Nhiara 99 - Alkitab bahasa Luang

Itmatromlawanni de Ray miemeha inhatta

¹ Itmatromlawanni Makdenreri de Ray inhatta mak kodi plolli, pede rimormiori mak kwatiawua noha-rai honona rdiwdiwra. Orgahi-Orha'a de Naliwna la Kerub wawannu mak kdella luwuau nnio'taru wawannu, pede nohkerna-raikieran di nlika-nwo'la.

² Orgahi-Orha'a ed mak kodi plolli la Sion. Inponni nareh dioini riy mak kwatiawua noha-rai re honona.

³ Emkadella wa pede riy ra'uli-rawedi E nanni yoma E' ed mak karehi-kalawna nhi'nande riy ra'unni-ramta'ata E'a. Miluli-mihona Orgahi-Orha'a yoma Nakleha do'a-hala kuku' eti.

⁴ Ntorna-nrautu de nodi plola-mneha. Rhi'ina-rella (hya' mak kaplola) nden rer lia E ralamni. Nala deullu-tatarni nie'era-tniatarni la'a Yakop duratni-waitni re totpena rden nek la plol wawannu.

⁵ Mi'uli-miwedi Itmatromlawanni la tutullu-lolo'oni, de Uplerlawna maka itkola tieru-tawur nehla de. Mtiuk lia la'a mtatangenni gaini ralamni yoma Nakleh do'a-hal kuku' eti.

⁶ Musa nor Harun de, e rhor nan olek harella la'a Itmatromlawanni Makdenreri de imam-imamni ne la' Samuel mana, riy mak ksumbaini id hadella la'a Itmatromlawanni. Hare er mak kpol lia E'a noma Nwahla.

⁷ Itmatromlawanni Naltier lia ir de lirni nhargot lola kakam lawna ralamni ne honona re ratlina-ratailla hya' maka ha Ne'er taru-ntatar taru re.

⁸ Itmatromlawanni Makdenrer die, E' de Uplerlawna maka irkola tieru-rawur nehla. Nwahla oleka rimormiorni polpuollu-wakwakni. Lera dom de Nukum ira totpena Nwatutu-nwaye'a ira me E' edonna Nto'on reri do'oni-halli re mere Nolin doinia ir la do'oni-halli wawannu.

⁹ Mi'uli-miwedi Itmatromlawanni la tutullu-lolo'oni, de Uplerlawna maka itkola tieru-tawur nehla de. Mriu'u-mtiowar la E'a, la'a wo'orni maka kmou-kwitna. Yoma Orgahi-Orha'a Uplerlawna-Mempulwatnu Nakleh do'a-hal kuku' eti.