Nhiara 97 - Alkitab bahasa Luang

Orgahi-Orha'a ed maka kodi plolli la' haneknek wawannu

¹ Itmatromlawanni Makdenreri de ed mak kla' Ray inhatta. Pede nohkernu ne, muhepru! Ne noh pa'etu-rai piatatra re mihe' niohora kiehenmi-nhiarmi.

² Orgahi-Orha'a Nayahew lia kakam metam lawna. La'a tnioranni-riautnu de, Nahak to'a plola-mneha wawannu. Emeknekama Nhi'a plola-mneha me rhi'ina-rella la lodna-hairni wniatatgenni.

³ Nden la liwangenni de ai mormiori nlomar la gaini ralamni pa nlomar dodioinia arwalli rella pa na'an amutnia-aki'ira.

⁴ Nhi'a tlena pa nalipa-naka'ma nana noha wawannu. Nohmarna nwatniara de ndiwra-nda'al la genni.

⁵ Wo'or tutulu re rmadger de emeknekama lilli la'a Itmatromlawanni Makdenreri de gaini ralamni. Yoma Orgahi-Orha'a de ed mak kodi plolli la nohkerna-rai miaran di.

⁶ Lyanti nwe'er nohora Itmatromlawanni kalwiedni, me la'a rimormiori la'a noha-rai la noheri woru lyanti nayanni ramkek reria Itmatromlawanni inponni.

⁷ La rimormior miaka rhoi-rtania uplerni-upmatni mak edon kperkuna, me rwarehi-rwatal niohora re, de hota Uplerlawna Nhi' amola-ma'a ira. Yoma uplerni-upmatni, hegan marna ornoha re honona hota rewre'wa pa rtuk lia Uplerlawna gaini ralamni.

⁸ Makdella Sion (Yerusalem) me makdella leta-leta no'a Yehuda de ihranu ralamni rawtentena (ramtemtemna), yoma ratlin nana Orgahi-Orha'a Uplerlawna-Mempulwatnu Nhudi-npar la plol wawannu.

⁹ Yoma O'a Matroma ed maka kodi plolli la nohkerna-rai miaran di. O' de ed mak karehi-kalawan momuou lia la'a maka ha rhoi-rtania re honona.

¹⁰ La'pa he' ed maka ralamni nod rer lia Itmatromlawanni Makdenreri, de oliet miy lia hihi'a-yapyapi mak yatyata-halala. Yoma Itmatromlawanni ed maka kruwun reri-ka'ahla reria rimormiorni. E' ed mak katiaka ir la riy yatyata-halala.

¹¹ Lelerni nrepar nan oleka riy mak kden la plol wawannu, pede riy maka ralamni ploi-ple'era re rler la yahepru.

¹² Miy mak kden la plol wawannu de mihepuepur nohora hare honona maka Itmatromlawanni Makdenreri de Nhi'a la miy rerieimi. Mi'uli-miwedi mlilili-mmiamuau E' nanni makdella mounu-wahrani.