Nhiara 95 - Alkitab bahasa Luang

Nhiar ya'uli-yawedi nhiu'ru-nhielma

¹ Mmiai pia twahniar nohora Itmatromlawanni Makdenreri. E' ed mak kruwun reri-ka'ahla reri ita. Trarni-trarin nohora it yamukni-yaheparnu la E'a mak kod it la yamori-yalewna.

² Mmiai pia tala kieha-nhiara ta twatroma-tahneiya, pa ta'uli-tawedi E'a yoma hya' maka Nhi' nan oleka la mai ita.

³ Yoma Itmatromlawanni Makdenrer die, Uplerlawna-Mempulwatnu inhatta. E' de de Ray miaka karehi-kalawna, Nareh niana marna ornoha-orrai honona re.

⁴ E' mana Nod plolli la noha uwarnu-rai ga'arni pa nodia la wo'ora wuranni.

⁵ Plolli-mneheni ndawar la lor gahani, yoma E' nanpena ed maka khi' nana, nor wutga ra' gahani re honona de E limni enni.

⁶ Mmiai pia it hononita tsu'ru-tselam la Itmatromlawanni nayanni yoma E' ed maka kakoki-kayap nian ita.

⁷ E' de Uplerlawna maka itkola tieru-tawur nehla. E' ed maka ktera-kdem reria ita, emeknekama dum maka Enheri-nlaiya. La'pa mitlin nana Uplerlawna lirni la' lera-mela ri,

^8-9 de yan mememna miy o'ta tehra pa emekneka upmi-tgarmi la Mariba me Masa, la' ler maka rta'aga me rtot ma't A'u, yoma rmalawan pa rtut o'ta kpaunu la A lia wo'orletna-kawurloini kennama ramkek nan oleka A hihi'u-yapya'pu mak kamehi-kayona.

¹⁰ La anni terampwogat memna, A'uwenan la ira pa A'ukota giwra ir ralamni rod rer mia'ta la dodo'a-halala pede irakleh oleka tlina-tail la'a A li'ru-tu'nu.

¹¹ Pede A'uwenan pa Aliokra re giwra: “Hoi! Hota miy edonna mliernana gen miaka A'ukottarg oleka la riy totpa hota ror A' pua mren ami la geni kalwie'du.”