Nhiara 94 - Alkitab bahasa Luang

Uplerlawna ed mak ktoran reria watghudi la rimormiori re honona

¹ Matromlawnu ne! O' de Makdenreri O'a! O' de Uplerlawna-Mempulwatnu inhatta, mak hota kwahla rimormiori hihi'ini-yapyapni. Dodo'ondi Mtiutga plolmu-mnehemu pa Mpuahla nan memna mak khi' do'a-kyap hiala re hihi'ini-yapyapni!

² Mumat pa Mhudi-mpuara nohkeran di wawannu. Mukmua riy kospira-lariapa re, de Muwniatniatia hya' mak ha rhi' oleka wa.

³ Matrome! Hota Mumkek rer niek la riy yatyata re rloi-rheka lelieuru-tartiarnia wa?! Hota mowen nianpena Omhoru-mpokur la (Nahor dioinia) hare nihini?!

⁴ Honona re polpuolu-hawaun nohora lir yata-tun yata, raltier de tullu-petanni.

⁵ Matroma! O' ed Makdenreri O'a. Mumkek la rtot nana O rimormiormu nanpena rterna la yawa.

⁶ Rwunu-rwenna a'na riyi patyata me pat palpualu ror wutga do'ona-dakan mak kden la handi.

⁷ La' ira wniarorni de hota Matro'mu edonna Nlina-nmat nana. Mak ha riwra Yakop Uplerlawanni de, hota etla meni pa Namkek nan ho'a?!

⁸ Mere miy miak kpodpodku-kpadpadku mhioratrer oo! La' samomuounu de mpiarora-mpialai samomuou!

⁹ Uplerlawna Nhi' ita tlinni, ne hota edonna Natlina?! Ne Enhi'a it matni ne hota edonna Namkeka?!

¹⁰ E' ed maka Nukmua noha-rai, ne hota edonna Nukmua miy?! E' ed maka khi' tungkur lia riy honona, ne hota e edon Natu hya' ed maka mhi' nana?!

¹¹ Plola pa Itmatromlawanni Makdenrer die, ed maka kat niohora rira wniarorni-wnialaini. E Natga de hota ralma-riorni re rwalia la hamamuamua.

¹² La'pa hameni ed maka Matro'mu Nwatutu-nwaye' nana deulu-tatarmu riormu-liaimu re de rler nek la unut lawna ee!

¹³ Nhi'inde Mulewna ir la ler maka rler la susa ralamni, mere Mhi' pa riy yatyata re rtuin la hu'ula ralamni.

¹⁴ Yoma Itmatromlawanni Makdenrer die, edonna Nhopliala rimormiorni. Edonna Nolin limni la riy maka E gahani re!

¹⁵ Hota mak ktorna watghudi lokarni re rhudi-rpar owa'an la plol wawannu, pede hota riy ploloi-plele'era honona ralamni re rahepru.

¹⁶ Hota he' ed maka kodnian a lia'a riy yatyata renoo? Hota he' ed maka kher lia mai a'u?

¹⁷ La'pa Itmatromlawanni edonna Ntulan la mai a'u mana, a'g ed olek la'a tiamin matgeni wa.

¹⁸ Mere la'pa awuarora de hota a' ema rwaliernia a'u. Mere Matro'mu sniayanmu mak kodi liarni ed maka khi' a' pua tiutrieri-kdeded la a ge'enu.

¹⁹ La'pa a ralmu nmaduka-nmadak wa, dewade O' ed maka kal a' pua uhepru.

²⁰ O' edonna Mrie' wut lia riy maka ka'ohpa-kalahar la watghudi pa mi'itra-milawan la maka ha rora-rlai tiaru.

²¹ Honona re rla' lir id pa rapalia riy makaplola re pa rala la niukum matmiati.

²² La'pa emkade ho'mana pena Itmatromlawanni Makdenrer die, ed maka kodnian a'u. Uplerlawna ed maka kruwun reri a lia' meni-meni to'a.

²³ Hota E' ed maka kukmua riy yatyata-halala de weratni emekwalima do'a-hal maka ha rhi' nana. Orgahi-Orha'a Uplerlawna-Mempulwatnu maka tkola tieru-tawur nehla la de ed maka Nkuh dioini-nho'or doin ir momuou.