Nhiara 98 - Alkitab bahasa Luang

Rimormiori nohkerna rlina-rmat Uplerlawna yamorni-yalewanni

¹ Nhiar ya'uli-yawedi: Mpiahniara nhiar warwuaru la Itmatromlawanni Makdenreri, yoma la'a hihi'ini-yapyapni mak karuri mak takeni rwaror nana. De Nnairia ruri-lai wamueheni pa Nlernan oleka ya'unut lawna la ara ralamni.

² Itmatromlawanni Nwe'er nohora niwra E Nal olek arwalli re la yawa, totpena riy mak kden la noha-rai re no'a nohkerna-rai miaran di rat niohora Nwahla nana rira hihi'ini-yapyapni yatyatni-halalli.

³ Enhoratnana E sniayanni maka kden rer lia riy Israel. Pede riy mak kden la nohkeran di wawannu, de honona re rlina-rmat oleka it Uplerlawanni yamorni-yalewanni.

⁴ Pede nohkerna-lyanit marna nee! Mimuki-mihepur nohora Itmatromlawanni! Mi'uli-miwed reria E' Makdenrer die, de mlioi-mhieka, mihe'i walakei lol etnu-liolli.

⁵ Miala Itmatromlawanni nanni ma mnia'ona nhiarmi. Milira tiwla-prai, mihe'i hitara-fiola.

⁶ Mieuga noknokmi totpena hononmi miwoka-mile' pua mriarni-mriarin nohora he'emi-heparmi la'a Itmatromlawanni Makdenreri mak khi' Ray lia it de.

⁷ La'pa lor gahani de yo'ora yetni-warna me la hletan lawna-yoir lawna nor wutga i'na-ya'ana mak kden la yoir lawna letgarni me hletan lawna wikni, la'pa nor wutga nohmarna, lyanit tulu me mniotni honona, mi'uli-miwedi Itmatromlawanni.

⁸ Gerlawna re ror wutga wo'ora-kawru re mihepur nande mpiok limmi pa tiarni-tiarnia la'a Itmatromlawanni gaini ralamni.

⁹ Yoma ratlin nana hota Ha lerna Nerun pa Nmai die Nkukum nana watghudi. Hota rimormioria nohkerna mak kwatiawua hairi-hairi ror wutga noh pa'etu-rai piatatra re honona rlernana Ha lerna watghudni de Namkek memna rira plolli-halli.