Nhiara 96 - Alkitab bahasa Luang

Orgahi-Orha'a hota Nhudi-npara nohkerna-rai miaran di

¹ Itwahniara nhiar warwuaru la Itmatromlawanni Makdenreri. Nohkerna-rai miarna heri-woru lyanti nayanni twahniara la E' mak kden la tutullu-lolo'oni.

² Twahniar la Itmatromlawanni de tala nhiar ya'uli-yawedi, ne la' lera-ler nekpa takot nohora lir yamuki-yahepru, yoma Enamori-nalewn olek it wa.

³ Takot nohora E tullu-petanni la'a noha-rai re honona mai noha wawannu, me takot nohor walia E tulanni-kniarni mak karuri-kalai, la'a rimormiori nohkerna wawannu.

⁴ Yoma Itmatromlawanni inponni, me ya'uli-yawedi nden rer lia E'a. Ne la E' nanpena rimormiori ra'unni-ramta'ata de nareh dioinia marna ornoha-orrai.

⁵ La' noha-rai dom to'a la noha wawannu, de rhi'a ir marna ornoha-orraini de rakoki-rayap niana la watu onde au. Mere Orgahi-Orha'a de ed mak khi' nana darta-lyanti nohkeran di.

⁶ La E'a, de hitita-reprepra nor wutga preheni-mkaini. La' E romni nayanni de tamkek nan memna E plolli-mneheni rurni-laini.

⁷ Miy hononmi mak kwatiawua noha-rai honona, mi'uli-miwedia Orgahi-Orha'a onnila rurni-laini mak kamehi-kayona.

⁸ Mi'uli-miwedia kotni-nanni la genni-tienni, me todia nhiurliwtu-wnialodaw la romni nayanni.

⁹ Mmiai pia ita'uli-tawedia Itmatromlawanni Makdenreri. E' de Uplerlawna mak oliet memna la do'a-hala. Ha inponni Narehi-nalawna eee! Nohkerna-rai miarna honona mi'unni-mimta'ata E'a.

¹⁰ Mikot nohora la noha-rai nor wut nieka leta-leta re de Itmatromni Nla' oleka Ray pa Nodi plolli. Nhi'a pa nohkerna-rai miaran di naruri-na'orta pa hadom edon nawo'la. Hota E' ed mak ktorreria watghudi lokarni de Nhudi-npar la plol wawannu.

¹¹ Nohkerna nora lyanti mihepur pa mniehu-mtiera yoma mimuki-mihepru. Hletan lawna-yoir lawna mior wutga mniotmi mliekur-mgiaur la genmi mi'uli-miwedia Itmatromni.

¹² La'pa wo'ora-kawru, mior wutga mniotmi, de yawulli-yatniamni orun lawna-au liawna mmiai pia mpio'la-mpiaini, mkiahyoi-mkiahyai pia mpiakieh nohora nhiarmi la Uplerlawna.

¹³ Yoma hota Orgahi-Orha'a Nwatiaga Ilyamou-Watyatoha pa Nma Nodi plolli la'a nohkerna wawannu. Hota E' ed maka ktoran reria watghudi la noha-rai honona la nohkerna wawannu de edonna npa'ei-npahal eti.