranni. Hota mihak a lia meni-meni, mere edonna mliernan olek a wua.

²⁹ Yoma miy die rimormiori miaka kahmena-kaprai lira nnio'a-wawa niatu me mihmena mi'unni-mimta'ata mitlina-mitailla Orgahi-Orha'a.

³⁰ Nnio'a-nia'tu re honona de mihmen mitlin etia, me a pniolliohoru la miy mana edonna mliernohor walia.

³¹ La' hade pede hya' maka mtiamnia de hota mrieikia wa. Hota orgahami mtia' nan memna mehrani mak ha mpiarora-mpialai niana honona.

³² Mitlina! Miy miak kakleha ma'ta wniarora-wnialai kirkira-ralma rior samomuou, hota mlier la matmiati-molmuolu yoma mihmena mitlin mai a'u. Miy makpodku-kpadku hota mimkoha-mimnanan taru yoma edonna mhie'du nan a lira nnio'a-wawa nia'tu.

³³ Mere la'pa he' natlin la a li'ru-tu'nu de hota nler la kalwiedni-paitiotni. Nler la mormiori-dardiaria mtiertierannu me hota edon namta'ata!”